Terraforming LIFE á leið í umhverfismat

– Tilraunastofa fyrir lífgasrannsóknir sett upp

Áburðar- og lífgasverksmiðja Terraforming LIFE, sem fyrirhugað er að reisa í Þorlákshöfn, er á leið í umhverfismat.

Verkefnið gengur út á að þróa nýja aðferð hér á Íslandi við áburðar- og lífgasframleiðslu úr lífrænum úrgangi, sem fellur til við fiskeldi á landi og í landbúnaði. Í áætlunum hefur verið gert ráð fyrir að verksmiðjan verði risin á næsta ári og framleiðsla hafin. Ef allar áætlanir ganga eftir, er gert ráð fyrir að verksmiðjan geti skilað þúsundum tonna af 90% þurri meltu og hafi næringarhlutfall sem henti sem áburður.

Um samstarfsverkefni er að ræða og eru Bændasamtök Íslands, First Water, Orkídea, Ölfus Cluster og færeyska ráðgjafarfyrirtækið SMJ aðilar að því.

Vonast eftir áliti HMS í vor

Að sögn Gyðu Pétursdóttur, verkefnastjóra Terraforming LIFE og tengiliðar landeldisdeildar hjá Bændasamtökum Íslands, hefur matsáætlun fyrir umhverfismat Terraforming LIFE verið skilað inn til Húsnæðis-, mannvirkja- og skiplagsstofnunar (HMS). „Matsáætlunin hefur verið unnin af EFLU fyrir hönd verkefnisins og lýsir því hvernig staðið verður að mati á umhverfisáhrifum verkefnisins.

Næstu mánuði tekur við lögbundið kynningar- og umsagnarferli. Gert er ráð fyrir að matsáætlunin verði auglýst opinberlega og að almenningur, hagaðilar og aðrir sem málið varðar fái tækifæri til að kynna sér áætlunina og koma á framfæri athugasemdum.

Að því loknu verður unnið að gerð umhverfismatsskýrslu í byrjun næsta árs sem einnig fer í lögbundið umsagnarferli áður en álit HMS liggur fyrir, sem við vonumst eftir að verði í vor,“ segir Gyða um ferlið fram undan.

Tilraunastofa um lífgasnýtni

Terraforming LIFE hefur sett upp tilraunaaðstöðu fyrir lífgasrannsóknir sem gerir mögulegt að rannsaka og meta mögulega nýtingarmöguleika á lífgasi miðað við ólíka lífræna hliðarstrauma, en það er aukaafurð úr áburðarframleiðsluferlinu. Að sögn Sigurðar Trausta Karvelssonar, yfirumsjónaraðila Terraforming LIFE og verkefnastjóra rannsókna og þróunar hjá First Water, er tilraunastofunni ætlað að styðja við rannsóknir á nýtingu fiskeldismykju úr landeldi til lífgasframleiðslu og auka þekkingu á því hvernig fiskeldismykja í bland við aðra hliðarstrauma getur stuðlað að framleiðslu endurnýjanlegrar orku og endurvinnslu næringarefna.

„Markmið rannsóknanna er að afla gagna um lífgasnýtni mismunandi hráefna og bæta skilning á því hvernig best megi nýta þau sem auðlind. Niðurstöðurnar munu nýtast við þróun framtíðarlausna fyrir lífgasframleiðslu á Íslandi og styðja við markmið um aukna hringrás lífrænna efna og næringarefna.

Sambærileg aðstaða hefur ekki verið fyrir hendi á Íslandi hingað til og því verður nú hægt að meta hvernig fiskeldismykja í bland við aðra hliðarstrauma, til dæmis svínamykju, nýtist til lífgasframleiðslu. Sú þekking mun styðja við frekari uppbyggingu lífgaslausna á Íslandi og er mikilvægt skref fyrir Terraforming LIFE-verkefnið,“ segir Sigurður Trausti.