Sólarselluvaraafl á Grund í Eyjafirði

Höfundur: Sigurður Már Harðarson

Nýlega var sett upp sólarorkukerfi á kúabúinu Grund I og II í Eyjafirði, sem mun þjóna hlutverki varaaflskerfis fyrir búið.

Kerfið er frá Bluetti og á að tryggja að starfsemi búsins verði ekki fyrir truflun, að það fái samstundis rafmagn þegar straumrof verður á landsnetinu. Guðjón Þ. Sigfússon segist hafa verið með búið í gegnum félagið Ljósaborg í tæp 18 ár. „Við ákváðum að prófa þetta þar sem ég hef verið að fylgjast með þessum búnaði, meðal annars út af vinnu minni sem verkfræðingur, þar sem upp koma reglulega spurningar um sjálfbærni, sér í lagi hvað orku varðar. Mest tengt íbúðarhúsnæði og skipulagi byggðar. Mér fannst þessi búnaður spennandi sem varaafl og um leið með möguleika á hleðslu með umhverfisvænum orkugjöfum, til dæmis sólarpanelum eða vindorku.“

Guðjón Þ. Sigfússon hefur rekið búið í gegnum félagið Ljósaborg í tæp 18 ár.

Aukin sjálfbærni

Guðjón segir að þau hafi ekki lent beint í tjóni út af rafmagnsleysi, en það hefur skapast óvissa í rekstri, sem er alltaf slæm. „Við fengum tvo róbóta á síðasta ári sem við vildum tryggja í raforkuöryggi sem og með vörn fyrir spennuflökti. Mjólkurtankur er um leið á varaafli. Fjárfestingin með róbóta og tilheyrandi breytingum á eldra fjósi var um 100 milljónir króna,“ segir Guðjón en áður var notuð gömul dísilvél sem þau voru hætt að treysta.

„Hver og einn verður að skoða hvað hentar, en við sáum möguleika í þessum búnaði sem varaafl og vörn gegn spennuflökti. Þá er engin spurning að möguleiki á nýtingu umhverfisvænnar orku eins og sólarorku og vindorku gerir þetta að spennandi kosti. Við höfum reynt að auka sjálfbærni á búinu sl. ár eins og kostur er og um leið lækka kolefnisspor búsins. Þessi búnaður til að tryggja varaafl fellur vel að sjálfbærnihugsun og lækkun á kolefnisspori. Við höfum reynt að gera búið og fóður sem mest óháð innflutningi, til dæmis með því að einbeita okkur að góðri túnræktun með uppskeru af sem mestum gæðum. Þá höfum við ræktað korn síðastliðin 15 ár og þurrkum með eigin þurrkstöð á heitu vatni. Þannig getum við fengið íslenskt kjarnfóður með eigin byggi sem kolvetnagjafa og íslenskt fiskimjöl sem prótíngjafa.

Næsti áfangi er að kanna með sólarorkubúnað á þak og tengingar á þessum búnaði. Við erum þegar farnir af stað með könnun á þessum búnaði og kostnaði,“ segir Guðjón.

Skylt efni: Sólarorka