Minni kornstuðningur en áætlað var
Samkvæmt fjárlagafrumvarpi fyrir næsta ár verður framlag stjórnvalda til stuðningsátaks í kornrækt 17,4 milljónum króna lægra en áður hafði verið gert ráð fyrir.
Í fjárlagafrumvarpinu fyrir 2027 er gert ráð fyrir 460,6 milljóna króna framlagi til verkefnisins. Það er 82,6 milljónum meira en í fjárlögum 2026, en í greinargerð um landbúnaðarhluta frumvarpsins kemur fram að fjárhæðin sé að teknu tilliti til 17,4 milljóna króna aðhaldsráðstöfunar.
Stuðningurinn er liður í átaki stjórnvalda til eflingar íslenskri kornrækt og byggir á skýrslunni Bleikir akrar, aðgerðaáætlun um aukna kornrækt. Landbúnaðarháskóli Íslands gaf út árið 2023 og var unnin að beiðni þáverandi matvælaráðherra.
Áætlunin hefur meðal annars það markmið að auka innlenda framleiðslu á korni til fóðurs og manneldis og styrkja þannig fæðuöryggi landsins.
Þegar stjórnvöld kynntu fjármögnun átaksins árið 2023 var gert ráð fyrir að um tveimur milljörðum króna yrði varið til þess á fimm árum, frá 2024 til 2028. Fjármagnið átti að fara stighækkandi eftir því sem átakið þróaðist.
Fjárfestingarstuðningur var veittur í fyrsta sinn árið 2024 og náði þá meðal annars til kornþurrkunarstöðva, geymslna og sérhæfðs búnaðar.
Á síðasta ári bættist framleiðslutengdur stuðningur síðan við. Hann er greiddur fyrir þurrkað bygg, hveiti og hafra sem uppfylla skilgreindar gæðakröfur.
