John Deere 6135R er dráttarvél fyrir þá sem vilja mikinn lúxus. Stiglaus sjálfskipting og rafstýringar í öllu miða að áreynslulausri notkun.
John Deere 6135R er dráttarvél fyrir þá sem vilja mikinn lúxus. Stiglaus sjálfskipting og rafstýringar í öllu miða að áreynslulausri notkun.
Mynd / ÁL
Líf og starf 11. nóvember 2022

Notalegur dráttarklár

Höfundur: Ástvaldur Lárusson

John Deere 6135R er sérlega vel útbúinn traktor með stiglausri skiptingu og fjögurra strokka hreyfli. Þessa dráttarvél væri hægt að flokka sem millistóra eins og Fendt 700 eða Massey Ferguson 6S. Dráttarvélin hugsuð sem valkostur fyrir þá sem vilja eins mikinn munað á flestum sviðum og hægt er.

Þegar gengið er að vélinni er gaman að sjá klassísku John Deere litina, grænan og gulan. Vélar frá þessum framleiðanda hafa ekki átt langa sögu á íslenskum markaði, en eru með þeim vinsælustu beggja vegna Atlantshafsála. Frændur okkar Norðmenn hafa til að mynda tekið ástfóstri við þetta merki undanfarna áratugi og er líklega einn grængulur á flestum bæjartorfum þar í landi. Þótt John Deere sé amerískt merki, þá er þessi vél alfarið framleidd í Mannheim í Þýskalandi.

Íslyft formlegur umboðsaðili

Markaðshlutdeild þessara véla á Fróni hefur aukist á allra síðustu árum eftir að þær hlutu varnarþing hjá Íslyft, hafandi verið á hrakhólum lengi. Verandi með íslenskt umboð hefur John Deere lagt á sig þá vinnu að íslenska allt stýrikerfi og allar notendahandbækur. Bændur sem vilja traktor sem hugsar á okkar ástkæra og ylhýra geta því íhugað þennan kost.

Dráttarvélin vigtar notandann

Allar vélarnar sem umboðið flytur inn eru með hátt búnaðarstig og finnur maður mjög fljótt þegar tekið er í traktorinn að lúxusinn er mikill. Sætið er til að mynda með tæknilegri fjöðrun. Þegar vélin er ræst heyrast óhljóð undir sessunni og notandinn lyftist upp og niður. Þarna eru innbyggðar vogir að mæla þyngd notandans og er fjöðrunin sjálfkrafa stillt samkvæmt því.

Við þetta bætist fjarandi hús og framhásing sem verja ökumanninn frá utanaðkomandi hamagangi.

Sætinu er hægt að snúa um nokkrar gráður til þess að ökumaðurinn þurfi ekki að vinda upp á sig þegar fylgst er með tækjum fyrir aftan. Þessi ás er þannig stilltur að það truflar notandann ekkert að hafa opið fyrir snúninginn öllum stundum. Stjórnandinn hefur því mikinn hreyfanleika við vinnu og upplifunin er sambærileg því að sitja í vönduðum skrifborðsstól.

Innréttingin virðist vera vel skrúfuð saman. Sætið er vandað og stillir af fjöðrunina eftir þyngd notandans.

Hljóðlát og svöl

Þægindin halda áfram þegar byrjað er að aka vélinni og hávaðinn frá mótornum berst lítið sem ekkert til notandans. Hvað hljóðvist varðar er þó ekki hægt að segja að John Deere 6135R skeri sig frá öðrum nýjum millistórum vélum, enda virðast flestir betri frameiðendur vanda sig á þessu sviði.

Bændur sem vilja hafa með kælivöru á heitum dögum geta glaðst, því hér er komin dráttarvél með kæliboxi. Það er ekki mjög stórt, en dugar til að rúma þrjár Nocco dósir, eina samloku og súkkulaðistykki.

Breið framrúða – góðir speglar

Framrúðan er breið og kemur á óvart hversu þægilegt er að horfa út um slíkan skjá. Húsið er einungis með fjórum gluggapóstum sem gerir útsýnið til hliðanna betra en annars. Þar sem brettin og dekkin skyggja á koma hliðarspeglarnir að góðum notum, jafnvel þegar ekið er áfram. Í ámoksturstækjavinnu skyggir stórt og kröftugt húddið á útsýnið beint fram fyrir vélina. Því er ekki hægt að mæla með þessari vél ef hún er hugsuð helst í þannig vinnu, enda er hún ekki hönnuð sem slík. Þetta er miklu frekar dráttarvél en mokstursvél.

Þessi áhersla sést þegar þakglugginn er skoðaður. Ólíkt þakgluggum í mörgum öðrum nýjum dráttarvélum er nokkuð þykkur póstur milli framrúðunnar og áðurnefnds þakglugga. Útsýnið til himins er því ekki óhindrað.

Vélin er nefstór og ekki hugsuð fyrir þá sem þurfa aðallega að nota ámoksturstækin.

