Aukafjárveiting í styrki til orkusparandi aðgerða

Ákveðið hefur verið að ráðstafa aukalega hundrað milljónum króna til orkusparandi aðgerða í gróðurhúsum þar sem hvatt er til fjárfestinga í orkusparandi tækni og búnaði í ylrækt.

Í tilkynningu á vef umhverfis-, orku- og loftslagsráðuneytis kemur fram að í ljósi góðs árangurs fyrri úthlutunar til orkusparandi aðgerða í gróðurhúsum hefur Jóhann Páll Jóhannsson umhverfis-, orku- og loftslagsráðherra ákveðið að veita auknu fé til styrkjanna.

Bætt orkunýtni

Markmið þeirra er að draga úr orkunotkun í gróðurhúsum og bæta orkunýtni, meðal annars með innleiðingu á LED-ljósum og öðrum orkusparandi búnaði. Aðgerðirnar eiga að skila sér í lægri rekstrarkostnaði fyrir bændur og stuðla að minni orkuþörf samfélagsins í heild, eins og fram kemur í tilkynningunni.

Jóhann Páll Jóhannsson ráðherra bendir á að samkvæmt mati Umhverfis- og orkustofnunar er orkusparnaðurinn af átakinu frá því í vor verulegur, eða allt að 8,3 GWst, sem jafngildir árlegri raforkunotkun 2 þúsund heimila. „Nú gefum við í og styðjum enn frekar við orkusparandi aðgerðir í gróðurhúsum með aukinni fjárveitingu. Ég hvet garðyrkjubændur eindregið til að taka þátt.“

Styrkhæfi verkefna og áherslur

Styrkirnir verða veittir til framleiðenda garðyrkjuafurða og verður áhersla lögð á að styrkja verkefni sem falla að hlutverki sjóðsins. Horft verður til eftirfarandi forgangsröðunar við úthlutun, segir í tilkynningu:

• Verkefni sem skila mestum orkusparnaði á hverja styrkkrónu.
• Verkefni sem auka rekstrarhagkvæmni í rekstri gróðurhúss.
• Lausnir sem auka tæknivæðingu og samkeppnishæfni greinarinnar.
• Verkefni sem nýtast sem fyrirmynd fyrir aðra í greininni.
• Hvort verkefni hafi áður hlotið stuðning frá Loftslags- og orkusjóði.

Hámarksstyrkhlutfall og styrkfjárhæð er mest 40% af heildarkostnaði fjárfestingar (án vsk.) og að hámarki 15 m.kr. fyrir hvern framleiðanda garðyrkjuafurða.

Nánari upplýsingar er að finna á vef Loftslags- og orkusjóðs og er umsóknarfrestur til 15. desember 2025.