Vinsamlegast athugið að þetta efni er eldra en 1 árs.
Ford Mustang Mach-ESR AWD.
Ford Mustang Mach-ESR AWD.
Mynd / HLJ
Á faglegum nótum 6. apríl 2022

Ford Mustang fjórhjóladrifinn, 100% rafmagnsbíll

Höfundur: Hjörtur L. Jónsson - liklegur@internet.is

Ford Mustang hefur verið þekkt vörumerki síðan 1961 þegar fyrsti prufubíllinn var framleiddur, en 1965 var byrjunin á gullaldarárum Mustang og seldust yfir 2 milljónir Mustang bíla á árunum 1965 til 1969. Metsala var 1966 þegar 607.568 Mustang bílar voru seldir á einu ári.

Nú er Ford komið með nýjan 100% rafmagnsknúinn fjórhjóla­drifinn Mustang sem hægt er að fá í fimm mismunandi útfærslum. Ódýrasti Mustang Mach-E er á verði frá 6.890.000 og sá dýrasti er Mach-E GT LR, sem er 487 hestöfl og kostar frá 10.990.000.

Þegar mælaborðið segir að 79 km séu eftir á rafhlöðu kemur viðvörun og áminning um að fara að hlaða bílinn.

Prófaði Mustang Mach-E SR AWD

Mustanginn sem var prófaður er sagður vera 269 hestöfl, á að geta farið úr kyrrstöðu í 100 á 5,6 sek., fjórhjóladrifinn með 75kWh, en hægt er að fá stærri rafhlöður, eða 98 kWh, sem eiga að koma bílnum í allt að 610 km við bestu skilyrði. Uppgefin drægni á prufubíl er um 400 km. Mustang er þannig útbúinn að þegar maður setur í gang mælir hann hitann úti og gefur þá upp drægnina miðað við hitastig við gangsetningu sem var 358 km, í mínu tilfelli í tveggja stiga hita.

Fyrri daginn keyrði ég bílinn um 200 km og taldi rafhlaðan tiltölulega rétt niður í samræmi við ekna kílómetra.

Seinni dagurinn var kaldari og líka verra færi og taldi mælirinn heldur hraðar niður. Eknir voru um 80 km, en rafhlöðumælirinn taldi nálægt 100. Taka skal fram að bíllinn var kaldur og ekki í hleðslu yfir nóttina, en hleðslan hitar rafhlöðuna.

Á gamla Mustang var oft kíkt á 8 strokka vélina, en í þessum er lítið farangursrými.

Ekki skemmtilegt að prófa bíl á skemmdu og holóttu slitlagi

Ástand vega hér í Reykjavík er þannig að sumar götur er vart keyrandi vegna holuskemmda. Smæstu holurnar í Reykjavík voru verri fyrir fjöðrunina á bílnum en holótti malarvegurinn heim að sveitabænum í Kjósinni sem ég keyrði. Ég var ekkert að hlífa bílnum fyrir holunum þar, vitandi að ég væri á bíl sem var yfir tvö tonn og ekkert varadekk og því í hættu á að höggva dekk í holu. Holur í hefðbundnum malarvegum eru mun hættuminni en malbiksholur með sínar hvössu brúnir sem þarf að varast mun meir á þyngri bílum. Á þeim vegum sem malbik var óskemmt var virkilega ljúft að keyra bílinn. Eins og alla bíla sem ég prófa þá hávaðamældi ég hann á 90 km hraða og kom Mustanginn ágætlega út í mælingunni, var 67,8 db og það á vetrardekkjum.

Bremsudælurnar eru næstum eins stórar og í vörubíl, en þær virka vel.

Fjórhjóladrifið virkaði vel í hálku og bremsur líka

Bíllinn er fljótur að hitna að innan og gott að hafa hita í stýrinu. Almennt eru aksturstölvur í nútímabílum flóknar fyrir mér, en í þessum bíl fannst mér ég vera nokkuð laginn við að læra á það sem ég var að leita eftir.

