Markmið verkefnisins er að stöðva viðvarandi fólksfækkun
Byggðastofnun hefur úthlutað rúmlega 170 milljónum króna í verkefnastyrki til Brothættra byggða á undanförnum árum. Markmið verkefnisins er að stöðva viðvarandi fólksfækkun í smærri byggðarkjörnum og í sveitum landsins.
Byggðalög sem flokkast undir Brothættar byggðir og hlotið hafa styrk eru Árneshreppur á Ströndum, Bíldudælur, Borgarfjörður eystri, Breiðdalshreppur, Grímsey, Hrísey, Raufarhöfn, Skaftárhreppur, Þingeyri og Öxarfjörður.
Margvísleg verkefni
Hátt á annað hundrað verkefni hafa hlotið styrki að heildarupphæð 170.300.000 króna. Verkefnin sem hafa fengið styrki eru fjölbreytt og segja má að þar sé að finna eitthvað fyrir alla.
Dæmi um verkefni sem fengið hafa styrk eru uppsetning á frisbígolfvelli í Grímsey, skútlægi í Norðurfirði, uppbygging tjaldsvæðis og skógræktar í Vesturbyggð, þjálfun nýliða í Golfklúbbi Bíldudals, matvælavinnsla beint frá býli og Strandminjasafn að Hnausum í Skaftárhreppi svo dæmi séu nefnd.
Skoða má yfirlit yfir allar úthlutanirnar á heimasíðu Byggðastofnunar undir Brothættar byggðir.
Frisbígolfvöllur í Grímsey
Umsækjandi er Kiwanisklúbburinn Grímur í Grímsey. Frisbígolf nýtur sívaxandi vinsælda hér á landi og hafa Kiwanis-félagar í Grímsey áhuga á því að útbúa nyrsta frisbígolfvöll á Íslandi. Hugmyndin er að fá sérfræðinga frá Fuzz til að koma og veita ráðgjöf við hönnun og gera tilboð til að hægt verði að koma hugmyndinni í framkvæmd sem fyrst. Tillagan er að hanna völlinn þannig að síðasta karfan verði yfir heimskautsbaug og með því má áætla að völlurinn komi til með að vekja áhuga hjá nýjum markhóp að koma og heimsækja eyjuna og kemur það þá til með að styrkja og efla ferðaþjónustu í eyjunni. Völlurinn er ekki síður hugsaður fyrir heimamenn sem fellur vel að markmiði um samheldið og þróttmikið samfélag. Einnig fellur allt verkefnið vel að starfsmarkmiði um að sérstaða Grímseyjar verði betur nýtt til markaðssetningar. Sótt er um styrk fyrir hönnunar-, efnis- og ferðakostnaði.
Verkefninu var úthlutað 1.800.000 krónur.
Skútulægi í Norðurfirði
Verkefnið snýr að því að setja út átta legufæri sem skútur geta lagst við og bjóða þannig upp á nýja þjónustu við skútusiglingafólk sem kemur í Norðurfjörð. Hvert legufæri er hannað á þann hátt að skútur allt að 50 fetum geta á öruggan hátt legið þar og skipverjar geta farið í land og skilið bátinn eftir. Hvert legufæri samanstendur af lóði sem situr á botninum, taug frá lóðinu í belg og tveimur grennri tógum sem báturinn er bundinn við. Baujurnar verða staðsettar útaf höfninni í Norðurfirði á um 10 til 12 metra dýpi. Þjónustan yrði auglýst á vefsvæði Cruicing Association, sem eru alþjóðleg samtök skútusiglingafólks með höfuðstöðvar í London. Verkefnið er áhugavert og góð viðbót við skútumenningu staðarins ásamt því að það styrkir ferðaþjónustu á svæðinu. Verkefnið er umhverfisvænt og með tilkomu þess minnkar skaði á hafsbotni og lífríki þar vegna akkera. Verkefnisstjórnin vill koma þeim tilmælum á framfæri við umsækjanda að skoða möguleika á að setja staðsetningarmerki á legufærin.
Verkefninu var úthlutað 1.000.000 krónur.
Þjálfun nýliða í Golfklúbbi Bíldudals
Sótt er um styrk til nýliðadaga. Golfklúbburinn á í vök að verjast m.a vegna hækkandi aldurs klúbbfélaga. Klúbburinn telur um 30 félaga og er u.þ.b. helmingur ellilífeyrisþega. Vegna óhagstæðrar aldurssamsetningar hefur félagsgjald verið jafnað, þ.e. ellilífeyrisþegar og öryrkjar fá ekki lengur afslátt á ársgjaldi. Tilgangur verkefnisins er að fjölga félögum og fá unglinga til liðs við klúbbinn til iðkunar á golfíþróttinni á svæðinu. Fenginn verður golfkennari með PGA réttindi til umsjónar með einu námskeiði sem verður hluti nýliðadaga. Einnig munu eldri og reyndari félagar sinna kynningu á íþróttinni.
Verkefninu var úthlutað 300.000 krónur.
Markmiðið að draga úr fólksfjölgun
Meginmarkmið verkefnisins Brothættar byggðir er að stöðva viðvarandi fólksfækkun í smærri byggðarkjörnum og í sveitum landsins. Verkefnið miðar að víðtæku samráði og því að virkja þekkingu og getu íbúa byggðarlaga til að móta framtíðarsýn, markmið og lausnir.
Verkefnið er ætlað byggðarlögum sem glímt hafa við viðvarandi fólksfækkun, fækkun atvinnutækifæra og það að atvinnulíf og þjónusta hafa veikst. Staða byggðarlaga sem til greina koma til þátttöku er metin á hlutlægan hátt með skilgreindum mælikvörðum. Mælikvarðarnir taka meðal annars mið af lýðfræðilegum þáttum, fjarlægð frá höfuðborgarsvæðinu, stærð atvinnusóknarsvæða og fjárhagslegri stöðu sveitarfélags.
