Sebrafolald í fóstur hjá hryssu

Sebrahryssa kastaði nýlega folaldi í dýragarðinum í Álaborg. Upp kom óvenjulega staða þegar hryssan drapst daginn eftir og koma þurfti móðurlausu folaldinu í fóstur.

Starfsmenn dýragarðsins settu sig í samband við hestasamfélagið í nágrenninu og folaldið var flutt á hrossaræktarbú. Því heilsast vel.

Átti fyrsta daginn með móðurinni

Sunnudaginn 4. október kastaði sebrahryssa í dýragarðinum í Álaborg folaldi. Fæðingin tók 20 mínútur og folaldinu heilsast vel. Folaldið átti fyrstu klukkustundirnar með móðurinni, drakk og virtist hraust. Móðirin lést aftur á móti daginn eftir. Upp var komin óvenjuleg staða.

Starfsmönnum tókst að mjólka hryssuna og færa folaldinu þannig lífsnauðsynlega næringu úr fyrstu mjólkinni, sem inniheldur mikilvæg efni fyrir ónæmiskerfið.

Þeir brugðu svo á það ráð að leita á náðir hestasamfélagsins á svæðinu og freista þess að finna fóstru fyrir folaldið. Sú leit bar árangur og folaldið var flutt til hryssu sem nýlega hafði kastað á hrossaræktarbúi.

Samkvæmt upplýsingum frá starfsmanni dýragarðsins heilsast sebrafolaldinu vel. Staðan er metin dag frá degi af sérfræðingum dýragarðsins og hrossaræktendunum. Eins og sakir standa er framtíð folaldsins lofandi og starfsmenn krossa fingur. Enn hefur sú litla ekki fengið nafn.

Stærsta hrossategundin

Sebrafolaldið er af tegundinni Grévy (Equus grevyi), sem er stærsta núlifandi villta tegundin í hrossafjölskyldunni, sem einnig hefur að geyma hesta og asna. Tegundin lifir villt í Kenía og Eþíópíu. Af sebrategundum er Grévy sú hávaxnasta, með stór eyru sem minna á asnaeyru og fíngerðari rendur en aðrir sebrahestar, áberandi upprétt fax og grannleita snoppu. Grévy-sebrahestar borða gras, belgjurtir og kjamsa stundu á akasíutrjám.

Samfélög Grévy-sebrahesta byggja á feðraveldi og sterkum tengslum hryssa og afkvæma þeirra. Grévysebrahestar eru á lista yfir dýr í útrýmingarhættu í villtum heimkynnum sínum en ræktunarstarf í dýragörðum hefur gengið vel. Stofninn er talinn vera rúmlega 2.000 dýr.

Ekkert fer til spillis í dýragarðinum og ljónin í dýragarðinum fengu að gæða sér á hryssunni, hringrás lífsins heldur áfram.