Mikil sala í kindakjöti undanfarnar vikur og gengur vel á birgðir

Vel hefur gengið á þær birgðir sem til eru af kindakjöti síðustu vikur, en neytendur hafa í auknum mæli snúið sér að því undanfarið.  Nautakjötsbirgðir eru aftur á móti á þrotum hjá afurðastöðvum.

 

Verkfall dýralækna sem staðið hefur yfir undanfarnar vikur gerir að verkum að lítið er um slátrun, sem aftur hefur í för með sér að verslanir bjóða ekki sama úrval af kjötvörum og þegar ástand er með eðlilegum hætti.

Steinþór Skúlason, framkvæmda­stjóri SS, segir að verkfall dýralækna hafi áhrif á rekstur stórgripasláturhúss félagsins, en þar liggur slátrun niðri. Starfsfólk er á launum, sinnir öðrum verkum, en húsið er tekjulaust. „Þetta er auðvitað mjög neikvætt, við leggjum í mikinn kostnað en fáum engar tekjur inn,“ segir Steinþór.

 

Valkostum neytenda hefur fækkað

 

Sala á kindakjöti hefur að hans sögn tekið mikinn kipp upp á við. „Við merkjum söluaukningu þar og vel hefur gengið á birgðir. Hjá okkur er staðan sú að allar birgðir sem við höfðum yfir að ráða í nautakjöti eru uppurnar. Það er greinilegt að valkostum neytenda hefur fækkað, það er lítið um kjúkling og svín, nautakjötið svo til búið og þá snýr fólk sér að öðru. Það eru nægar birgðir til af kindakjöti og raunar jákvætt að svona vel gengur á þær. Fólk velur eitthvað annað í matinn, þar hefur lambið komið sterkt inn, pylsur af ýmsu tagi og kryddkjöt svo eitthvað sér nefnt,“ segir Steinþór.

 

 Nautakjötsbirgðir á þrotum

 

Ingvar Gíslason, markaðsstjóri hjá Norðlenska, segir að áhrifa verkfalla hafi farið að gæta í síðustu vikunni í maí. „Þá kláruðust okkar nautakjötsbirgðir endanlega og við höfum ekki framleitt neitt af hakkvörum og hamborgurum undanfarnar vikur,“ segir Ingvar. Að einhverju leyti segir hann að skortur á ákveðnum kjöttegundum hafi skilað sér í aukinni sölu á lambakjöti, „en þau áhrif eru óveruleg“. 

 

 Á sama tíma hefur útflutningur til Færeyja legið niðri, en fyrir Norðlenska sé um verulegt magn að ræða. Ingvar segir að þrátt fyrir leiðindatíð í vor hafi gengið ágætlega að selja grillkryddaðar vörur og félagið sé nú að hefja markaðssetningu á nýjum vöruliðum sem fengið hafi fínar viðtökur hjá neytendum. „Sumarið er rétt að byrja og við trúum ekki öðru en að það verði gott,“ segir Ingvar.

 

Kindakjöt til bjargar

 

Ólafur Már Þórisson, markaðsstjóri Kjarnafæðis, segir að fyrstu vikur verkfallsins hafi verið í lagi, en félagið hafi náð að birgja sig þokkalega upp af nauta-, svína- og kjúklingakjöti. 

 

„Það hefur auðvitað sést á sölutölum undanfarinna vikna að erfitt er að fá þessar afurðir. Kindakjötssala hefur aukist töluvert að undanförnu á móti og má þar nefna læri, gúllas, grillvörur úr lambakjöti, kótilettum í raspi og svo síðast en ekki síst kindaborgara sem við kjósum að kalla Fjallaborgara. Þeir hafa komið inn í staðinn fyrir nautahamborgara og eru ekki síðri að mínu mati. Það kom mér skemmtilega á óvart hversu góðir þeir eru,“ segir Ólafur Már.

 

Ástandið nú er orðið slæmt, einkum í nautakjöti og innfluttum kjúklingi, lítið sem ekkert sé til af þeim vörum. „Hakk og hamborgarar úr nautakjöti hafa ekki sést hér í húsi í nokkrar vikur. En á meðan svo er þá kemur kindakjötið okkur til bjargar. Það er því búið að létta aðeins á birgðum af lambakjöti sem getur ekki verið neitt annað en jákvætt,“ segir Ólafur Már.

 

Sala á frystivöru jókst

 

Hann segir að fyrir nokkrum vikum hafi hræðsla við tímabundin verkföll og jafnvel allsherjarverkföll ásamt skorti á öðrum tegundum orðið til þess að sala í frystivöru jókst umtalsvert. „Ég held hins vegar að það hafi verið eðlilegur ótti landsmanna og gott að fólk brást við. Það er alltaf hægt að borða upp úr frystikistunni þótt verkfall leysist.“