Stiglaus sjálfskipting

Stiglaus sjálfskiptingin er eitt af helstu trompum þessarar vélar. Í akstri er bremsan eina fótstigið sem nauðsynlegt er að nota, annars er hægt að stjórna aksturshraða og snúningshraða mótorsins alfarið með annars vegar einni sveif og hins vegar handolíugjöf. Þegar „aksturshraðasveifin“ er færð fram og aftur sér notandinn í mælaborðinu hvaða hraði hefur verið valinn og getur svo fínstillt með litlum hnappi efst á sveifinni.
Þar sem skiptingin er algjörlega stiglaus er hægt að skipta úr lægsta drifinu í það hæsta á augabragði án fyrirhafnar. Í notkun virðist skiptingin almennt vera fumlaus en blaðamanni fannst dráttarvélin rykkjast örlítið til í mikilli fínvinnu. Taka ber í reikninginn að undirritaður er óvön skrifstofublók, ekki þaulæfður bóndi.

Skjár með mikla virkni

Þegar stjórnborðið er skoðað er greinilegt að mikil hugsun hefur farið í að hafa staðsetningu allra stjórntækja eins þægilega og aðgengilega og hægt er. Notandanum stendur til boða að sérsníða virkni fjölda hnappa eftir sínum þörfum og er það gert í gegnum stóran tölvuskjá þar sem allt viðmótið er á íslensku. Áðurnefndur skjár gefur líka góða yfirsýn yfir allt sem vélin er að gera hverju sinni.

Á stjórnborðinu er rafmagns- stýripinni fyrir ámoksturstækin. Á honum eru nokkrir forritanlegir hnappar sem er hægt að láta stjórna nokkrum aðgerðum. Þar er m.a. hægt að hafa skipanir fyrir frambeislið, afturbeislið, glussaúttök og vendigírinn.

Tölvuskjárinn býður upp á mikla möguleika. Allt viðmótið er á Íslensku.
Tölur

Nafn vélarinnar, 6135R, er ekki endilega auðskiljanlegt við fyrstu sýn. Ef þetta er túlkað og brotið niður þá stendur „6“ fyrir stærðarflokkinn, „135“ er afl mótorsins og „R“ er efsta búnaðarstigið. Framleiðandinn straumlínulagaði nafngiftir sínar fyrir skemmstu og munu þessir traktorar heita 6R 140 hér eftir.

Þrátt fyrir að vélin sé seld sem 135 hestafla vél þá er hún útbúin aflauka sem virkjast við mikið álag. Því standa til boða 20 auka hestöfl sé þess mikil þörf.

Verðið á þessari vél með ámoksturstækjum er 18.300.000 krónur án vsk. Helstu mál eru eftirfarandi: Lengd 4.870 mm, hæð 2.930 mm og breidd 2.550 mm.

Sérstakar þakkir fá bændurnir á Ytra-Hólmi sem lögðu til dráttarvélina í þennan prufuakstur.

  Öflugur keppinautur
Líf og starf 7. desember 2022

Öflugur keppinautur

Japanski bílaframleiðandinn sem var frumkvöðull í þróun rafmagnsbíla fyrir áratu...

Hráefnisskortur í framleiðslu jóladagatala
Líf og starf 5. desember 2022

Hráefnisskortur í framleiðslu jóladagatala

Lionsklúbburinn Freyr tilkynnti í vikunni að ekkert verði af árlegri sölu jólada...

Tuttugu og sjö ára rennsli
Líf og starf 5. desember 2022

Tuttugu og sjö ára rennsli

Í iðnaðarhverfi Hafnarfjarðar, nánar tiltekið í Dalshrauninu, má finna félagsska...

Sveitasælan sem hristi markaðinn
Líf og starf 2. desember 2022

Sveitasælan sem hristi markaðinn

Svíaríki er talið með stöðugri löndum í heiminum í dag. Ekki bara í efnahagslegu...

Heimasmíðuð leikföng, gjafa- og skrautmunir
Líf og starf 2. desember 2022

Heimasmíðuð leikföng, gjafa- og skrautmunir

Hvað er betra eða notalegra en að byrja jólaundirbúninginn á því að heimsækja jó...

Vinna með bilið milli manns og lands
Líf og starf 30. nóvember 2022

Vinna með bilið milli manns og lands

Ný námsbraut sem ber yfir­skriftina Land verður í boði í LungA skólanum á Seyðis...

Rafbók um landbúnað
Líf og starf 30. nóvember 2022

Rafbók um landbúnað

Á dögunum var gefin út rafbókin Landbúnaður liðinna tíma – búnaðarþættir úr Þing...

Lengi býr að fyrstu gerð
Líf og starf 29. nóvember 2022

Lengi býr að fyrstu gerð

Í síðustu tölublöðum Bændablaðsins hefur saga handverksbrugghúsa á Íslandi verið...