Tveir tengdir umráðamenn eiga hlut að máli

Á undanförnum dögum hafa dýravelferðarmál verið til umfjöll­ unar í fjölmiðlum; annars vegar um slæman aðbúnað hrossa og hins vegar nautgripa í Borgarfirði. Samkvæmt upplýsingum frá Matvælastofnun er um tvö aðskilin mál að ræða, þar sem tveir tengdir umráðamenn eiga hlut að máli.

Annað málið hefur komist í hámæli á undanförnum vikum, sem snýst um vanrækslu á hrossum. Matvælastofnun (MAST) hefur tilkynnt um aðgerðir sínar gagnvart þeim umráðaaðila, þar sem fella þurfti 13 hross og önnur tíu eru undir eftirliti stofnunarinnar.

Hitt málið varðar nautgripi og reyndar sauðfé á sama bæ, en þar er annar umráðamáður samkvæmt upplýsingum frá Hrönn Ólínu Jörundsdóttur, forstjóra Matvælastofnunar.

Nautgripamálinu ekki lokið

„Við höfum ekki sent út neinar fréttir vegna annarra dýra þessara tengdu aðila þar sem málið er enn í gangi. MAST hefur nú þegar leyst úr málum fyrir hluta bústofnsins. Sauðfé sem var á bænum er til dæmis komið annað og nautgripir sem voru læstir inni eru komnir út.

Nautgripamálinu er bara ekki lokið og því hefur ekkert farið frá okkur varðandi það mál.

Það er ekki svo að við séum að reyna að leyna neinu.

Við að sjálfsögðu viljum greina frá þessum málum en við greinum ekki frá þeim fyrr en málunum er lokið,“ segir Hrönn.

Upplýsingagjöf má ekki skaða rannsóknina

„Þar sem við erum í miðjum aðgerðum gerir það oft málin stærri, flóknari og viðkvæmari þegar fjölmiðlar og samfélagið er komið í málið líka. Þegar málin eru komin í fjölmiðla og á samfélagsmiðla þá getur það haft áhrif á eftirlitsþegann og gert hann erfiðari viðureignar. Við hins vegar greinum frá þegar málum er lokið og það er samkvæmt okkar upplýsingastefnu sem er á okkar heimasíðu. Við viljum og reynum að vera eins gagnsæ og við getum en það má ekki verða til þess að upplýsingagjöfin skaði rannsóknarvinnuna og geti gert framkvæmd aðgerða erfiðari,“ segir Hrönn.

Hún segist ekki geta farið út í smáatriði varðandi ástand nautgripanna. „Það var skortur á útigöngu eins og hefur komið fram og svo erum við að skoða holdafar og fóðrun. Við erum að vinna í þessu máli og höfum verið í töluverðan tíma.“