„Íslenskur sjávarútvegur stendur framarlega“
Sjávarútvegssýningin í Barcelona, áður í Brussel, er ein stærsta sinnar tegundar í heiminum. Sýninguna sóttu 2.244 fyrirtæki og sýnendur frá 87 ríkjum. Talið er að um 35.000 kaupendur og framleiðendur hafi heimsótt sýninguna sem var á 51.000 fermetra gólffleti.
Áætlaðar tekjur Barcelonaborgar af sýningunni eru 156 milljónir evra, eða jafnvirði 23 milljarða króna. Sýningin lagði í fyrsta skipti áherslu á að tengja konur í sjávarútvegi saman. Það fór því sérstaklega vel á því að Bjarkey Olsen Gunnarsdóttir, nýskipaður matvælaráðherra, heimsótti sýninguna og kynnti sér hana en þó sérstaklega sýningarbása íslenskra sjávarútvegsfyrirtækja, en tæplega 50 íslensk fyrirtæki voru með sýningarbás.
Bjarkey er kennaramenntuð, fædd og uppalin á Siglufirði en flutti 15 ára til Ólafsfjarðar, og starfaði sem kennari og náms- og starfsráðgjafi fram til þess að hún var kjörin á þing, hún sá um bókhald Vélsmiðju Ólafsfjarðar í mörg ár auk þess að vera gjaldkeri og almannatryggingafulltrúi á sýsluskrifstofu. Frá árinu 2000 hefur hún verið virkur þátttakandi í stjórnmálum á vegum Vinstri grænna, fyrst á heimavelli í Ólafsfirði en frá 2013 hefur hún setið á Alþingi.
Greinarhöfundur hefur farið á yfir 20 sjávarútvegssýningar, fyrst í Brussel og síðar Barcelona, en þetta var fyrsta sýning Bjarkeyjar. Honum þótti forvitnilegt að fá annað sjónarhorn en sitt á sýninguna, því glöggt er gests augað. Það lá því beint við að fá Bjarkeyju til að segja okkur frá sinni sýn á sjávarútvegssýninguna sem og markaðs- og sölustarf íslenskra sjávarútvegsfyrirtækja auk þess að fá að heyra um hugmyndir og spurningar sem kviknuðu hjá henni við heimsóknina.
Stærðin, gróskan og hagaðilar í sjávarútvegi komu á óvart
Hvað kom Bjarkeyju mest á óvart við sýninguna? „Maður var búinn að heyra ýmislegt um stærð sýningarinnar en þegar ég kom þarna þá kom mér mest á óvart hversu gríðarlega stórt þetta er. Stærðin raungerist þegar maður mætir á staðinn. Þetta gríðarlega umfang og gaman að sjá hvernig allt kraumar af lífi og maður heyrði á tali fólks að það var margt að verða til í samtali þess og nýjar hugmyndir að fæðast. Þetta var eiginlega suðupottur hugmynda.“
Bjarkey hafði ekki mikinn tíma til að skoða sig um á sýningunni og saknaði þess. En tímann nýtti hún til að heimsækja öll íslensku fyrirtækin sem voru með bása á sýningunni.
Það lá því beint við að spyrja ráðherra hvernig henni þótti íslenski hlutinn vera. ,,Mér fannst gaman að sjá alla þessa grósku hjá íslensku sjávarútvegsfyrirtækjunum og sérstaklega hjá íslensku tæknifyrirtækjunum.
Það kom mér mikið á óvart hversu mikill fjöldi hagaðila tengdum sjávarútvegi, alls staðar að úr heiminum, voru á svæðinu. Ýmiss konar samtök í sjávarútvegi, bankar, fulltrúar stjórnvalda, tryggingafélaga og svo má lengi telja. Ég átti heldur ekki von á því.“ sagði Bjarkey.
Hátt hlutfall íslenskra tækni- og tækjafyrirtækja
Langstærsti hluti sýningarinnar eru fyrirtæki, þjóðir mynda þjóðarbása til að kynna afurðir sínar, bæði með vörur til áframvinnslu en einnig fullunnar vörur. En eins og áður sagði, þá eru tæknifyrirtæki líka að kynna sig. Ísland er þekkt fyrir hversu mikill árangur hefur orðið af samvinnu sjávarútvegsfyrirtækja og tækni-, tækja- og annarra þekkingarfyrirtækja sem sprottið hafa upp úr þessum frjóa jarðvegi. Þann hluta þekkir Bjarkey vel frá fyrri störfum sínum sem bókari í vélsmiðju.
„Það var gaman að sjá Vélfag, Marel, Héðin, Slippinn, Kælismiðjuna Frost auk fjölda annarra íslenskra tækni- og tækjafyrirtækja þarna. Það var líka augljóst að hlutfall íslensku tækni- og tækjafyrirtækjanna var mun hærra en gerðist meðal annarra þjóða. Það var gaman að sjá og kom mér líka á óvart,“ sagði ráðherra.
Markaðssetning íslensku fyrirtækjanna stóð upp úr
En þar sem Bjarkey var að fara sína fyrstu ferð þá gat greinarhöfundur ekki stillt sig um að spyrja ráðherra hvernig henni hafi fundist markaðssetning og framsetning íslensku fyrirtækjanna í samanburði við aðrar þjóðir.
,,Því miður stoppaði ég ekki lengi, var svolítið á hlaupum, og því kannski ekki alveg bær til að leggja fullt mat á það. En mér fannst þetta mjög flott. Framsetning hjá Íslendingunum var klassa ofar en margt af því sem maður sá á hlaupunum. Svona eftir á að hyggja þá fannst mér allir íslensku básarnir grípa augað.“ Þegar Bjarkey lítur til baka yfir sýninguna, hvað kemur þá helst upp í hugann?
„Umfangið var svo mikið og tíminn svo knappur í heimsókninni, eins og ég hef áður sagt. Ég hefði gjarnan viljað skoða sýninguna betur og gera mér betur grein fyrir öllu. En af því sem ég sá þá fannst mér við, Íslendingar, standa dálítið upp úr enda er ég á þeirri skoðun að sjávarútvegur okkar standi mjög framarlega þótt auðvitað megi alltaf gera betur. Ég sannfærðist enn betur um þá skoðun mína.“
Nýsköpun varðandi hráefni
Nýsköpun vakti líka athygli matvælaráðherra. „Mér fannst allt krauma í nýjungagirni og áhugaverðum hugmyndum. Ég hafði tækifæri til að heimsækja spænskan matarmarkað í leiðinni þar sem ég fékk tækifæri til að skoða mig um.
Ég er mikil matarkona og fékk að bragða á mörgum mismunandi réttum. En þar vakti athygli mína hversu vel Spánverjar nýta fiskinn. Þeir borða bókstaflega allt af honum nema hausinn!“ sagði Bjarkey að lokum.
