Vinsamlegast athugið að þetta efni er eldra en 5 ára.
Kastalinn í Ósaka
Fræðsluhornið 1. júní 2016

Kastalinn í Ósaka

Höfundur: Vilmundur Hansen

Ósaka og nágrenni er annað fjölmennasta þéttbýli Japan með tæplega 20 milljón íbúum. Borgin er staðsett við Ósakaflóa og í borginni er að finna tilkomumikinn kastala sem var reistur í sinni upphaflegu mynd 1583.

Kastalinn og umhverfi hans hefur tekið miklum breytingum í aldanna rás. Byggt hefur verið við hann og garðinum breytt í almenningsgarð.

Kastalinn var upphaflega hernaðarmusteri og staðsettur á rúmlega eins ferkílómetra svæði á lítilli hæð, sem er að mestu manngerð. Hann stendur við Yodogawa-ána í Kyobashi-héraði og umhverfis hann er hlaðinn virkisveggur úr tilhöggnu graníti.

Ekkert var til sparað við byggingu kastalans sem stendur á háum stalli úr hlöðnu grjóti til að verjast árásum.

Handhöggnir grjóthnullungar

Virkisveggurinn umhverfis kastalann er stórkostleg sjón og ótrúlegt til þess að hugsa að vegurinn hafi verið hlaðinn með handafli.

Grjótið í hleðslunni er höggvið til með hamri og meitli og minnstu steinarnir hnullungar að stærð og þaðan af stærri. Veggurinn er um þrjátíu metra hár og tólf kílómetrar að lengd.

Grjótið í virkisveggnum var í mörgum tilfellum flutt langt að og þrátt fyrir stærð þess kemur talsvert af því frá eyjum í Ósakaflóa. Sé vel að gáð má finna merkingar steinsmiðanna sem hjuggu grjótið í hleðslurnar meitlað í hana hér og þar.

Þegar gengið er inn að kastalanum er farið um stórar dyr sem hægt er að loka með gegnheilli og járnstyrktri timburhurð sem er um fjörutíu sentímetra þykk.

Kastalinn er fimm hæðir séður utan frá en átta hæðir að innan þar sem þrjár fyrstu hæðirnar eru inni í grjóthleðslunni sem hann stendur á.

Stallurinn reistur af 60 þúsund manns á einu og hálfu ári

Sagt er að það hafi tekið 60.000 manns eitt og hálft ár að reisa stallinn sem kastalinn stendur á og hýsir þrjár neðstu hæðirnar.

Í dag er kastalinn safn þar sem eru til sýnis gamlir hermannabúningar sem oft eru ærið skrautlegir, málverk og bókrollur. Auk þess sem sögu kastalans eru gerð mjög góð skil.

Umhverfis kastalana er stór garður sem er annar stærsti almenningsgarðurinn í Ósaka og þar eru auk kastalans íþróttavöllur, opinn tónleikastaður og leikhús og fallega hannað svæði umhverfis litla tjörn.

Í garðinum eru um 600 kirsuberjatré og 1.250 japönsk apríkósutré sem flokka til 95 mismunandi yrkja auk fjölda haustrauðra lauftrjáa.

Sameiningartákn sem var brennt til grunna

Kastalinn er eitt af frægustu mannvirkjum í Japan og var sameiningartákn þjóðarinnar á seinnihluta sextándu aldar og í upphafi þeirrar sautjándu. Búið var í kastalanum frá 1583 til 1868 en þá féll hann í hendur andstæðinga keisaraveldisins og var nánast brenndur til grunna.

Veturinn 1614 var mikil orrusta við kastalann en íbúum hans tókst að verja hann þrátt fyrir að tvö hundruð þúsund manna herinn sem réðist að kastalanum væri þrisvar sinnum fjölmennari en verjendur hans. Þrátt fyrir að virkisveggir kastalans væru öflugir skemmdust þeir talsvert í orrustunni og voru styrktir enn frekar í kjölfar hennar.

Kastalinn féll nokkrum árum seinna eftir langt umsátur þar sem íbúar hans voru í orðsins fyllstu merkingu sveltir úr fylgsni sínu. Nýr stríðsherrann beið ekki boðanna. Hann endurbyggði og bætti við kastalabygginguna sem er að stórum hluta fyrirmynd kastalans sem stendur í dag.

Árið 1660 laust eldingu niður í púðurgeymslu kastalans sem sprakk með þeim afleiðingum að hann skemmdist talsvert. Fimm árum síðar laust eldingu aftur niður í kastalann en í þetta sinn í turn hennar sem brann til ösku í kjölfarið.

Að niðurlotum kominn

Um miðja nítjándu öldina var enn ein kastalabyggingin á staðnum nánast að hruni komin. Í þetta sinn vegna vanrækslu, og efnt var til almennra samskota meðal íbúa Ósaka til að endurreisa hana. Skömmu síðar, 1868, var kastalinn svo enn einu sinni brenndur til grunna.

