Vinsamlegast athugið að þetta efni er eldra en 3 ára.
Yfirlitsmynd fjölgeislamælinga Hafrannsóknastofnunar árin 2000 til 2019, alls 216.000 ferkílómetrar, eða 28,6% af flatarmáli efnahagslögsögunnar. Mynd / Hafró.
Yfirlitsmynd fjölgeislamælinga Hafrannsóknastofnunar árin 2000 til 2019, alls 216.000 ferkílómetrar, eða 28,6% af flatarmáli efnahagslögsögunnar. Mynd / Hafró.
Mynd / Hafró
Fréttir 11. nóvember 2020

Kortlagning hafsbotnsins við Ísland

Höfundur: Vilmundur Hansen

Í sumar kortlögðu leiðangursmenn á RS Árna Friðrikssyni um 46.600 ferkílómetra hafsvæði við Ísland í tveimur leiðöngrum í júní og ágúst.

Í mælingum í júní­leiðangrinum var lokið við að kortleggja hafsvæðið sem tengir Íslandsdjúp við suðurbrún land­grunnsins, austan við Kötluhryggi. Á heimasíðu Hafró segir mikið af góðum upplýsingum um farvegi sem teygja sig frá landgrunnsbrún suður eftir öllu djúpinu í gegnum mikla bunka af setlögum.

Árið 2019 sást hvernig þessir farvegir og fleiri sameinast í meginfarveg Norður-Atlantshafsins, Maury farveginum. Enn fleiri sæfjöll og eldstöðvar komu fram í rótum Íslands-Færeyjahryggsins, auk skriðusára og setstalla víðs vegar um mælingasvæðið.

Í júlíleiðangrinum á þessu ári tókst að bæta við 497 ferkílómetrum á landgrunninu, þar af voru 337 ferkílómetrum af samfelldum mælingum á Selvogsbanka.

Fjölgeislamælingar

Í ágústleiðangrinum voru gerðar fjölgeislamælingar á dýpsta svæðinu í Vesturdjúpi, og tengjast þar eldri fjölgeislamælingum í Grænlandssundi og svæðunum þar í kring. Í þeim mælingum komu í ljós stórir hryggir og sæfjöll sundurskorin af djúpum farvegum. Einnig komu fram keilulaga sæfjöll í Vesturdjúpi, svipuð þeim sem hafa sést í eldri mælingum Hafrannsóknastofnunar.

34,2% af efnahagslögsögunni kortlögð

Afrakstur síðastliðinna ára hefur skilað um 165.000 ferkílómetrum af samfelldum mælingum og kortlagningu, mest á hafsvæðum dýpri en 2.000 metrar. Með mælingunum í sumar hefur um 34,2% af efnahagslögsögunni verið mæld.
Mjög góð veðurskilyrði til fjölgeislamælinga voru lengst af í báðum leiðöngrum, þó suma daga hafi mælingar þurft að líða fyrir þó nokkurn ölduslátt. Leiðangursstjóri var Guðrún Helgadóttir og skipstjóri var Heimir Örn Hafsteinsson.