Vinsamlegast athugið að þetta efni er eldra en 3 ára.
WETLAND skarar fram úr í handverki og hönnun úr sauðfjárafurðum
Íslensk hönnun 17. janúar 2018

WETLAND skarar fram úr í handverki og hönnun úr sauðfjárafurðum

Á dögunum veitti Icelandic lamb nokkrum aðilum viðurkenningar sem skarað hafa fram úr í handverki og hönnun úr sauðfjárafurðum. Hönnunarmerkið WETLAND var í þeirra hópi, en það er hönnunarmerki sem framleiðir lífsstílsvörur undir norrænum áhrifum og sérhæfir sig í vörum úr íslensku lambaskinni.
 
Eigendur vörumerkisins WETLAND eru Sigríður Sunneva Vigfúsdóttir fatahönnuður, Elísabet Jónsdóttir, grafískur hönnuður, og Katrín Dóra Þorsteinsdóttir MBA, rekstrar- og viðskiptafræðingur.
 
Taskan Dimma úr smiðju WETLAND. 
 
Elísabet segir að WETLAND sé nýtt íslenskt hönnunarmerki sem framleiði vandaðar og stílhreinar lífsstílsvörur undir norrænum áhrifum og sérhæfir sig í hönnun á vörum úr íslensku lambaskinni eða svokölluðu mokkaskinni. „Snið eru einföld og klassísk þar sem innblásturs er leitað í fegurð og dulúð íslenskrar náttúru. Hráefni og hönnun haldast í hendur og mynda tímalausa vöru sem endist kynslóð fram af kynslóð,“ útskýrir Elísabet. 
 
Heiða Guðný Ásgeirsdóttir, sauðfjárbóndi á Ljótarstöðum, er hér í hlutverki fyrirsætu. Hér er hún  í slánni Móru.
 
Ullin og skinnið einstök hráefni
 
Auk WETLAND-samstarfsins eru Elísabet og Sigríður Sunneva með önnur verkefni í gangi. „Ég hef um áratugaskeið rekið hönnunarstúdíóið VOLKI, ásamt meðeiganda mínum, Olgu Hrafnsdóttur,“ segir Elísabet. „Þar hefur  fókusinn verið á  hönnun og framleiðslu á húsgögnum og munum fyrir heimilið úr íslenskri ull. Teppi og treflar eru helsta framleiðsluvaran okkar þar sem litir og geómetrísk mynstur ráða ríkjum.
 
Ég er mjög hrifin af hráefnum sem tengjast íslensku sauðkindinni okkar. Ullin okkar og skinnið eru einstök hráefni sem hefur óteljandi möguleika. Ég tel að hönnunarvörur úr þessum séríslensku hráefnum geti orðið mjög eftirsóknarverðar úti um allan heim.
 
Sunneva á vörumerkið SUNNEVA DESIGN, þar sem fókusinn er fyrst og fremst að sérsauma flíkur úr íslensku mokkaskinni. Hún byrjaði að framleiða undir því vörumerki árið 1996 og var Katrín um tíma framkvæmdastjóri hjá henni,“ segir Elísabet.
 
Fyrst og fremst áhersla á íslenska mokkaskinnnið
 
„Við Sunneva höfum áður unnið saman,“ segir Elísabet. „Hún frumsýndi línu á HönnunarMars 2015 þar sem hún notaði litríku ullarefnin frá VOLKI í bland með íslenska mokkaskinninu. Íslenska ullin og skinnið er stórkostlegt saman og er planið að gera meira af því að vinna með þessi hráefni saman í nýja vörumerkinu okkar, WETLAND.
 
Hjá WETLAND er áherslan fyrst og fremst á íslenska mokkaskinnið og þar koma Sunneva og Katrín sterkar inn. Sunneva hefur margra ára reynslu í hönnun yfirhafna úr íslensku skinni og Katrín hefur rekið eigið fyrirtæki þar sem hún framleiddi töskur úr leðri og skinni. Fyrsta vörulínan WETLAND samanstendur af treflum, slám og töskum úr þessu dásamlega hráefni.
 
