Rækta tengsl við nærsamfélagið
Listasafn Árnesinga er í eigu Héraðsnefndar Árnesinga, en öll sveitarfélögin í Árnessýslu eiga aðild að henni. Þau eru Bláskógabyggð, Flóahreppur, Grímsnes- og Grafningshreppur, Hrunamannahreppur, Hveragerðisbær, Skeiða- og Gnúpverjahreppur, Sveitarfélagið Árborg og Sveitarfélagið Ölfus. Listasafn Árnesinga sem staðsett er í Hveragerði býður upp á fjölbreyttar og metnaðarfullar myndlistarsýningar eftir innlenda og erlenda listamenn.
Yfirstandandi sýning Summa & Sundrung leggur áherslu á skurðpunkta, kannar margbreytileika, og gefur áhorfendum möguleika á að ferðast um nútímaleg verk vídeó- og raflistarfrumkvöðlanna Garys Hill, Steinu og Woody Vasulka. Steina (Steinunn Briem Bjarnadóttir Vasulka f. 1940) er íslensk en hefur lengst af búið í Bandaríkjunum ásamt eiginmanni sínum, Woody Vasulka. Woody, sem féll frá árið 2019, var einnig íslenskur ríkisborgari en fæddist í Tékkóslóvakíu árið 1937. Gary Hill er fæddur í Bandaríkjunum (1951) en eins og á við verk Steinu og Woody hafa verk hans verið sýnd í mörgum af þekktustu söfnum heims. Sýningin sem nú er uppi í Listasafni Árnesinga mun svo halda áfram og ferðast til annarra safna í Evrópu og Bandaríkjunum á næstu árum.
Safnið heldur einnig úti markvissu fræðslustarfi þar sem unnið er með nemendum á mismunandi skólastigum, listamönnum, fræðimönnum og almenningi. Málþing, námskeið og smiðjur eru haldin reglulega fyrir almenning þar sem fólki gefst kostur á að vinna með mismunandi miðla í tengslum við sýningar safnsins. Listasafn Árnesinga hefur einnig að undanförnu staðið að verkefninu Smiðjuþræðir sem snýst um að keyra út seríu af fjölbreyttum og færanlegum listasmiðjum. Starfandi listamenn úr ólíkum listgreinum leiðbeina á smiðjunum og ferðast þær til allra grunnskóla í Árnessýslu. Markmiðið með Smiðjuþráðunum er að rækta tengsl safnsins við nærsamfélagið og veita börnum og unglingum í sýslunni tækifæri á að taka þátt í fjölbreyttu og vönduðu menningarstarfi óháð búsetu. Verkefnið er styrkt af Barnamenningarsjóði en árið í ár er þriðja árið sem Smiðjuþræðir fara fram. Í vetur verða ýmsir aðrir viðburðir á döfinni í safninu, m.a. fjölskyldusmiðjur, upplestur á ljóðum og bókmenntum.
Listasafn Árnesinga var á sínum tíma fyrsta listasafnið utan höfuðborgarsvæðisins sem opið var almenningi og verður safnið 60 ára árið 2023. Á næsta ári verða valin verk úr safneigninni sýnd í tilefni afmælisins. Rekja má upphaf safnsins til rausnarlegrar gjafar frú Bjarnveigar Bjarnadóttur og tveggja sona hennar, Bjarna Markúsar og Lofts Jóhannessona. Á tímabilinu frá 1963 til 1986 færðu þau Árnesingum liðlega sjötíu listaverk að gjöf. Verkin eru eftir helstu listamenn þess tíma, það elsta frá árinu 1900 en flest verkin eru frá miðbiki síðustu aldar. Árið 2018 var Listasafni Árnesinga veitt íslensku safnaverðlaunin, en þau eru viðurkenning sem veitt er annað hvert ár íslensku safni fyrir framúrskarandi starfsemi.
Í safninu er starfrækt skemmtileg safnbúð sem selur einstaka listræna gjafavöru og svo er hægt að kaupa sér kaffi og meðlæti og njóta tilverunnar á blómlega kaffihúsinu okkar og einnig er fræðsluhorn.
Opnunartími er eftirfarandi: Sumaropnun: opið alla daga frá klukkan 12–17. Vetraropnun er opið alla daga nema mánudaga frá klukkan 12–17. Aðgangur að safninu er ókeypis og öll velkomin.
