Segja blekkingum beitt í tali um aðildarumsókn
Höfundur: Þröstur Helgason
Frummælendur á fundi samtkanna Til vinstri við ESB í Tryggvaskála á Selfossi á sunnudaginn gagnrýndu ríkisstjórnina og ESB-sinna fyrir að fela aðildarumsókn með því að kalla aðlögunarferli að sambandinu samningaviðræður. Fram kom að sjálft Evrópusambandið vari við þessum misskilningi í sínu eigin kynningarefni þar sem því er algerlega hafnað að lönd geti samið sig frá meginlögum ESB. Þetta kemur fram í fréttatilkynningu frá samtökunum.Húsfyllir var á fundinum sem fjallaði um stöðu landbúnaðar gagnvart fyrirhugaðri aðildarumsókn að ESB.
Erna Bjarnadóttir hagfræðingur benti á að grunnreglur Evrópusambandsins hefðu lagagildi og sérhver varanleg undanþága sem ætti að halda gagnvart dómstólum yrði að taka upp í svokallaðan frumrétt sambandsins sem þýði að öll aðildarlönd verði að samþykkja þá breytingu.
Umræður spunnust um málið eftir framsöguræður þar sem Trausti Hjálmarsson formaður Bændasamtakanna og Lilja Alfreðsdóttir nýkjörinn formaður Framsóknarflokksins voru meðal þátttakenda. Framsögumenn voru auk Ernu nafnarnir Þorsteinn Ólafsson dýralæknir og Þorsteinn Bergsson rithöfundur og fyrrverandi bóndi en hann er jafnframt formaður samtakanna Til vinstri við ESB. Ögmundur Jónasson fyrrverandi ráðherra var fundarstjóri.
Eftir formleg fundarslit var skotið á öðrum fundi í Skálanum þar sem stofnuð var Suðurlandsdeild samtakanna Til vinstri við ESB.