Bíllinn er með mikið af ýmiss konar öryggisbúnaði og þægindum, svo sem upphitaða framrúðu, akreinalesara, árekstrarvara, nema sem skynjar gangandi vegfarendur, blindhornsvara og ýmislegt fleira. Á nokkrum stöðum þar sem ég ók var mikil hálka og fannst mér fjórhjóladrifið skila bílnum vel áfram. Hann var fljótur að ná hraða, en vitandi af miklum þunga bílsins þá fannst mér hann bremsa óvenju vel miðað við skriðþunga og bremsaði nánast alltaf beint í hálkunni.

Gott verð miðað við það sem í bílnum er

Farangursrýmið er gott, en geymslu­rými er bæði að framan og aftan. Að vísu frekar lítið að framan sem tekur ekki nema tvo til þrjá innkaupapoka.

Sætin eru góð, bæði fram- og aftursæti, en þegar ég settist í aftursætið minntist ég aftursætanna í gamla 1966 Mustang sem voru einn helsti ókostur þeirra bíla og ekki góð fyrir lengri keyrslur. Þegar ég bar saman það sem í bílnum er og verðið þá finnst mér ekki mikið verð fyrir bílinn, 7.990.000. Samt hefði ég viljað sjá varadekk. Eins að maður þurfi ekki að muna að kveikja ljósin í hvert skipti sem maður leggur upp í ökuferð til að fá ljósin aftan á bílnum til að vera löglegur í umferðinni. Bíll sem er 2.086 kg er í mikilli hættu á að höggva dekk í færð eins og verið hefur að undanförnu. Þar sem að dekkin eru af stærðinni 225/55/19 er ekki nema um 12 cm fjöðrun sem maður fær út úr hjólbarðanum.

Fannst það ókostur að þurfa alltaf að muna að kveikja ljósin í hvert sinn sem ég fór af stað til að fá afturljósin á.

Helstu mál og upplýsingar:

Þyngd 2.086 kg
Hæð 1.624 mm
Breidd 1.881mm
Lengd 4.713 0mm

„Spjallað“ við kýr
Á faglegum nótum 9. janúar 2023

„Spjallað“ við kýr

Atferli, hegðun, útlit og ástand nautgripa getur gefið gríðarlega mikilvægar upp...

Skógarbændur og Bændasamtök Íslands
Á faglegum nótum 5. janúar 2023

Skógarbændur og Bændasamtök Íslands

Á aðalfundi Landssambands skógareigenda (LSE) sem haldinn var í Borgarnesi í maí...

Lífræn framleiðsla – nú er lag
Á faglegum nótum 5. janúar 2023

Lífræn framleiðsla – nú er lag

Á undanförnum árum hefur VOR látið til sín taka með ýmsum hætti til að hvetja ti...

Eitur á alltaf að vera síðasta úrræðið
Á faglegum nótum 3. janúar 2023

Eitur á alltaf að vera síðasta úrræðið

Meindýr eru skaðvaldar í garð- og skógrækt og óvelkomnir gestir sem flestir vild...

Ýmsir vankantar við smíði nýju norrænu næringarráðanna
Á faglegum nótum 2. janúar 2023

Ýmsir vankantar við smíði nýju norrænu næringarráðanna

Vinna við norrænu næringarráðin (NNR), sem Norræna ráðherra­nefndin heldur utan ...

Um niðurstöður lambadóma haustið 2022
Á faglegum nótum 30. desember 2022

Um niðurstöður lambadóma haustið 2022

Í heildina var útkoma lamba í haust góð. Meðalfallþungi á landinu var 16,6 kg og...

Lífrænn úrgangur: höfuðverkur eða tækifæri?
Á faglegum nótum 28. desember 2022

Lífrænn úrgangur: höfuðverkur eða tækifæri?

Hér á landi fellur til gríðarlegt magn af lífrænum úrgangi á öllum stigum samfél...

Skýrsluhald – heimarétt WorldFengs
Á faglegum nótum 27. desember 2022

Skýrsluhald – heimarétt WorldFengs

Nú þegar líður að áramótum og allir eru búnir að skila haustskýrslu til matvælar...