Skæð fuglainflúensa greinst í villtum fuglum
Skæð fuglainflúensa hefur greinst í sýnum sem tekin voru úr villtum fuglum á Norðurlandi, Suðvesturlandi og Suðausturlandi. Veiran er af gerðinni H5N5. Síðast greindist fuglainflúensa í heiðagæs við Höfn í Hornafirði í apríl 2026.
Matvælastofnun biðlar til almennings að sýna árvekni og aðgát komi þeir að dauðum eða veikum fuglum. Tilkynna skuli fund til viðkomandi sveitarfélags sem beri skylda til að bregðast við. Starfsmenn Matvælastofnunnar fjarlægi fuglinn sé þörf á því. Í tilkynningu frá Matvælastofnun er einnig áréttað að veiðimenn sýni aðgát og fylgi sóttvarnarleiðbeiningum á yfirstandandi fuglaveiðitímabili.
Veiran dreifist meðal villtra fugla
Í tilkynningunni segir jafnframt að borist hafi fjöldi ábendinga um veika og dauða villta fugla víðsvegar að. Fyrstu jákvæðu fuglainflúensusýnin í haust hafi verið úr fugli sem fannst á Blönduósi, Skagaströnd og við Sauðárkrók um miðjan september. Smituðu fuglarnir voru hettumáfur, skúmur, svartbakur og sílamáfur. Eftir að fleiri tilkynningar bárust hafi greining á þeim sýnum leitt í ljós að smit fannst einnig á Suðausturlandi, við Jökulsárlón, og í Sandgerði á Reykjanesi.
Tilkynningum um veika og dauða villta fugla hefur fjölgað mjög á síðustu vikum og bendir það til þess að veiran sé farin að dreifast meðal villtra fugla á ný.
Fuglaeigendur hvattir til árvekni
Matvælastofnun biðlar til alifuglabænda og annara fugleigenda að gæta vel að sóttvörnum til að draga úr hættu á að smit berist frá villtum fuglum í fugla í haldi. Tilkynna beri tafarlaust til Matvælastofnunar verði vart við sjúkdómseinkenni í fuglum eða óvenjulegum dauðsföllum.
Mikilvægur þáttur í smitvörnum er að tilkynnt sé um dauða eða veika fugla. Matvælastofnun óskar því eftir að almenningur haldi áfram að tilkynna fundi á dauðum eða veikum fuglum, nema það sé augljóst að dýrið hafi drepist af slysförum. Mikilvægt sé að lýsa fundarstað vel, helst með hnitum, og láta mynd fylgja með ef kostur er. Frekari leiðbeiningar um tilkynningar og upplýsingar um fuglainflúensu má nálgast á upplýsingasíðu Matvælastofnunar um fuglainflúensu.
Að sama skapi er það áréttað að almenningur skuli ekki meðhöndla dauða eða veika fugla og gæta þurfi sérstaklega að smitvörnum.
