Fjölbreyttur hrútakostur með verndandi arfgerðir
Von er á nýrri prentaðri Hrútaskrá 16. nóvember, þar sem sauðfjárbændum verður kynntur sá hópur sæðingastöðvahrúta sem er í boði í vetur. Hrútum fjölgar úr 49 í 55 frá síðasta ári og þar af eru 44 nýir hrútar.
Að sögn Eyþórs Einarssonar, ráðunautar hjá Ráðgjafarmiðstöð landbúnaðarins (RML), verða lambhrútar áfram í aðalhlutverki en þeir verða 36 talsins. „Hér er áherslan áfram sú að innleiða verndandi arfgerðir gegn riðuveiki hratt og vel en reyna að sporna gegn óæskilegri aukn i ngu skyldleikaræktar með því að hafa hröð ættliðaskipti og hóflega notkun á hverjum hrúti. Erfðahlutdeild Gimsteins 21-899 og Gullmola 22-902 lækkar talsvert á milli ára í hrútakostinum en sem dæmi var samanlögð erfðahlutdeild þessara kappa í arfhreinu ARR-hrútunum í fyrra rúmlega 25% en verður í kringum 15% í ár að jafnaði,“ segir hann.
Flestir með ARR-arfgerðina
„Megnið af sæðingastöðva- hrútunum, eða 46 þeirra, bera ARR- arfgerðina og þar af 13 sem eru arfhreinir fyrir hinni verndandi arfgerð og er það nánast tvöföldun í fjölda arfhreinna ARR-hrúta milli ára. Meira úrval en áður er af reyndum ARR-hrútum. Teknir voru fimm hyrndir veturgamlir hrútar og einn kollóttur sem allir hafa sýnt góðan eða framúrskarandi árangur sem lambafeður. Þá eru sjö ARR-hrútar sem hefja nú sinn annan vetur á stöð,“ heldur Eyþór áfram.
Hann útskýrir að mórauðir hrútar verði nú í boði í fyrsta sinn sem bera ARR-arfgerðina, bæði hyrndur og kollóttur hrútur og jafnframt sé í fyrsta sinn í boði feldhrútur með þessa verndandi genasamsætu. Hann segir að nýr arfhreinn hrútur með T137-arfgerðina hafi verið tekinn inn, sem kemur frá Sveinsstöðum, en alls verði sex hrútar sem bera þessa arfgerð. Þá séu tíu hrútar með AHQ-arfgerðina og fimm hrútar með C151-arfgerðina.
Tveir feldhrútar og tveir forystuhrútar
Þá hafa tveir nýir feldhrútar verið teknir í hóp stöðvahrúta og tveir nýir forystuhrútar. Eyþór segir að þegar á heildina sé litið megi segja að framboðið á sæðingastöðvunum sé bæði fjölbreyttara og öflugra en á síðasta ári.
Stefnt er að útgáfu Hrútaskrárinnar á vefnum eftir næstu helgi og verður hún aðgengileg hjá RML, Búnaðarsamtökum Vesturlands og Búnaðarsambandi Suðurlands. Eftir útkomu prentuðu útgáfunnar verður henni fylgt eftir með fundum í samstarfi við búnaðarsamböndin víðs vegar um landið þar sem ráðunautar frá RML kynna hrútakostinn.