Mitt hlutverk hjá WETLAND hefur fyrst og fremst tengst grafískri hönnun.
 
Við leggjum áherslu á sjálfbærni vörunnar, það er að lambaskinnið – sem er aðalhráefnið í línunni – er sjálfbært hráefni þar sem það er aukaafurð sem fellur til við lambakjötsframleiðslu. Okkur finnst mjög mikilvægt að fullnýta þetta frábæra hráefni sem við berum svo óendanlega mikla virðingu fyrir, með því að hanna úr því metnaðarfulla vörulínu.“  
 
Öll framleiðsla enn innanlands
 
Að sögn Elísabetar er öll framleiðslan enn á Íslandi. „Við viljum helst af öllu halda áfram að framleiða allt hér. Vörurnar eru saumaðar á litlum saumastofum á höfuðborgarsvæðinu og úti á landi.
 
Áhersla er lögð á að nýta hráefnið sem best, engu er hent. Við teljum að með vandaðri og sérstæðri hönnun næst fram glæsileg og einföld flík sem endist kynslóð fram af kynslóð, umhverfisvæn úr náttúrulegum efnum og hentar nútíma fagurkera sem vill lifa í góðri sátt við náttúruna.“
 
WETLAND-vörurnar er hægt að kaupa á netinu í gegnum vefsíðuna þeirra, wetland.is, en þar er einnig að finna upplýsingar um hönnunarmerkið og sýnishorn af hönnun þeirra og framleiðslu. 
 
Stjórnarsáttmáli nýrrar ríkisstjórnar: tryggja á fæðuöryggi á Íslandi
Fréttir 29. nóvember 2021

Stjórnarsáttmáli nýrrar ríkisstjórnar: tryggja á fæðuöryggi á Íslandi

Stjórnarsáttmáli nýrrar ríkisstjórnar Framsóknarflokks, Sjálfsstæðisflokks og Vi...

Ný hitaveita Hornafjarðar formlega tekin í notkun
Fréttir 29. nóvember 2021

Ný hitaveita Hornafjarðar formlega tekin í notkun

Hitaveita Hornafjarðar var tekin formlega í notkun fimmtudaginn 21. október en l...

Vinstri grænir stýra ráðuneyti matvæla, sjávarútvegs og landbúnaðar
Fréttir 27. nóvember 2021

Vinstri grænir stýra ráðuneyti matvæla, sjávarútvegs og landbúnaðar

Samkvæmt heimildum Bændablaðsins mun þingmaður Vinstri grænna vera með ráðuneyti...

Bitbein um áburðarnotkun
Fréttir 26. nóvember 2021

Bitbein um áburðarnotkun

Lífrænir bændur í Danmörku geta nýtt sér húsdýraáburð frá ólífrænum búum í meira...

Nær 36 milljónir íbúa ESB geta ekki kynt heimili sín sómasamlega
Fréttir 26. nóvember 2021

Nær 36 milljónir íbúa ESB geta ekki kynt heimili sín sómasamlega

Í síðasta Bændablaði var greint frá því að samkvæmt könnun sem kynnt var af Euro...

Kolefnissporið kortlagt
Fréttir 26. nóvember 2021

Kolefnissporið kortlagt

Skútustaðahreppur hefur samið við nýsköpunarfyrirtækið Greenfo um að kortleggja ...

Flestir bílaframleiðendur veðja á efnarafala fremur en rafhlöður í þung ökutæki
Fréttir 25. nóvember 2021

Flestir bílaframleiðendur veðja á efnarafala fremur en rafhlöður í þung ökutæki

Vetnisvæðing, sem nú er rekin áfram af mikilli ákefð hjá öllum stærstu iðnríkjum...

Rekstur vindorkugarða sagður brjóta á mannréttindum Sama
Fréttir 25. nóvember 2021

Rekstur vindorkugarða sagður brjóta á mannréttindum Sama

Norðmenn hafa upplifað spreng­ingu í uppsetningu vindorkustöðva á undanförnum ár...