Eftir það voru byggingarnar sem eftir stóðu og svæðið umhverfis þær teknar í þjónustu hersins og þar meðal annars framleidd stríðstól, byssur og sprengiefni. Frá 1870 til 1945 var þar hergagnageymsla japanska hersins en þeim var eytt við lok síðari heimsstyrjaldarinnar og öll hernaðarmannvirki fjarlægð úr garðinum.

Reistur í núverandi mynd í lok síðustu aldar

Í lok þriðja áratugs síðustu aldar hófst endurreisn kastalans á ný en hann skemmdist mikið í loftárásum Bandaríkjamanna á hernaðarmannvirkin umhverfis hann í seinni heimsstyrjöldinni.

Kastalinn í núverandi mynd var reistur á árunum 1995 til 1997. Ólíkt fyrri byggingum sem voru úr timbri er kastalinn nú gerður úr hvítri steinsteypu og bróderaður með gulli að hluta og með öllum nútímaþægindum. Til dæmis fara þeir sem heimsækja kastalann upp á efstu hæð með lyftu og ganga niður þegar þeir skoða hann að innan.

Frábært útsýni og sýning

Á efstu hæð kastalans er útsýnispallur í fimmtíu metra hæð með frábæru útsýni yfir borgina. Þaðan er gengið niður á sjöundu hæð sem hýsir sýningu á lífi íbúa kastalans og atburðum sem tengdust honum á þeim tíma sem hann var byggður.

Sjötta hæðin er lokuð almenningi en á fimmtu hæðinni er sýning sem helguð er orrustum sem tengjast kastalanum. Á fjórðu hæðinni er sýning á herklæðum og vopnum stríðsherranna sem ráðið hafa kastalanum í gegnum aldirnar. Þriðja hæðin er helguð módelum sem sýna kastalann á mismunandi tímaskeiðum og byggingarsögu hans. Þar er einnig lítil minjagripaverslun. Á annarri hæð má lesa sig til um sögu kastalans á veggspjöldum og skoða myndir. Inngangurinn með lyftu er á fyrstu hæðinni.
Bannað er að taka myndir inni í kastalanum og því banni er fylgt fast eftir.

Skammt frá Kyobashi-lestarstöðinni

Kastalinn er staðsettur rétt sunnan við Kyobashi-lestarstöðina og auðvelt að komast í hann frá henni. Lestarstöðin og svæðið umhverfis hana er nefnd eftir Kyobashi-brúnni sem liggur yfir ána Yodogawa sem áður var í þjóðleið frá Ósaka til Kyoto. 

Skylt efni: Japan | Osaka | ferðalög

John Deere 7R 350 autoPowr er dráttarvél ársins 2022
Fréttir 24. janúar 2022

John Deere 7R 350 autoPowr er dráttarvél ársins 2022

John Deere 7R 350 AutoPowr er dráttarvél ársins 2022 í opnum flokki að mati evró...

KFC fékk mest úthlutað
Fréttir 24. janúar 2022

KFC fékk mest úthlutað

Atvinnuvega- og nýsköpunar­ráðuneytið hefur birt niðurstöðu úthlutunar á tollkvó...

Kostnaður við að fjölga neyðarstöðvum í Vaðlaheiðargöngum yfir 10 milljónir króna
Fréttir 24. janúar 2022

Kostnaður við að fjölga neyðarstöðvum í Vaðlaheiðargöngum yfir 10 milljónir króna

Kostnaður við að setja upp nýjar neyðarstöðvar í Vaðlaheiða­r­göng­um nemur 10 t...

Markmið um að 12 mánaða börn fái leikskólapláss í Sveitarfélaginu Skagafirði
Fréttir 21. janúar 2022

Markmið um að 12 mánaða börn fái leikskólapláss í Sveitarfélaginu Skagafirði

Sveitarfélagið Skagafjörður hefur um nokkurt skeið unnið að því að koma til móts...

Gat á sjókví í Reyðarfirði
Fréttir 21. janúar 2022

Gat á sjókví í Reyðarfirði

Matvælastofnun barst tilkynning frá Löxum Fiskeldi fimmtudaginn 20. janúar um ga...

Skoða alla möguleika til að mæta mikilli eftirspurn eftir lóðum
Fréttir 20. janúar 2022

Skoða alla möguleika til að mæta mikilli eftirspurn eftir lóðum

„Við erum hvergi nærri hætt með okkar uppbyggingu, en stefnan er að íbúar í svei...

„Fyrir okkur öll“ er nýtt slagorð Rangárþings ytra
Fréttir 19. janúar 2022

„Fyrir okkur öll“ er nýtt slagorð Rangárþings ytra

Rangárþing ytra efndi nýlega til slagorðakeppnis um slagorð fyrir sveitarfélagið...

Mikilvægt skref í uppbyggingu Akureyrarflugvallar
Fréttir 19. janúar 2022

Mikilvægt skref í uppbyggingu Akureyrarflugvallar

Samningur um smíði á 1.100 fermetra viðbyggingu við Flug­stöðina á Akureyri var ...