Vinsamlegast athugið að þetta efni er eldra en 1 árs.
Matvælastofnun fylgist enn náið með tíu hrossum á bæ í Borgarfirði.
Matvælastofnun fylgist enn náið með tíu hrossum á bæ í Borgarfirði.
Mynd / Steinunn Árnadóttir
Fréttir 3. nóvember 2022

Forstjóri fagnar samtalinu við ráðuneytið um frekari valdheimildir til að tryggja velferð dýra

Höfundur: Sigurður Már Harðarson

Enn eru tíu hross metin í viðkvæmu ástandi hjá umráða­manni hrossahóps í Borgarfirði, sem Matvælastofnun þurfti að vörslusvipta þann 18. október, vegna ófullnægjandi fóðrunar. Hrönn Ólína Jörundsdóttir, forstjóri Matvælastofnunar (MAST), segir að fylgst sé náið með hrossunum. Hún fagnar frumkvæðisúttekt Ríkisendur­skoðunar á eftirliti Matvæla­ stofnunar með velferð dýra.

Eins og fram kom í tilkynningu MAST 19. október var umráða­maðurinn sviptur vörslu allra sinna hrossa og aflífa þurfti samdægurs 13 hross, eftir mat fulltrúa stofnunarinnar á ástandi hrossanna. Hluta þeirra var svo skilað aftur til umráðamanns, þar á meðal þau tíu sem eru í viðkvæmu ástandi – til sérstakrar umhirðu. Að sögn Hrannar Ólínu mun eigandinn sæta mjög stífu eftirliti til að tryggja að aðbúnaður þessara hrossa sé í lagi.

Verklagsreglur byggja á lögum um dýravelferð

Matvælastofnun hefur setið undir gagnrýni um að hafa ekki brugðist fyrr við í þessu máli með skilvirkum hætti – og raunar hefur borið á gagnrýni í svipuðum málum sem upp hafa komið á undanförnum árum. Í bókun umhverfis­ og landbúnaðarnefndar Borgarbyggðar frá 20. október kemur til að mynda fram að „ferlar sem MAST vinnur eftir, virðast gefa mikið svigrúm fyrir búfjáreigendur og telur nefndin að ekki sé gengið nægjanlega hart fram í að framfylgja þeim fyrirmælum sem búfjáreigendum eru gefin í málum sem þessum“.

Frumkvæðisúttekt Ríkisendurskoðunar á MAST

Ríkisendurskoðun tilkynnti um það 1. september síðastliðinn að hún hefði ákveðið að hefja frumkvæðisúttekt á eftirliti Matvælastofnunar með velferð dýra og skila niðurstöðum hennar í opinberri skýrslu til Alþingis. Hrönn Ólína segir að hjá MAST sé unnið að dýravelferðarmálum af sannfæringu um að verið sé að fylgja verklagsreglum sem byggi á gildandi lögum um dýravelferð frá 2013.

„Ég á von á því að úttekt Ríkis­endurskoðunar sýni fram á þetta. Ef það koma einhverjar athugasemdir inn á okkar borð um að eitthvað þurfi að bæta í okkar verklagi, þá gerum við það. Úttektir eru ávallt tækifæri til bóta,“ segir hún.

Þörf á nýjum tólum og tækjum

Nýverið kallaði matvælaráðu­neytið eftir upplýsingum frá Matvælastofnun um framkvæmd eftirlits og verkferla vegna velferðar dýra.

Er þar vísað til tilfella þegar grunur leikur á að umráðamenn séu ekki að uppfylla ákvæði laga, hvort sem um er að ræða almennt eftirlit eða samkvæmt ábendingum sem berast stofnuninni. „Ég upplifi ekki eins og spjótin standi á okkur frá ráðuneytinu, þeirra erindi er held ég bara mjög gagnlegt.

