Verð heldur áfram að hækka

Á tilboðsmarkaði með greiðslumark mjólkur 2. nóvember hélt jafnvægisverð áfram að hækka frá fyrri mörkuðum og var við opnun tilboða komið í 300 krónur á lítrann, sem er 30 krónum hærra en á síðasta markaði í september.

Jafnvægisverðið hefur ekki verið jafnhátt síðan í nóvember 2023.

Fjögur gild sölutilboð bárust nú og fækkar um þrjú frá síðasta markaði. Hins vegar var talsverð aukning í magni lítra sem í boði voru, eða alls 563.487 lítrar samanborið við 379.072 lítra á septembermarkaðnum.

Kauptilboðum fækkaði líka úr 89 í 59, en alls var óskað eftir 2.801.000 lítrum núna samanborið við 3.985.000 lítra á septembermarkaðnum.

Seljendur sem lögðu fram tilboð á jafnvægisverði eða lægra voru þrír og selja 100% af sínu framboðna magni. Kaupendur með tilboð á jafnvægisverði eða hærra voru 13 talsins og fá 69% af því magni sem sóst var eftir.

Af kauptilboðum er einn aðili sem fær úthlutað úr forgangspotti nýliða.