40 þúsund notendur í 24 löndum
Smáforritið HorseDay fagnaði þriggja ára afmæli í síðasta mánuði en forritið hefur á skömmum tíma vaxið hratt og er nú með yfir 40.000 notendur í 24 löndum.
Smáforritið er því orðið lykiltól fyrir hestafólk til að fylgjast með þjálfun, umhirðu og mótum íslenska hestsins, ásamt kaupum og sölu íslenskra hrossa. Oddur Ólafsson, sem er alinn upp á Hvoli í Ölfusi, á heiðurinn af forritinu og öllu því helsta í kringum það.
Bæta velferð hestsins og hámarka afköst hans
„HorseDay er snjallforrit eða app, sem aðstoðar hestafólk við að halda utan um allar athafnir hestsins,“ segir Oddur. „Allt frá því að skrá niður hvenær hestur var járnaður og á hvernig skeifur og alveg að því að mæla þjálfun hestsins í rauntíma, tíma, vegalengd og hraða ásamt því að greina, eingöngu í gegnum skynjara snjallsímans, á hvaða gangtegund hesturinn er á hverjum tímapunkti í reiðtúrnum,“ segir Oddur og bætir við. „Markmið HorseDay er að bæta upplifun, innsýn og skilning á því hvaða áhrif mismunandi þjálfun og umönnun hefur á hross. Bæta raunmæligögnum við þjálfun hests með það að markmiði að bæta velferð hestsins og á sama tíma hámarka afköst.“
Hvoll í Ölfusi
„Hugmyndin kviknaði í hesthúsinu heima á Hvoli í Ölfusi þar sem foreldrar mínir, þau Margrét Sigurlaug Stefánsdóttir (söngkona frá Víðidal í Skagafirði) og Ólafur H. Einarsson, ráku hestabú í hátt í 30 ár. Í miðju hesthúsinu var stór tússtafla, á hana skráðu þjálfararnir samviskusamlega upplýsingar um þjálfun og annað sem skipti máli fyrir hverja viku. Í lok vikunnar var svo allt strokað út og byrjað aftur. Pabbi talaði mikið um hvað hann sæi eftir öllum þessum upplýsingum, fór að skrá þær niður sjálfur í Excelskjöl eða á pappír en fannst það aldrei nægilega gott. Þannig fæðist fyrsta útgáfan, hvernig við getum bætt þetta utanumhald og á sama tíma búið til innsýn inn í þjálfun og umhirðu sem við höfum ekki áður haft,“ segir Oddur brosandi út í annað.
Fyrsta útgáfan í maí 2022
Fyrsta útgáfa forritsins kom út í maí 2022 en síðan þá hefur Oddur og hans starfsmenn bætt töluvert miklu við kerfið. Til dæmis geta notendur fylgst með lifandi niðurstöðum af mótum íslenskra hesta á Íslandi, Svíþjóð og Noregi í gegnum forritið. Ásamt því geta notendur skráð hesta til sölu, fylgt öðrum knöpum og margt annað. „HorseDay er einfaldlega stafrænt samfélag hestafólks í kringum íslenska hestinn. Viðtökurnar hafa verið mjög góðar. Að búa til svona forrit er langtímaverkefni og krefst úthalds og þrautseigju. Við erum svo heppinn að hafa með okkur frábæran hóp starfsfólks en í dag eru fimm starfsmenn sem starfa hjá fyrirtækinu, við erum með öfluga stjórn og frábæra hluthafa sem standa þétt við bakið á verkefninu,“ segir Oddur kampakátur.
Forritið er nú notað í 24 löndum af yfir 40.000 manns, flestir notendur eru í Þýskalandi, Svíþjóð, Danmörku, Noregi og á Íslandi. Í fyrstu þegar HorseDay kom út var forritið í boði á 3 tungumálum, íslensku, ensku og þýsku, en við bættum sænsku við fyrir um hálfu ári síðan.
Afmæli í sumar
„Við ætlum að halda upp á afmælið með okkar notendum í sumar, þakka fyrir okkur og líta aðeins yfir farinn veg,“ segir Oddur aðspurður um hvort standi til að halda upp á þriggja ára afmælið. „Hver veit nema við kíkjum á Íslandsmót, sem fram fer á Selfossi í lok júní og bjóðum upp á eitthvað skemmtilegt þar. Einnig er heimsmeistaramót íslenska hestsins í Sviss í lok júlí, við hjá HorseDay verðum þar að sjálfsögðu,“ segir Oddur.
Hestar og gervigreind
„Það er stöðugt verið að bæta við forritið því að þróun á svona kerfi er í raun aldrei lokið,“ segir Oddur aðspurður um hvort breytingar séu í vændum. „Það er mikið rætt og ritað um gervigreind þessa dagana og er hestamennskan ekki undanskilin þeirri þróun. Við munum á næstu vikum kynna nýjungar í vörunni þar sem gervigreind kemur mikið við sögu,“ segir Oddur en vill þó ekki fara frekar út í þá sálma að svo stöddu. „Ég sé fyrir mér að HorseDay verði samfélag hestafólks um allan heim innan fárra ára. Að lokum langar mig að þakka hestafólki og öðru áhugafólki um nýsköpun kærlega fyrir frábærar viðtökur og hlakka mikið til að halda þessari vegferð áfram,“ segir Oddur að lokum.
