Burðarhjálparmyndbönd á YouTube nú líka á ensku og þýsku

Höfundur: smh

Fyrir ári síðan var opnuð YouTube-rásin Leiðbeiningarefni um burðarhjálp, með myndböndum um burðarhjálp á sauðburði. Um verkefni þeirra Karólínu Elísabetardóttur í Hvammshlíð og Axels Kárasonar dýralæknis er að ræða, þar sem leitast var við að veita ráðgjöf um öll hugsanleg burðarvandamál og uppákomur á sauðburði. Nú hefur framhald orðið á verkefninu og brugðist við óskum um myndbönd á þýsku og ensku sem ætlað er aðstoðarfólki sem kemur erlendis frá.

Karólína segir að nú séu öll þýsku myndböndin nýkomin inn á rásina, 15 að tölu, og þau ensku séu að tínast inn. Fleiri séu væntanleg fyrir sauðburð en auk þess eru 23 myndbönd á íslensku inni á rásinni. „Myndböndin sem við Axel dýralæknir gáfum út í fyrra fengu góðar viðtökur hjá bændunum og við náðum líka síðar í aukaefni varðandi sjaldgæf tilvik sem bændur ættu að geta nýtt sér í sauðburðinum núna,“ segir hún. Hún telur að rúmlega tíu prósent sauðfjárbænda hafi aðstoðarfólk erlendis frá á sauðburði og byggir það á óformlegri könnun sem hún sendi út til bænda og rúmlega 220 svör bárust.

Skjámynd úr myndbandinu hans Bjarka á Skarðaborg um snúið leg.

Viðbætur um sjaldgæf tilvik

„Við höfum fengið gott efni frá bændum um almenn vandamál og nú síðast um þessi sjaldgæfu tilvik, meðal annars frá Láru Björg Björvinsdóttur, Ástu F. Flosadóttur, Eline Manon Schrijver og Þóreyju Sigríði Jónsdóttur. Framúrskarandi í þessu samhengi er skemmtilegt myndband sem Bjarki Sigurðsson á Skarðaborg tók þegar hann var einn á næturvakt og sneri snúnu legi – með góðum árangri. Þótt um afar krefjandi verkefni væri að ræða hélt hann húmor og lýsti á sama tíma aðferðinni á skýran hátt. Eins er ógleymanlegt að taka upp burð á Grænumýri þar sem risastór hrútur með svaka horn – eins og Guttormur bóndi lýsti þeim – fæddist afturábak og kom í heiminn eldsprækur og alveg óbrotinn, þökk sé afbragðs burðarhjálparhæfileikum bóndans.

Skjámynd úr ensku útgáfunni „afturábak“.

Skref fyrir skref ákvörðunartré

Verkefni þeirra hófst fyrir tveimur árum við undirbúning myndbandagerðarinnar og hafa þau fengið styrki úr Framleiðnisjóði landbúnaðarins til framleiðslunnar. „Á þýsku eru 15 myndbönd í boði þar sem nokkur styttri myndbönd voru sameinuð þannig að svo gott sem allt efnið er komið inn, ensku útgáfurnar eru að fylgja smátt og smátt á næstunni.

Svokallað ákvarðanatré þar sem hægt er að finna út hvað er að skref fyrir skref er einnig aðgengilegt á þýsku, væntanlega verður það líka þýtt yfir á ensku aðeins seinna. Eins og grunnútgáfan er þetta allt afar tímafrekt verkefni en Fóðurblandan, S.A.H./Kjarnafæði, Lely Center Ísland og Kaupfélag Vestur-Húnvetninga hafa styrkt þýðingarnar sérstaklega og auk þess fóðurframleiðendurnir Bergophor frá Þýskalandi og Fallmann frá Austurríki,“ segir Karólína.

Skjámynd úr þýsku útgáfunni „á hvolfi“.

Grunnur myndbandanna eru upptökur sem Karólína gerði á mismunandi sauðfjárbúum, aðallega á Grænumýri, Halldórsstöðum, Stafni, Steinnesi og Sölvabakka. „Þá fylgir innsýn í orðsins fyllstu merkingu þar sem Axel notar lambalíkön og mjaðmagrind í raunstærð til að útskýra hvað er að gerast inni í kindinni. Einnig koma fram sem ráðgjafar þau Anna Margrét Jónsdóttir, Einar Kári Magnússon, Jón Árni Magnússon, Matthildur Hjálmarsdóttir, Sigursteinn Bjarnason og Þórdís Sigurbjörnsdóttir.“

Yfirlit yfir allar slóðir myndbandanna:

Youtube-rásin (íslenska, enska, þýska – smella á “Vídeóin” til að sjá öll):
www.tinyurl.com/burdarhjalp
Ákvarðanatréð og listi yfir öll myndböndin á íslensku:
www.tinyurl.com/saudburdarhjalp
Ákvarðanatréð og listi yfir öll myndböndin á þýsku:
www.tinyurl.com/schaf-geburtshilfe