Vinsamlegast athugið að þetta efni er eldra en 4 ára.
Bændur og búalið í Norður-Þingeyjarsýslu í heimsókn hjá Íslandsbleikju í Öxarfirði.
Bændur og búalið í Norður-Þingeyjarsýslu í heimsókn hjá Íslandsbleikju í Öxarfirði.
Mynd / Kristín Gunnarsdóttir og Nanna Steinunn Höskuldsdóttir
Líf og starf 5. apríl 2017

Bændur í Norður-Þingeyjarsýslu gerðu sér glaðan dag

Höfundur: Margrét Þóra Þórsdóttir
„Nokkur fyrirtæki hér á svæðinu lögðu okkur lið og gerðu okkur mögulegt að eiga hér saman góðan dag,“ segir Sigþór Þórarinsson, bóndi í Sandfellshaga 1.  
 
Bændur í Norður-Þingeyjarsýslu, innan Búnaðarsambands Norður­þingeyinga (BSNÞ), hafa skipst á heimboðum undanfarin ár. Starfssvæði sambandsins nær frá Kelduhverfi austur í Bakkafjörð og innan þess svæðis eru fjögur þorp auk dreifbýlisins, Kópasker, Raufarhöfn, Þórshöfn og Bakkafjörður.
 
Keldhverfingar riðu á vaðið og buðu bændum á svæði BSNÞ í heimsókn til sín árið 2012 og ári síðar voru það Þistlar og Langnesingar sem stóðu fyrir heimboði á sitt svæði. Nú var röðin komin að svæðinu í Öxarfirði, Núpasveit og á Sléttu, en bændur á svæðinu buðu heim nú á dögunum og var þátttaka góð líkt og áður hafði verið, um 100 manns hafa þegið heimboðin.
 
Venjan er sú að heimsækja fyrirtæki á svæðinu, bæði stór og smá, líta heim á bæi og skoða útihús eða annað markvert og dagurinn endar yfirleitt í viðeigandi húsnæði, félagsheimili eða reiðhöll. 
 
Íslandsbleikja í hópi stærstu landeldisstöðva í heimi
 
Vel var að venju mætt í heimboðið á dögunum þar sem bændur úr Norður-Þingeyjarsýslu gerðu sér glaðan dag. Mæting var við Íslandsbleikju í Öxarfirði og lék veður við gesti, sólskin,  hlýtt í veðri og örlítil sunnan gola. Arnar Freyr Jónsson, framkvæmdastjóri Íslandsbleikju, sem áður hét Silfurstjarnan, tók á móti hópnum og greindi frá starfsemi félagsins. 
 
Fiskurinn er alinn upp í sláturstærð, eða allt upp í 4 kíló og er vinnsla starfrækt samhliða eldinu. Þar fer slátrun einnig fram, slæging og pökkun á heilum ferskum fiski.  Framleiðsla fyrirtækisins er um 1.400 tonn af laxi á ári og er félagið í hópi stærstu landeldisframleiðenda á laxi í heiminum. Stefnt er að því að auka framleiðsluna á næstu árum. Eldisstöðin í Öxarfirði hefur nokkra sérstöðu þar sem töluverður jarðhiti er á svæðinu og hægt að ala laxinn upp við 10 til 11 gráðu heitt ísalt vatn. Bændur fóru um svæðið og skoðuðu fiska og aðbúnað, nýframkvæmdir og fleira auk þess að þiggja veitingar.
 
Heimsins bestu gulrætur í Akurseli
 
Frá Íslandsbleikju var haldið niður austursand og heim að Akurseli.
 „Þar eru heimsins bestu gulrætur ræktaðar,“ segir Sigþór.  Ábúendur, Sara Stefánsdóttir, Árni Sigurðsson og Sigurbjörg Jónsdóttir, móðir Söru, tóku á móti bændum og fræddu um starfsemi býlisins, en foreldrar Söru keyptu jörðina árið 2002 og þar hefur m.a. verið stunduð umfangsmikil ræktun á gulrótum.
 
Sýnikennsla í rúningi
 
Næst lá leiðin í Ærlækjarsel þar sem þau Eyrún Egilsdóttir og Bernharð Grímsson búa með um 400 fjár og nokkrar hænur. Farið var í fjárhús, tæki og tól skoðuð og notið veitinga.  Loks lá leiðin í Sandfellshaga 1 þar sem bræðurnir Rúnar og Sigþór Þórarinssynir búa ásamt sambýliskonu þess síðarnefnda, Kristínu Gunnarsdóttur. 
 
