Landeldi við Hauganes
Laxós ehf. áformar uppbyggingu og rekstur fiskeldisstöðvar norðan Hauganess, þar sem gert er ráð fyrir stórseiða- og matfiskaeldisstöð með samanlagt um 260.000 rúmmetra eldisrými.
Framleiðslugeta áætlaðrar fiskeldisstöðvar er í kringum 22.000 tonn af slægðum laxi eða urriða á ári. Fyrsti áfangi verkefnisins felst í klakdeild, smáseiðadeild og sjógönguseiðadeild í einni byggingu á athafnasvæði á Árskógssandi. Annar og þriðji áfangi er áætlaður norðan við Hauganes þar sem stendur til að reisa stórseiðaeldisstöð í tólf tönkum með 18.000 samtals rúmmetra eldisrými, og matfiskaeldisstöð með 48 tönkum með samtals 240.000 rúmmetra eldisrými. Til greina kemur að sláturhús verði á svæðinu en það verður ákveðið síðar.
Tillagan gerir jafnframt ráð fyrir landfyllingu og viðlegumannvirki fyrir allt að 130 löng skip. Þau geta þá dælt lifandi fiski um borð, sótt gáma með afurðum, afhent fóður og landað byggingarefni á byggingatíma. Móta þarf land undir stöðina norðan Hauganess, annars vegar með skeringu inn í landið og hins vegar með landfyllingu og grjótvarnargarði þannig að flatt athafnasvæði verði í um 3 m hæð yfir sjávarmáli. Nú er unnið að jarðvegsrannsóknum sem væntanlega leiða til nánari útfærslu.
Áætlað er að þrjátíu ársverk skapist þegar stöðin verður í fullum rekstri. Þar að auki má gera ráð fyrir þrjátíu til fimmtíu ársverkum við slátrun, pökkun og vinnslu afurðanna. Nánari upplýsingar má sjá á vef Skipulagsstofnunnar þar sem málið er í kynningu og opið er fyrir athugasemdir
