Skráning, rekjanleiki og markaðssetning

Nýr gagnagrunnur sem ætlað er að auka meðvitund um íslenskt handverk var kynntur í Litlu lopasjoppunni á Hellu í síðustu viku. 

 

„Ferðamenn koma í auknum mæli til Íslands og kaupa sér dýrum dómum minjagripi sem ekki eru framleiddir á Íslandi. Þetta er eitthvað sem er óviðunandi og eiga gestir sem heimsækja landið okkar og aðrir rétt á að fá að vita að varan sem þeir kaupa sé „Frá Íslandi“. 

 

Kerfið okkar býður íslensku handverksfólki, hönnuðum og framleiðendum að skrá vörurnar sínar í gagnagrunn, merkja vörurnar sínar með varanlegu skráningarnúmeri, sem kaupandi getur svo flett upp ef hann hefur áhuga á og sér hann þá upplýsingar um vöruna og framleiðanda,“ segir Stefán Ólafur Guðmundsson hjá fyrirtækinu „Frá Íslandi“. Fyrirtækið var stofnað í september 2015, vegna sívaxandi þarfar á upprunamerkingu íslensks handverks. Um er að ræða upprunamerkingu með skráningu á viðkomandi handverksmanni,  hönnuðum og framleiðendum.

 

Litla lopasjoppan á Hellu

 

Margrét Jónsdóttir og eiginmaður hennar, Baldur Árnason, eiga verslunina Litla lopasjoppan á Hellu sem selur eingöngu lopavörur frá íslensku handverksfólki. 

 

„Mér líst rosalega vel á uppruna­merkinguna, þetta er tær snilld sem á eftir að reynast okkur vel. Auðvitað eiga kaupendur rétt á því að fá að vita um uppruna vörunnar, þetta hefði átt að vera komið í gagnið fyrir löngu síðan,“ segir Margrét. 

 

„Já, það er nóg að gera hjá okkur, útlendingarnir sækja mikið til okkar og kaupa lopavörur og Íslendingarnar eru líka duglegir að reka nefið inn, við erum alsæl og stefnum á að stækka verslunina,“ bætir Margrét við.