Vinsamlegast athugið að þetta efni er eldra en 6 ára.
Matreiðslumeistarar á Grillinu. Denis Grbic, Kokkur ársins 2016, Sigurður Helgason yfirmatreiðslumeistari á Hótel Sögu og Bocuse d‘Or-fari 2015, Hinrik Örn Lárusson, matreiðslunemi ársins 2015 og Atli Þór Erlendsson Matreiðslumaður ársins 2015.
Matreiðslumeistarar á Grillinu. Denis Grbic, Kokkur ársins 2016, Sigurður Helgason yfirmatreiðslumeistari á Hótel Sögu og Bocuse d‘Or-fari 2015, Hinrik Örn Lárusson, matreiðslunemi ársins 2015 og Atli Þór Erlendsson Matreiðslumaður ársins 2015.
Mynd / TB
Fréttir 3. mars 2016

„Erum með besta veitingastaðinn á landinu“

Höfundur: smh / TB
Keppni um útnefninguna Kokkur ársins fór fram í Hörpu 13. febrúar síðastliðinn. Þá mættust í fimm manna úrslitum kokkar sem unnið höfðu sér þátttökurétt úr tíu manna keppni sem haldin var 8. febrúar. Denis Grbic, matreiðslumaður á Grillinu á Hótel Sögu, bar sigur úr býtum, en í öðru sæti var Hafsteinn Ólafsson á Nasa og þriðji varð Ari Þór Gunnarsson á Fiskifélaginu. Þetta er annað árið í röð sem matreiðslumeistari af Grillinu hlýtur nafnbótina, en í fyrra sigraði Atli Erlendsson.
 
Fyrirkomulagið á keppninni, sem áður hét Matreiðslumaður ársins, var að faglærðir matreiðslumenn sendu inn í keppnina uppskrift ásamt mynd af réttinum. Valnefnd skipuð fimm faglærðum dómurum völdu nafnlaust þær 10 uppskriftir sem þóttu lofa góðu þar sem mið er tekið af frumleika, nýtingu á hráefni og útliti réttar.
 
Lambið í leyndarkörfunni
 
Keppendur fengu fimm klukkustundir til að elda þriggja rétta matseðil sem samanstóð af forrétti, aðalrétti og eftirrétti. Daginn fyrir úrslitakeppnina var upplýst um hvaða hráefni væru í boði fyrir keppendur, þegar hulunni var svipt af svokallaðri leyndarkörfu. Þar kom í ljós að í forrétt skyldi notað langa, humar, og söl. Í aðalrétt yrði notaður lambahryggur og lambasíða. Í eftirrétt Omnom-súkkulaði, grænt epli og lakkrís. Að auki völdu keppendur sitt eigið grænmeti, mjólkurvörur og þurrvörur. Keppendur skyldu mæta með eigin aðstoðarmann eða matreiðslunema, sem mætti vera 23 ára eða yngri á keppnisdag.
 
Félgagsskapur sigurvegara keppninnar
 
Það er Klúbbur matreiðslumeistara sem hefur veg og vanda að keppninni eins og áður og byggir á sterkri sögu og hefð. Fyrir keppnina var stofnaður félagsskapur sigurvegara keppninnar frá upphafi, en hópurinn fylgdi keppninni úr hlaði og tók virkan þátt í undirbúningi og framkvæmd. Yfirdómari keppninnar í ár var Sven Erik Renaa frá Noregi.
 
Samhliða keppnishaldinu var boðið til glæsilegs kvöldverðar þar sem Kokkalandsliðið sá um að matreiða fjögurra rétta máltíð sem borin var fram með ljúffengu víni, en talið er að um 200 manns hafi gætt sér á krásum landsliðsins.  /smh
 
„Erum með besta veitingastaðinn á landinu“
 
Með sigrinum í keppninni um Kokk ársins 2016 vann Denis Grbic sér þátttökurétt í keppni um besta norræna kokkinn sem fram fer í Danmörku í mars. Denis má því ekki slá slöku við æfingar næstu daga. Norræna keppnin er talin með erfiðari kokkakeppnum en síðustu ár hafa matreiðslumenn frá Norðurlöndunum notið mikillar velgengni á alþjóðavettvangi.
 
Denis Grbic,
Kokkur ársins 2016,
Denis byrjaði ungur að hafa áhuga á kokkamennsku og hann segist hafa fengið áhugann hjá foreldrum sínum. „Ég varði miklum tíma í eldhúsinu þegar ég var krakki. Mamma ætlaði alltaf að verða kokkur en þau áform fóru í bið þegar ég fæddist. Eftir grunnskólann fór ég að vinna við byggingarvinnu og lærði að verða múrari. Samhliða náminu vann ég á skyndibitastað en þegar kreppan skall á hætti ég hins vegar í múrverkinu, rétt kominn að sveinsprófinu, og skellti mér í Menntaskólann í Kópavogi í matreiðsluna. Ég fór á samning hjá Hótel Sögu og kláraði sveinsprófið árið 2013. Þá hóf ég störf á Dill og var þar um tíma þar til mér bauðst starf á Grillinu þar sem ég er nú. Ég er því búinn að vera sjö ár í faginu,“ segir Denis. 
 
