Skila þarf haustskýrslu í Bústofni eigi síðar en 20. nóvember 2020
Atvinnuvega- og nýsköpunarráðuneytið minnir bændur á að skila haustskýrslum fyrir árið 2020 í Bústofni, en opnað hefur verið fyrir skil á þeim.
„Í samræmi við 10. gr. laga um búfjárhald nr. 38/2013, er öllum umráðamönnum búfjár skylt að skila árlega rafrænni haustskýrslu í Bústofni, eigi síðar en 20. nóvember.
Í haustskýrslunni skal koma fram fjöldi ásetts búfjár af hverri tegund, allt búfé í hagagöngu og á hvaða jörð eða landspildu það er. Einnig skal koma fram gróffóðuruppskera af hefðbundnum nytjatúnum og leigutúnum og fyrningar, auk upplýsinga um aðra fóðuröflun og landstærðir. Minnt er á að skilyrði fyrir stuðningsgreiðslum í landbúnaði eru fullnægjandi skil á haustskýrslu. Skráning í Bústofn er með rafrænu skilríki eða Íslykli,“ segir í tilkynningu ráðuneytisins.