Á búinu eru um 670 kindur á húsi og örfáar hænur. Verið er að byggja 350 fermetra vélaskemmu sem varð fokheld á þorranum. Þar eru einnig nýleg 400 kinda fjárhús. 
 
Fram fór sýnikennsla í rúningi á meðan gestir stöldruðu við, um hana sáu þeir Klifshagabræður, Baldur og Daníel Stefánssynir. Gestir þáðu súpu og brauð, kaffi og með því áður en haldið var út á Sléttu. 
 
Í Leirhöfn var fyrsta fjárhúsið með vélgengum kjallara
 
Hópurinn hélt þá að Leirhöfn og Nýhöfn þar sem m.a. var skoðuð fjárrétt við bæinn. Á Leirhöfn var á sínum tíma reist fyrsta fjárhús hér á landi með vélgengum kjallara. Þá var haldið heim að Snartarstöðum og skógrækt ábúenda, Helga Árnasonar og Sigurlínu Jóhannesdóttur, og fræðst um hana, en þau hjónin rækta skóg á um 100 hektara lands.
 
Veglegur kvöldverður í Feykishöll
 
Dagsferðinni lauk með veglegum kvöldverði í reiðhöllinni á Snartarstöðum, Feykishöllinni, lambasteik með öllu tilheyrandi. 
 
Sigþór segir ýmsa hafa lagt sitt lóð á vogarskálar til að gera daginn eftirminnilegan, auk Búnaðarsambands Norður-Þingeyinga tóku Bústólpi, Búvís, Fjallalamb, Guðmundur Arason smiðja, Jötunn vélar, SS, VB Landbúnaður og Vökvaþjónustan Kópaskeri þátt.
 
Allir lögðust sælir á koddann um kvöldið
 
„Þessi dagur tókst í alla staði mjög vel verð ég að segja og örugglega flestir ef ekki allir sem lögðust sælir og ánægðir á koddann um kvöldið,“ sagði Sigþór. 

9 myndir:

Markmið um að 12 mánaða börn fái leikskólapláss í Sveitarfélaginu Skagafirði
Fréttir 21. janúar 2022

Markmið um að 12 mánaða börn fái leikskólapláss í Sveitarfélaginu Skagafirði

Sveitarfélagið Skagafjörður hefur um nokkurt skeið unnið að því að koma til móts...

Gat á sjókví í Reyðarfirði
Fréttir 21. janúar 2022

Gat á sjókví í Reyðarfirði

Matvælastofnun barst tilkynning frá Löxum Fiskeldi fimmtudaginn 20. janúar um ga...

Skoða alla möguleika til að mæta mikilli eftirspurn eftir lóðum
Fréttir 20. janúar 2022

Skoða alla möguleika til að mæta mikilli eftirspurn eftir lóðum

„Við erum hvergi nærri hætt með okkar uppbyggingu, en stefnan er að íbúar í svei...

„Fyrir okkur öll“ er nýtt slagorð Rangárþings ytra
Fréttir 19. janúar 2022

„Fyrir okkur öll“ er nýtt slagorð Rangárþings ytra

Rangárþing ytra efndi nýlega til slagorðakeppnis um slagorð fyrir sveitarfélagið...

Mikilvægt skref í uppbyggingu Akureyrarflugvallar
Fréttir 19. janúar 2022

Mikilvægt skref í uppbyggingu Akureyrarflugvallar

Samningur um smíði á 1.100 fermetra viðbyggingu við Flug­stöðina á Akureyri var ...

Byggðasaga Skagafjarðar tók 26 ár í vinnslu og í verkið fóru um 50 starfsár
Fréttir 19. janúar 2022

Byggðasaga Skagafjarðar tók 26 ár í vinnslu og í verkið fóru um 50 starfsár

Hjalti Pálsson frá Hofi, ritstjóri og aðalhöfundur Byggðasögu Skagafjarðar, skil...

Vinna hefst við gerð reglna um raforkuöryggi
Fréttir 19. janúar 2022

Vinna hefst við gerð reglna um raforkuöryggi

Umhverfis-, orku- og loftslagsráðherra, hefur skipað starfshóp um raforkuöryggi....

Ný reglugerð um velferð alifugla
Fréttir 19. janúar 2022

Ný reglugerð um velferð alifugla

Sjávarútvegs- og landbúnaðarráðherra hefur undirritað reglugerð um velferð alifu...