Vinsamlegast athugið að þetta efni er eldra en 5 ára.
Sauðfjárbændur fokreiðir út í landgræðslustjóra
Fréttir 11. apríl 2019

Sauðfjárbændur fokreiðir út í landgræðslustjóra

Höfundur: Hörður Kristjánsson

Landgræðslufólk í Biskups­tungum, fjallskilanefnd Biskups­tungna og sauðfjárbændur í  Biskupstungum, komu saman á fundi í veitingaskálanum Faxa við Tungnaréttir, sunnudaginn 7. apríl sl. Tilefni fundarins voru ummæli landgræðslustjóra, Árna Bragasonar, sem hann viðhafði á fagráðstefnu skógræktar á Hallormsstað 3.–4. apríl sl. Einnig ummæli í fjölmiðlum undanfarna daga í garð bænda, einkum þeirra sem nýta afrétti.

Samkvæmt heimildum Bændablaðsins var mikil reiði í hópi bænda og kom til mjög harðra orðaskipta milli þeirra og landgræðslustjóra.

Gagnrýnt var tal Árna um að banna ætti lausagöngu búfjár og að sumir afréttir séu ónýtir. Til dæmis Biskupstungnaafréttur. Einnig hafi hann gefið í skyn að þeir sem reki fé sitt á fjall geri það til að losna undan þeirri ábyrgð sem fylgir því að eiga búfé.

Á fundinum í Faxa var gerð afar harðorð ályktun sem  samþykkt var samhljóða: „Í áratugi hefur heimafólk í Biskupstungum unnið ötullega að uppgræðslustörfum á Biskupstungnaafrétti og alla jafna í góðu samstarfi við starfsmenn Landgræðslunnar.  Landgræðslustjórar, fyrrverandi og núverandi, hafa oft  komið til fundar við heimamenn og lýst aðdáun sinni á því mikla og metnaðarfulla landgræðslustarfi sem hér er unnið og að árangurinn láti ekki á sér standa. Þó nokkrir félagsmenn í Landgræðslufélagi Biskupstungna og sauðfjárbændur hafa verið heiðraðir af Landgræðslunni fyrir framúrskarandi landgræðslustörf á Biskupstungnaafrétti.

Fundarmenn telja algerlega óásættanlegt að landgræðslustjóri útmáli bændur sem óábyrga skemmdarvarga sem reki fé sitt til fjalls til þess eins að eyðileggja land og komast hjá ábyrgð á sínu búfé. Eru þessi ummæli í algerri andstöðu við það sem komið hefur fram í máli hans á fundum með heimafólki.

Þá lýsa fundarmenn  undrun sinni á því að landgræðslustjóri gangi svo hart fram gegn bændum á sama tíma og haldnir eru kynningar- og samráðsfundir um samstarfsverkefnið Grólind. Telja fundarmenn að alger trúnaðarbrestur hafi orðið milli hagsmunasamtaka bænda og Landgræðslunnar með ummælum landgræðslustjóra. Hann hefur með ummælum sínum gefið það út að afréttir séu óhæfir til beitar þó svo að niðurstöður Grólindarverkefnisins liggi ekki fyrir og tiltekur þar sérstaklega Biskupstungnaafrétt. Fundarmenn telja forsendur verkefnisins brostnar, þar sem landgræðslustjóri hefur þegar sagt sína skoðun, án þess að heildstæðar vísindalegar niðurstöður varðandi þróun gróðurfars á afréttum liggi fyrir.

Þá vilja fundarmenn benda á að landbúnaður er eina atvinnugreinin sem þarf að uppfylla ströng skilyrði til að nýta afrétti /hálendi landsins. Á Biskupstungnaafrétt koma tugþúsunda ferðamanna ár hvert til að njóta útivistar á og við Langjökul og fara þeir um á vélknúnum farartækjum. Landgræðslustjóri hefur gefið í skyn að mikil loftslagsvá fylgi sauðfjárbeit á afréttum, má velta því fyrir sér hvort mengi meira, 4000 fjár í 10 vikur á ári eða tugþúsundir ferðamanna á vélknúnum faratækjum allt árið um kring.

Að endingu óska fundarmenn eftir samtali við formenn ríkisstjórnar­flokkanna þriggja, þar sem framtíðarsýn  lanbúnaðarins verður rædd, en verulega hefur verið vegið að sjálfstæði landsbyggðarfólks og búsetuskilyrðum með hinum ýmsu frumvarpsdrögum undanfarin misseri.  Samtalið fari fram hér heima í héraði.“ 

Nýir liðsmenn Bændablaðsins
Fréttir 21. júní 2024

Nýir liðsmenn Bændablaðsins

Lesendur hafa kannski tekið eftir nýjum efnisþáttum í blaðinu í vor. Hugarleikfi...

Opnað fyrir milljarða króna fjármögnun
Fréttir 21. júní 2024

Opnað fyrir milljarða króna fjármögnun

Lítil og meðalstór fyrirtæki á Íslandi fá aðgengi að 3,2 milljarða króna fjármög...

Stækka ræktarland og fjölga vörutegundum
Fréttir 20. júní 2024

Stækka ræktarland og fjölga vörutegundum

Hvítlauksbændurnir í Neðri-Brekku í Dölum fengu nýlega tvo styrki úr Matvælasjóð...

Verðlaunuðu góðan árangur
Fréttir 20. júní 2024

Verðlaunuðu góðan árangur

Tabea Elisabeth Schneider hlaut verðlaun fyrir besta árangur á B.S. prófi þegar ...

Fuglum fækkar vegna óveðurs
Fréttir 20. júní 2024

Fuglum fækkar vegna óveðurs

Samkvæmt fuglatalningu varð algjört hrun í fjölda fugla á Norðausturlandi þegar ...

Óhrædd að takast á við áskoranir
Fréttir 19. júní 2024

Óhrædd að takast á við áskoranir

Tilkynnt var um ráðningu Margrétar Ágústu Sigurðardóttur í starf framkvæmdastjór...

Halla færir út kvíarnar
Fréttir 19. júní 2024

Halla færir út kvíarnar

Halla Sif Svansdóttir Hölludóttir, garðyrkjuframleiðandi og eigandi garðyrkjustö...

Sala Búvís stöðvuð
Fréttir 19. júní 2024

Sala Búvís stöðvuð

Samkeppniseftirlitið hefur komið í veg fyrir að Skeljungur kaupi Búvís ehf. þar ...