Vinsamlegast athugið að þetta efni er eldra en 1 árs.
Sumarsýning og opnun Jennýjarstofu
Mynd / Aðsendar
Menning 24. maí 2023

Sumarsýning og opnun Jennýjarstofu

Höfundur: Guðrún Hulda Pálsdóttir

Lögð er áhersla á ferskar hugmyndir og vandað handverk, glerblástur, útsaum, silfursmíði, keramik, ljósmyndun, dúkþrykk og margvíslega unnin viðarverk á nýjum sýningum í Safnasafninu á Svalbarðseyri.

Jenný Karlsdóttir við faldbúning, elstu gerð íslenskra faldbúninga.

Þar eru verk eftir fimmtán listamenn og nemendur í leikskólanum Álfaborg og Valsárskóla.

„Minnst er þriggja látinna myndlistarmanna sem lífið fór hörðum höndum um og eru sýningar þeirra hannaðar undir kjörorðunum Skapað úr safnkosti. Þá er skoðað hvernig myndtjáning getur hjálpað til við að losna undan sjálfskaða og loka hann inni í skáp. En þrátt fyrir alvarleika inngildingar og alþjóðlegra markmiða eru sýningar safnsins bjartar og litríkar og höfða til allra skilningarvita, ekki síst barna og unglinga sem taka þátt í starfi þess og gleðja gesti með hugmyndum sínum um fjölskyldu og vini,“ segir í tilkynningu frá safninu.

Á hlaðinu eru verk eftir Aðalheiði S. Eysteinsdóttur, Eggert Magnússon, Hauk Halldórsson, Helga Valdimarsson og Ragnar Bjarnason frá Öndverðarnesi og á bílastæði Safnvörðurinn frægi eftir Huglistarhópinn. Í anddyri og blómaskála er sýningin Fjölskylda og vinir með verkum eftir Guðjón R. Sigurðsson frá Fagurhólsmýri, Helga Þórsson og nemendur í Valsárskóla á Svalbarðsströnd og börn í Leikskólanum Álfaborg. Við sólpall að vestan er tréskúlptúrinn Bæn eftir Hjalta Skagfjörð Jósefsson.

B. Sóley Pétursdóttir við verk sín.

Í Brúðustofu eru sem endranær brúður til sýnis frá öllum heimshornum, og sérsýning í skáp með verkum eftir B. Sóley Pétursdóttur sem ber titilinn Þöggun – aldrei aftur.

Í miðrými er minningarsýning með verkum Pálma Kristins Arngrímssonar (1930–2015) og í vestursal er sýning sem ber titilinn Í björtum sal, með raðir málverka eftir Hjálmar Stefánsson (1913–1989) frá Smyrlabergi. Í Austursal er önnur minningarsýning með verkum eftir lífskúnstnerinn Nonna Ragnars (1951–2019).

Safnið fékk að gjöf 2.500 skráð textílverk sem Jenný Karlsdóttir hefur safnað og fara þau í sérstaka stofu henni til heiðurs. Þau verða aðgengileg á vefsíðu með haustinu en þangað til verða útsaumsverk úr safni hennar á sýningunni Heimilisprýði, einnig útsaumsverk og plattar eftir Sísí Ingólfsdóttur. Opnun Stofu Jennýjar Karlsdóttur, eða Jennýjarstofu, í Safnasafninu fór fram samhliða opnun sumarsýningarinnar.

„Jenný Karlsdóttir hefur viðað að sér þekkingu á handverki alla tíð. Hún safnaði handverki og munstrum í áratugi. Safnið hennar er einstaklega fjölbreytt og vandað, þ.m.t. vandaður faldbúningur,“ segir í tilkynningu.

Í Langasal eru sýnd verk eftir Brynhildi Þorgeirsdóttur, í Norðursölum sýna Klemens Hannigan og saman þær Anna Hallin og Olga Bergmann, og hjónin Guðmundur Ármann og Hildur María Hansdóttir.

„Við megum ekki gleyma því að handverkið er sá menningararfur sem gerði okkur kleift að lifa af harðindi, hungur og drepsóttir. Mér finnst virkilega gaman að fá tækifæri til að taka þátt í að koma á framfæri þessum hluta sögu okkar sem konur hafa skapað og lofa honum að skína til að vera metin að nýju fyrir eljuna, vandvirknina og listina sem handverkið er. Það sem var er grundvöllur að því sem er,“ er haft eftir Jennýju Karlsdóttur í tilkynningunni.

Í bókastofunni eru í ár sýnd verk Stefáns Tryggva- og Sigríðarsonar sem öll eiga það sameiginlegt að vera unnin í við, en með ólíkum hætti. Verk þessa fjölhæfa manns bera merki um þolinmæði, yfirlegu og natni.

Safnasafnið er opið daglega frá kl. 10–17 út sumarið, eða til 10. september.

Skylt efni: söfnin í landinu

Gerum okkur dagamun
Líf og starf 12. júlí 2024

Gerum okkur dagamun

Nú er ekki seinna vænna en að fara að leggja línurnar fyrir sumarið og með það t...

Bænder
Líf og starf 12. júlí 2024

Bænder

Sumir fara á Tinder. Aðrir hafa ekki tíma í slíkt vegna anna í búskapnum. Hér, k...

Vættafundur á Eyjabökkum
Líf og starf 10. júlí 2024

Vættafundur á Eyjabökkum

Orðsins list kemur að þessu sinni frá Oddbjörgu Sigfúsdóttur.

Sumarkveðja
Líf og starf 10. júlí 2024

Sumarkveðja

Nú þegar lífið kviknar með sumrinu og golan leikur við kinn, skulum við gleðjast...

Himbrimi
Líf og starf 9. júlí 2024

Himbrimi

Himbrimi er nokkuð stór vatnafugl og er einn af einkennisfuglum íslenskra heiðav...

Sumarsveiflan 2024
Líf og starf 8. júlí 2024

Sumarsveiflan 2024

Áherslur tískunnar fara nokkuð vítt og breitt þetta árið en nú þegar er farið að...

Dugur og elja ofar öllu
Líf og starf 8. júlí 2024

Dugur og elja ofar öllu

Eitt þeirra mætu kvenfélaga sem hér á landi sitja er Kvenfélag Hringsins sem hef...

Útlitið er ekki allt
Líf og starf 8. júlí 2024

Útlitið er ekki allt

„Sko, þetta hús byggði Síldarverksmiðja ríkisins árið 1943 og hér voru skrifstof...

Skammur aðdragandi að sölunni
11. júlí 2024

Skammur aðdragandi að sölunni

Bænder
12. júlí 2024

Bænder

Magnað Landsmót 2024
12. júlí 2024

Magnað Landsmót 2024

Svín og korn
12. júlí 2024

Svín og korn

Hundrað hesta setningarathöfn
12. júlí 2024

Hundrað hesta setningarathöfn