Stefnt er að fullri kolefnisjöfnun sauðfjárræktar á Íslandi 2022

Samkvæmt skýrslu sem Umhverfisráðgjöf Íslands ehf. hefur unnið fyrir Landssamtök sauðfjárbænda er raunhæft að kolefnisjafna íslenska sauðfjárrækt að fullu.

 

Verkefnið var kynnt á opnum fundi í Bændahöllinni 26. október. Markmiði um fulla kolefnisjöfnun greinarinnar verður náð með samdrætti í losun og mótvægisaðgerðum, s.s. skógrækt, landgræðslu og endurheimt votlendis.

 

Í samræmi við samþykkt aðalfundar sauðfjárbænda

 

Svavar Halldórsson, fram­kvæmda­­stjóri Icelandic lamb og Markaðs­ráðs kindakjöts, kynnti verkefnið og sagði að skýrsla Umhverfis­ráðgjafar Íslands hafi verið unnin fyrir Landssamtök sauðfjárbænda í samræmi við stefnumótun sem samþykkt var á aðalfundi samtakanna 30.–31. mars 2017. Þar segir að stefna skuli að kolefnisjöfnun greinarinnar eins fljótt og kostur er. Hefur nú verið lögð fram aðgerðaráætlun til að ná þessum markmiðum á næstu fimm árum.

 

Undirbúningur á kolefnisjöfnun íslenskrar sauðfjárræktar hófst á vettvangi Landssamtaka sauðfjárbænda árið 2015. Í október 2016 kom út skýrsla sem bar yfirskriftina „Greining á losun gróðurhúsalofttegunda frá íslenskum landbúnaði“ eftir Jón Guðmundsson hjá Landbúnaðarháskóla Íslands. Á stjórnarfundi samtakanna 2. desember 2016 var framkvæmda­stjóra falið að vinna að aðgerðaráætlun í samvinnu við utanaðkomandi sérfræðinga og frumtilboð frá Umhverfisráðgjöf Íslands ehf. um kolefnisjöfnun sauðfjárræktarinnar á grundvelli fyrrnefndrar skýrslu. 

 

Stefán Gíslason, framkvæmda­stjóri Umhverfisráðgjafar Íslands ehf., kynnti síðan á fundinum í Bændahöllinni skýrslu um þessa vinnu sem ber heitið „Losun gróðurhúsalofttegunda frá sauðfjárbúum á Íslandi og aðgerðir til að draga úr losun.“ 

 

Stefnt að fullri kolefnisjöfnun árið 2022

 

Þar kemur fram að heildarlosun frá íslenskri sauðfjárrækt nemur um 291 þúsund tonni kolefnisígilda (CO2-ígilda) á ári. Losunin á hvert framleitt kg lambakjöts nemur 28,6 kg kolefnisígilda (CO2-ígilda). Er nú stefnt að því að fullri kolefnisjöfnun íslenskrar sauðfjárræktar verði náð árið 2022. Einnig er stefnt að því að allt íslenskt lambakjöt og aðrar sauðfjárafurðir verði vottaðar kolefnishlutlausar.

 

Kolefnisjöfnun íslenskrar sauðfjárræktar er framsækið umhverfisverkefni sem hefur sjálfstætt umhverfis- og loftslagsgildi en getur einnig að hluta eða í heild verið hluti af framlagi Íslands á alþjóðlegum vettvangi.

 

– Sjá nánar á bls. 2 í nýju Bændablaði.