Sextán stöðvar komnar upp undir merkjum Hleðslu í hlaði

Þátttakendum í verkefninu Hleðsla í hlaði fer smám saman fjölgandi. Verkefnið var sett á laggirnar í upphafi árs 2017 með það markmið að fjölga hleðslustöðvum fyrir rafbíla i sveitum landsins. 

 

Í dag eru 16 félagar innan Hey Iceland og Bændasamtaka Íslands búnir að setja upp hleðslustöðvar og eru tilbúnir að þjónusta ökumenn á rafmagnsbílum, þar af 14 gististaðir.  

 

Að sögn Berglindar Viktorsdóttur hjá Hey Iceland geta félagar í BÍ og Félagi ferðaþjónustubænda sótt um 50.000 kr. styrk í verkefnið sem þeir fá þegar stöðin er komin í gagnið. Þá býðst stærri gistiheimilum og hótelum að sækja um styrk í Orkusjóð, en sá styrkur getur numið allt að 50% af áætluðum kostnaði við uppsetningu á hleðslustöð. Rafrænar umsóknir sendist um þjónustugátt af vef Orkustofnunar, www.os.is. Nánari upplýsingar um styrki Orkusjóðs er að finna á vef Orkustofnunar en umsóknarfrestur er til 15. ágúst næstkomandi. 

 

Ekki eftir neinu að bíða

 

Ljóst er að mjög gott tækifæri er fyrir bændur í ferðaþjónustu að skapa sér samkeppnisforskot með því að setja upp hleðslustöðvar um þessar mundir. 

 

„Það þarf að þétta net hleðslu­stöðva um land allt til að greiða aðgang þeirra sem keyra um á rafmagnsbílum. Eftir því sem rafbílum fjölgar á vegum landsins þá verða tækifærin fleiri fyrir þá ferðaþjónustuaðila sem bjóða viðskiptavinum að hlaða bílinn yfir nótt eða að staldra við í styttri tíma.  Það er ljóst að tækifærin liggja í loftinu og eru félagar Hey Iceland og Bændasamtakanna hvattir til að kynna sér málið betur og nýta sér þá styrki sem í boði eru þessa dagana,“ segir Berglind.

 

Kort og upplýsingar á vefnum

 

Upplýsingar um Hleðslu í hlaði og þá staði sem bjóða upp á rafhleðslu er að finna á vef Bændasamtakanna, bondi.is. Allnokkrir hleðslustaðir eru komnir á kortið á vefsíðunni plugshare.com þar sem rafbílanotendur fá upplýsingar um hleðslukosti. Á vefsíðu Hey Iceland, heyiceland.is, má finna alla gististaði innan þeirra vébanda sem eru með hleðslustöðvar fyrir rafbíla.