Stíf keppni í Danmörku
 
Norræna keppnin um kokk ársins á Norðurlöndunum verður haldin í Herning í Danmörku í mars. „Við förum út 6. mars, keppum og komum aftur heim 9. mars. Nú standa yfir æfingar en fyrirkomulagið er þannig að við fáum fjóra klukkutíma í undirbúning og þar til maður skilar forrétti, þar á eftir klukkutíma fyrir aðalrétt og loks 80 mínútur fyrir eftirréttinn. Ólíkt keppninni hér heima er ég einn á báti þar sem ég verð ekki með neinn aðstoðarmann,“ segir Denis en það var Hinrik Örn Lárusson, matreiðslunemi á Grillinu, sem var honum innan handar í Hörpunni á dögunum. Á sama tíma verður þjónakeppni og keppni yngri kokka í Herning. Annar fulltrúi úr Grillinu verður í þjónakeppninni en það er Thelma Björk Hlynsdóttir sem um þessar mundir er við störf á Michelin-staðnum Olo í Helsinki í Finnlandi.
 
Aðspurður um það hvaða þýðingu það hafi fyrir Grillið að vera með hvern verðlaunakokkinn á fætur öðrum í starfsliðinu segir Denis það ekkert vafamál. „Við erum með besta veitingastaðinn á landinu! Þetta er vissulega mjög góð auglýsing fyrir okkur og við finnum fyrir því. Það er fullbókað næstu 3–4 helgar og viðskiptavinahópurinn á örugglega eftir að stækka,“ segir Denis. Hann segist vera mikill aðdáandi norrænnar matargerðar og með það í huga henti samstarf við íslenska bændur mjög vel. „Við erum opnir fyrir öllu samstarfi við bændur. Á Íslandi er eitt flottasta hráefni sem býðst og við erum stoltir af því að geta boðið upp á það besta. Allt sem við fáum og bjóðum hér á Grillinu er í hæsta klassa.“ 
 
Var í hópi flóttamanna sem settust að á Íslandi
 
Denis fluttist hingað til lands með foreldrum sínum frá Króatíu árið 1996. „Við vorum í hópi flóttamanna sem settust að á Ísafirði. Ég var ellefu ára gamall og var strax settur í stíft íslenskunám sem gekk vel. Árin á Ísafirði voru frábær en eftir fjögur ár þar fluttum við suður. Pabbi minn er Serbi en mamma er Króati. Maður reynir að fara reglulega til Króatíu enda á maður þar ættingja og vini,“ segir Denis sem er fjölskyldumaður með konu og tveggja ára dóttur. Aðspurður um það sem er fram undan segir kokkur ársins að það sé að taka þátt í keppninni í Danmörku og síðan einfaldlega að mæta á vaktina á Grillinu. /TB

 

3 myndir:

Langflestir íbúar á höfuðborgarsvæðinu
Fréttir 8. febrúar 2023

Langflestir íbúar á höfuðborgarsvæðinu

Samkvæmt tölum Byggðastofnunar fyrir árið 2022 var íbúafjöldi landsins 376.248. ...

Samband neysluverðs og framleiðsluverðs í matvælum
Fréttir 8. febrúar 2023

Samband neysluverðs og framleiðsluverðs í matvælum

Bændur og hinn almenni neytandi hafa lengið staðið bökum saman við að tryggja sa...

Rannsakar skyggnar konur
Fréttir 7. febrúar 2023

Rannsakar skyggnar konur

Dr. Dalrún Kaldakvísl Eygerðardóttir sagnfræðingur rannsakar sögu skyggnra kvenn...

Of algengt að hestunum sé gefinn óþverri
Fréttir 6. febrúar 2023

Of algengt að hestunum sé gefinn óþverri

Margeir Ingólfsson og Sigríður Jóhanna Guðmundsdóttir, bændur á bænum Brú í Blás...

Tíu ára starfsafmæli
Fréttir 3. febrúar 2023

Tíu ára starfsafmæli

Tíu ár eru síðan Ráðgjafarmiðstöð landbúnaðarins (RML) var sett á laggirnar. Af ...

Innlend fóðurframleiðsla gæti nýtt jarðhita sem fer til spillis
Fréttir 3. febrúar 2023

Innlend fóðurframleiðsla gæti nýtt jarðhita sem fer til spillis

Fjárfestingafélag Þingeyinga hf. hefur unnið að skýrslu í samstarfi við verkfræð...

Markaðssetning utan hefðbundins sláturtíma
Fréttir 2. febrúar 2023

Markaðssetning utan hefðbundins sláturtíma

Nýlega var Sláturhúsi Vesturlands í Borgarnesi veittur styrkur úr markaðssjóði s...

Úrskurður MAST felldur úr gildi
Fréttir 1. febrúar 2023

Úrskurður MAST felldur úr gildi

Matvælaráðuneytið hefur fellt úr gildi úrskurð Matvælastofnunar sem hafði stöðva...