Ráðuneytið óskar einnig eftir upplýsingum um hvort stofnunin telji skort á heimildum í lögum til að tryggja velferð dýra og grípa til viðeigandi ráðstafana þegar aðstæður krefjast. Þetta finnst mér bara alveg frábært, því það verður að segjast alveg eins og er að lögin sem við störfum eftir voru sett árið 2013 og það hefur vitanlega margt gerst á þessum tíma. Við teljum að við höfum náð ágætum árangri á undanförnum árum varðandi þessi mál, komist fyrir ákveðinn vanda, og um það vitnar þessi fjöldi mála sem hafa komið fram í dagsljósið á síðustu árum.

Við veltum fyrir okkur hvort þessi mál sem hafa nýlega komið upp séu annars eðlis en við höfum átt að venjast og hvort við þurfum þá ef til vill ný tól og tæki til að geta brugðist almennilega við þeim,“ segir Hrönn Ólína.

Forstjórinn fagnar erindi ráðuneytisins

Í erindi matvælaráðuneytisins var jafnframt farið fram á að stofnunin upplýsi matvælaráðherra um stefnu sína hvað varðar upplýsingamiðlun til almennings meðan þær aðgerðir sem snúa að velferð dýra standa yfir og eftir að þeim lýkur.

Hrönn Ólína segist skilja reiði fólks þegar svona erfið mál koma upp. „Ekkert okkar vill horfa upp á dýr sem beitt er harðræði eða eru í aðstæðum þar sem heilsu þeirra og lífi er ógnað. Hins vegar vil ég koma því á framfæri að við teljum okkur vinna að dýravelferðarmálum innan þeirra heimilda sem við höfum, af heilindum og einlægni.

Því fögnum við erindi ráðu­ neytisins og munum taka þátt í því samtali sem fram undan er, af heilum hug.“

Skylt efni: dýravelferð | Mast

Fagstaðlaráð í umhverfis- og loftslagsmálum
Fréttir 27. nóvember 2023

Fagstaðlaráð í umhverfis- og loftslagsmálum

Nýtt fagstaðlaráð hefur verið stofnað undir hatti Staðlaráðs Íslands. Það verður...

Rauðþörungar í fóðri gætu dregið mjög úr metanlosun nautgripa
Fréttir 24. nóvember 2023

Rauðþörungar í fóðri gætu dregið mjög úr metanlosun nautgripa

Iðragerjun nautgripa er aðalástæðan fyrir illu orðspori nautgriparæktar í loftsl...

Verðmæti hrossakjöts
Fréttir 24. nóvember 2023

Verðmæti hrossakjöts

Útflutningsverðmæti hrossakjöts á fyrstu níu mánuðum ársins 2023 eru orðin hærri...

Of mikið framboð var af innlendu blómkáli yfir of stuttan tíma
Fréttir 23. nóvember 2023

Of mikið framboð var af innlendu blómkáli yfir of stuttan tíma

Að undanförnu hafa heyrst raddir garðyrkjubænda sem ýmist ætla að hætta blómkáls...

Heimilt að hlífa gripum með verndandi arfgerðir og mögulega verndandi arfgerðir
Fréttir 22. nóvember 2023

Heimilt að hlífa gripum með verndandi arfgerðir og mögulega verndandi arfgerðir

Í nýrri skýrslu sérfræðingahóps eru lagðar til útfærslur á aðgerðum gegn riðuvei...

Verður í sögulegu hámarki á næsta ári
Fréttir 22. nóvember 2023

Verður í sögulegu hámarki á næsta ári

Heildargreiðslumark mjólkur verður í sögulegu hámarki á næsta ári samkvæmt nýleg...

Áskorun frá Skagfirðingum
Fréttir 22. nóvember 2023

Áskorun frá Skagfirðingum

Byggðarráð og Búnaðar­samband Skagfirðinga fagna nýskipuðum starfs­hópi um fjárh...

Arfhreinn ARR-hrútur í fyrsta sinn á sæðingastöð
Fréttir 21. nóvember 2023

Arfhreinn ARR-hrútur í fyrsta sinn á sæðingastöð

Hrútaskrá 2023-­2024 er komin út á stafrænu formi. Hún er aðgengileg á vef Ráðgj...