Stefnt á mikla skógrækt
Fyrirtækið Yggdrasill Carbon ehf., hyggst ráðast í skógrækt í landi Ljárskóga í Dalabyggð í samstarfi við landeigendur á svæði sem nær yfir alls um 5.500 ha.
Einungis verður þó plantað í að hámarki 2.780 hektara, eða 51% svæðisins. Það er vegna þess að ekki verður plantað í votlendi og 15 metra svæði umhverfis það. Það verður ekki heldur plantað í 20 metra svæði umhverfis fornminjar. Kynning á verkefninu var sett í skipulagsgátt vegna umhverfismatsskýrslu vegna verkefnisins en opið var fyrir athugasemdir til 13. október. Lilja Björg Ágústsdóttir er sveitarstjóri Dalabyggðar. Hún svaraði nokkrum spurningum vegna verkefnisins.
Hvernig líst þér á þessi miklu áform um skógrækt í landi Ljárskóga?
„Áformin eru umfangsmikil og hafa vakið bæði áhuga og umræður í nærumhverfinu. Á þessu stigi liggur fyrir umhverfismatsskýrsla framkvæmdaraðila sem hefur verið kynnt og umsagnir og athugasemdir hafa borist frá ýmsum aðilum. Sveitarfélagið hefur ekki tekið afstöðu til sjálfrar framkvæmdarinnar heldur leggur áherslu á að málið fari í gegnum lögbundið skipulags- og matsferli þar sem áhrif á umhverfi, landnotkun og aðra hagsmuni verða metin og vegast hvert á móti öðru áður en ákvörðun verður tekin um framhaldið,“ segir Lilja Björg.
Er búið á jörðinni og er skógrækt á henni í dag eða hvað?
„Það hefur ekki verið búskapur á Ljárskógum síðan um 1980. Íbúðarhúsið hefur verið nýtt sem veiðihús í seinni tíð og á jörðinni hafa verið skipulögð frístundasvæði ásamt því að uppbygging er á ferðaþjónustu með ströndinni. Heiðarhluti jarðarinnar er landmikill og stór hluti beitarlands sauðfjárbænda á svæðinu.“
Er mikið um skógrækt í sveitarfélaginu og hvernig dafnar gróðurinn, er gott að rækta upp tré í Dalabyggð?
„Það er töluvert um minni skógræktarsvæði víða í sveitarfélaginu og á nokkrum stöðum eru villtir birkiskógar. Mest er þó um skógrækt á Skógarströndinni þar sem margar jarðir eru orðnar svokallaðar skógræktarjarðir,“ segir Lilja Björg.
Hvað er jákvæðast við verkefnið í Ljárskógum að þínu mati?
„Framkvæmdaraðilinn sér fyrir gott tækifæri til kolefnisbindingar með beitarskógrækt þar sem votlendi sé þó hlíft. Verkefnið er aðeins á fyrstu stigum í skipulagsferlinu og er umhverfismatið með fyrstu skrefunum í því. Það liggur svo til grundvallar komi til breytinga á aðalskipulagi og afgreiðslu á framkvæmdarleyfi fyrir skógræktinni. En ítreka að sveitarfélagið hefur ekki tekið afstöðu til áformanna.“
Er eitthvað neikvætt við það, ef já, hvað þá helst?
„Það eru ýmsar skoðanir á lofti varðandi fuglalíf, vistkerfi og aðgengi sauðfjár að beitarlandi, svo dæmi séu tekin úr þeim umsögnum og athugasemdum sem hafa borist við umhverfisskýrsluna í skipulagsgáttinni,“ segir Lilja Björg.
Er eitthvað meira sem þú vilt segja eða láta koma fram?
„Skipulagsferlið er í raun ekki formlega hafið. Nú er búið að kynna umhverfismatsskýrslu framkvæmdaraðilans og afla umsagna en svo mun HMS yfirfara málið og gefa út álit sitt á umhverfismatinu og niðurstöðum þess,“ segir Lilja Björg og bætir við: „Dalabyggð benti á það í sinni umsögn um umhverfismatsskýrsluna að svona umfangsmikil skógrækt kallaði á aðalskipulagsbreytingu þar sem skilgreina þyrfti skógræktar- og landgræðslusvæði og setja skipulagsákvæði um skógræktarframkvæmdina. Þegar sótt verður um framkvæmdaleyfi fyrir skógræktinni þá þarf að liggja fyrir staðfest stefna um hana í gildandi aðalskipulagi Dalabyggðar.“
