Einfaldleikinn og lágt verð er lykillinn að góðum árangri

Solis er nýlegt nafn í íslenskum dráttarvélaheimi, en þar er um að ræða dráttarvélar sem framleiddar eru á Indlandi. Virðast þær vera að vekja lukku hér á landi sökum lágs verðs og einfaldleika. 

 

Fyrirtækið Solis á Íslandi hóf innflutning á þessari tegund í maí 2016. Bændablaðinu lék forvitni á að vita hvernig mönnum hafi tekist að fóta sig í harðri samkeppni á markaðnum.  

 

Við opnunina í maí kom Amit Adya vélaverkfræðingur sem fulltrúi Solis til landsins. Markmið hans var að gera úttekt á nýja umboðsfyrirtækinu og sjá til þess að það stæðist kröfur Solis. Amit varði fimm dögum á Íslandi og tók m.a út nýjan sýningarsal Solis sem er staðsettur í Súðarvogi 6. Var hann afar hrifinn af því sem hann sá, að sögn Ingvars Sigurðssonar framkvæmdastjóra.  

 

Viðtökur framar vonum

 

Ingvar segir að viðtökurnar hafi síðan verið framar vonum. 

„Við erum komnir með 5% markaðshlutdeild. Fyrstu vélarnar fóru frá okkur til nýrra eigenda í ágúst og 8 vélar voru seldar á síðasta ári.

 

Stærsta fáanlega vélin frá Solis á Evrópumarkaði sem stendur er 90 hestöfl. Af þessum átta vélum sem við höfum selt eru fimm með 90 hestafla mótor og eru þær nú uppseldar hjá okkur. Hinar vélarnar eru minni, en minnsta vélin frá Solis sem við höfum tekið til landsins er aðeins 26 hestöfl, en hægt er að fá enn minni vél.“

 

Ingvar segir að þar sé um að ræða vélar sem jafnist á við svokallaða liðléttinga. Hins vegar séu þær með aflúrtaki og öðru líkt og stærri vélarnar. 

 

„Þá erum við með margvíslega fylgihluti fyrir þessar litlu dráttarvélar, eins og snjótennur, sláttuvélar, tætara og meira að segja kartöfluupptökuvélar.“

 

Solis framleiðir hefðbundnar dráttarvélar í nokkrum stærðum, en einnig smávélar sem henta m.a. vel sveitarfélögum við gangstígahreinsun og slátt. 

 

Solis vélar seldar í yfir 80 löndum

 

Solis dráttarvélarnar hafa verið fáanlegar í Evrópu frá 2012. Töluvert hefur selst af þeim í Evrópu. Þá eru þær mikið seldar í Írlandi, Bretlandi, Þýskalandi og Danmörku en þær hafa selst við góðan orðstír í yfir 80 löndum. 

 

Solis er einn af þremur stærstu dráttarvélaframleiðendunum í Indlandi. Þeir framleiða og selja í kringum 90.000 vélar á ári. 

 

Sérstaðan fólgin í einfaldleikanum og lágu verði

 

Velgengni indverska risans er fólgin í einfaldleika og verði vélanna. Við sölu á Solis hér á landi verða lagðar sömu áherslur. 

 

„Markmiðið er að vera alltaf með lægsta verðið miðað við sambærilegar vélar frá öðrum framleiðendum,“ segir Ingvar. Hann segist óhikað geta fullyrt að Solis á Íslandi bjóði lægsta verðið og muni þar að minnsta kosti milljón á 90 hestafla Solis vél og sambærilegum vélum frá helstu samkeppnisaðilum. Hann segir þó ekki sanngjarnt að bera Solis saman við dýrustu dráttarvélamerkin sem eru allt öðruvísi útbúnar og mjög tæknivæddar. 

 

Standast evrópska staðla

 

Vélarnar sem eru í boði á Evrópumarkaði eru framleiddar eftir evrópskum stöðlum og standast alla mengunarstaðla álfunnar. Vélarnar eru í boði með eða án húsa.

 

Menn eru hrifnir af einfaldleikanum 

 

Ingvar segir að þeir sem skoðað hafa Solis, prófað og keypt séu mjög hrifnir af einfaldleikanum. Það er sama reynsla og lesa má um m.a. í viðtölum við írska og enska bændur. 

 

„Þarna eru menn að mestu lausir við allan hátæknitölvubúnað og geta í flestum tilfellum gert við sínar vélar sjálfir. Þeir þurfa ekki að byrja á því að hringja í vélaverkfræðing til að lesa á tölvur ef eitthvað bilar. Allt hefur þetta þó sína kosti og galla.

 

Ingvar segir að verktaki á Suðurlandi hafi fengið lánaða vél hjá þeim í fyrrasumar til að slá 30 hektara sem hann gerði á tveim dögum. Hann hafi sérstaklega getið þess að verki loknu hversu olíueyðslan hafi verið lítil. Var hann að nota sömu sláttuvél og hann var vanur að nota á mun öflugri 150 hestafla dráttarvél. 

 

− Hvað með framhaldið?

„Það eru sex nýjar vélar að koma til landsins nú í febrúar. Við höldum því ótrauðir áfram,“ segir Ingvar Sigurðsson.

 

Solis dráttarvélar á landbúnaðartækjasýningu í Hanover í Þýskalandi.