Jakob Svavar Sigurðsson og Skarpur frá Kýrholti unnu fjórganginn í Meistaradeild Líflands í hestaíþróttum.
Jakob Svavar Sigurðsson og Skarpur frá Kýrholti unnu fjórganginn í Meistaradeild Líflands í hestaíþróttum.
Mynd / Meistaradeild í hestaíþróttum
Fréttir 8. febrúar 2024

Innanhússmótaraðir aldrei verið vinsælli

Höfundur: Hulda Finnsdóttir

Keppnistímabilið í hestaíþróttum er hafið hérlendis. Vetrartímabilið einkennist af innanhússmótum og deildarkeppnum. Framboðið af mótum og hinum ýmsum deildum hefur aldrei verið meiri – núna í febrúar eru yfir tuttugu viðburðir á dagskrá.

Meistaradeild Líflands í hestaíþróttum var fyrst til að hefja göngu sína þann 25. janúar sl. Keppt var í fjórgangi þar sem Jakob Svavar Sigurðsson vann á stóðhestinum Skarp frá Kýrholti. Nokkuð óvæntur sigur en margir gerðu ráð fyrir því að sigurvegararnir frá því í fyrra, Aðalheiður Anna Guðjónsdóttir og Flóvent frá Breiðstöðum, myndu landa toppsætinu líka í ár. Gangskiptingin upp í stökk klikkaði í úrslitunum hjá þeim sem var þeim dýrkeypt og Jakob og Skarpur náðu gullinu til sín en Aðalheiður og Flóvent enduðu í öðru sæti. Í þriðja sæti varð Glódís Rún Sigurðardóttir og Breki frá Austurási.

Keppnin rétt að byrja

Lið Hestvits/Árbakka leiðir liðakeppnina eftir fyrstu grein en allir liðsmenn komust í A úrslit en þau voru þau Jóhanna Margrét Snorradóttir, Gústaf Ásgeir Hinriksson og Glódís Rún. Í öðru sæti er lið Hjarðartúns og í því þriðja er lið Ganghesta/Margrétarhofs. Keppnin er þó rétt að byrja, nóg af stigum eftir í pottinum og verður spennandi að fylgjast með gangi mála.

Lið Hestvits/Árbakka unnu liðaplattann í fjórganginum en allir knapar voru í A úrslitum. Á myndinni eru þau Gústaf Ásgeir Hinriksson, Glódís Rún Sigurðardóttir, Jóhanna Margrét Snorradóttir, Pierre Sandsten Hoyos og Fredrica Fagerlund.

Næsta keppni í Meistaradeildinni er í kvöld, fimmtudaginn 8. febrúar, en þá verður keppt í slaktaumatölti í HorseDay höllinni á Ingólfshvoli. Það gefur auga leið að Jakob leiðir einstaklingskeppnina og mætir hann með sjö vetra hryssu, Hrefnu frá Fákshólum, sem er undan heimsmeistaranum í tölti Gloríu frá Skúfslæk og Hraunari frá Hrossahaga. Jakob er mikill keppnismaður og ætlar sér að gera vel í kvöld.

„Þetta er í fyrsta sinn sem hún keppir í slaktaumatölti. Ég held rosalega mikið upp á hana svo mig langar til að gera vel. Held að það eigi alveg að geta verið en markmiðið er að komast í úrslit,“ segir Jakob Svavar.

Jakob og Skarpur, hér á fallegu tölti, urðu nokkuð óvænt sigurvegarar. Næsta mót fer fram í kvöld, 8. febrúar, en þá mun Jakob mæta með sjö vetra hryssu úr eigin ræktun, Hrefnu frá Fákshólum.

Fyrsta tímabil 1. deildarinnar

Það bíða margir spenntir eftir því að leikar hefjist í 1. deildinni en þetta er fyrsta árið sem boðið er upp á þennan valkost. Deildinni er ætlað að koma á milli Áhugamannadeildarinnar og Meistaradeildarinnar sem báðar hafa notið mikilla vinsælda. Fyrsta mót hennar er 23. febrúar í Samskipahöllinni í Kópavogi og er undirbúningur í fullum gangi bæði hjá liðum og mótshöldurum.

„Það var mikill áhugi á deildinni en fleiri lið sóttu um en komust að. Það vantaði greinilega vettvang fyrir ákveðinn hóp knapa á höfuðborgarsvæðinu og suðvesturhorninu og gleðjumst við yfir áhuganum. Áhugamannadeildin stækkaði líka með tilkomu þessarar deildar en núna eiga líka kannski fleiri erindi í þá deild. Það var orðið pínu misskipt og komin smá gjá á milli liða en þessi nýja deild hefur kannski komið meira jafnvægi á áhugamannadeildina,“ segir Garðar Hólm Birgisson, formaður fyrstu deildarinnar í hestaíþróttum.

Nýr formaður kjörinn
Fréttir 23. febrúar 2024

Nýr formaður kjörinn

Hjörtur Bergmann Jónsson var kjörinn formaður deildar skógarbænda á fundi deilda...

Sex minkabú eftir á landinu
Fréttir 23. febrúar 2024

Sex minkabú eftir á landinu

Björn Harðarson, bóndi í Holti í Flóa, hefur tekið við sem formaður deildar loðd...

Eðlilegur blóðhagur þrátt fyrir blóðtöku
Fréttir 23. febrúar 2024

Eðlilegur blóðhagur þrátt fyrir blóðtöku

Íslenskar blóðmerar áttu auðvelt með að halda uppi eðlilegum blóðhag þrátt fyrir...

Áhersla á greiðslumarkið
Fréttir 22. febrúar 2024

Áhersla á greiðslumarkið

Á deildarfundi sauðfjárbænda hjá Bændasamtökum Íslands var samþykkt nær samhljóð...

Nú þarf að láta verkin tala
Fréttir 22. febrúar 2024

Nú þarf að láta verkin tala

Halldóra Hauksdóttir verður áfram formaður búgreinadeildar eggjabænda. Meðstjórn...

Misræmi milli framleiðslu og greiðslumarkseignar
Fréttir 22. febrúar 2024

Misræmi milli framleiðslu og greiðslumarkseignar

Tveir mjólkurframleiðendur uppfylltu ekki yfir 200.000 lítra af greiðslumarki í ...

Formannsslagur í vændum
Fréttir 22. febrúar 2024

Formannsslagur í vændum

Gunnar Þorgeirsson og Trausti Hjálmarsson hafa gefið kost á sér í embætti forman...

Betri afkoma í garðyrkju
Fréttir 22. febrúar 2024

Betri afkoma í garðyrkju

Afkoma ylræktenda fer batnandi en útiræktenda versnandi.