Útvarp Bændablaðið: Samruni Arla og DMK gefur möguleika á gríðarlegri hagræðingu
„Kannski sýnir þessi samruni hversu gríðarlega stærðarhagkvæmni er í söfnun og vinnslu mjólkur,“ segir Erna Bjarnadóttir í þriðja þætti Útvarps Bændablaðsins. Margrét Gísladóttir, framkvæmdastjóri SAFL, segir samstarf og sameiningar aukast í Evrópu og markmiðið sé alltaf að auka samkeppnishæfni, auka seiglu og viðnámsþrótt landbúnaðarins.
„Þessi samruni er það stór að hann þarf að fara í gegnum samþykktarferli hjá samkeppniseftirliti Evrópusambandsins,“ segir Erna. „Þarna skapast enn frekari möguleikar til hagræðingar heldur en þegar eru, við vitum til dæmis að jafnvel heilu mjólkursamlögin eru að framleiða eina eða örfáar vörur á meðan Mjólkursamsalan hér á landi, sem er með fjórar móttökustöðvar og starfar í frekar litlum einingum, er með hundruð vörunúmera. Við getum því rétt ímyndað okkur hvaða möguleikar eru á hagræðingu þarna úti í krafti hagkvæmni stærðar. Um leið sjáum við hversu fráleitur málflutningur það er að halda því fram að bændur geti náð meiri árangri með því að basla einir og sér eða í litlum einingum.“
Erna segir að sameinað félag yrði samkeppnisaðili Mjólkursamsölunnar sem sé í samkeppni um innflutning á mjólkurvörum.
„En síðan er MS líka að flytja út bæði mjólkurduft og skyr þar sem mestu verðmætin eru fyrir okkur. Salan á fituhluta mjólkur er um það bil sautján milljónum lítra meiri en salan á próteingrunni og við þurfum að gera verðmæti úr þessum mismuni. Við samruna Arla og DMK verður til risastór aðili sem mögulega fer að framleiða skyr á enn lægra verði en hingað til hefur verið gert. Þá gæti orðið enn erfiðara fyrir okkur að sækja verðmæti fyrir íslenska bændur úr mismuninum sem ég nefndi.“
Erna segir að sameiningin kalli kannski ekki á nein sérstök viðbrögð sem stendur að öðru leyti en því að það þurfi að fylgjast með framvindu málsins.
Rekstrareiningar leitast við að stækka
Margrét segir að það sé yfirlýst stefna víða í Evrópu, til dæmis í Noregi, að til staðar séu burðugar rekstrareiningar og þróunin sé sú að til þess að rekstrareining sé burðug þá leitist hún við að stækka. „Fyrirtæki víða um Evrópu eru að vinna meira saman og sameinast og markmiðið er alltaf það sama og við höfum verið að tala fyrir hér á landi, að auka samkeppnishæfni, auka seiglu og viðnámsþrótt landbúnaðarins, sem eru kannski stærstu áskoranirnar í Evrópu núna, og búa til fjárhagslegt svigrúm til að efla nýsköpun og framþróun í þessari atvinnugrein. Samrunar eru ein leið til þess að ná þessu fram. Við munum örugglega sjá fleiri fréttir af samruna á borð við þann sem við heyrum nú fréttir af hjá Arla og DMK. Við höfum þegar séð tilkynningar um vilja fyrirtækja í landbúnaðarstarfsemi til þess að sameinast og sumir samrunar eru þegar til umfjöllunar hjá samkeppniseftirliti ESB.“
