Vinsamlegast athugið að þetta efni er eldra en 2 ára.
Áslaug Arna Sigurbjörnsdóttir, háskóla-, iðnaðar- og nýsköpunarráðherra.
Áslaug Arna Sigurbjörnsdóttir, háskóla-, iðnaðar- og nýsköpunarráðherra.
Mynd / ghp
Fréttir 2. maí 2024

Samstarf háskóla skapar tækifæri

Höfundur: Guðrún Hulda Pálsdóttir

Jarðræktarmiðstöð LbhÍ er fjármögnuð með skilyrðum um samvinnu við aðrar menntastofnanir. Árangurstengd fjármögnun á að gera háskólum kleift að sækja fram í takt við þróun samfélagsins. Áslaug Arna Sigurbjörnsdóttir, háskóla-, iðnaðar- og nýsköpunarráðherra, umbunar þeim háskólum sem starfa saman og sameinast.

Jarðræktarmiðstöð við Landbúnaðarháskóla Íslands (LbhÍ) á Hvanneyri er fjármögnuð í nýrri fjármálaáætlun, með tveggja ára framlagi, með alls 600 m.kr., og mun bygging hennar hefjast árið 2025, að því er fram kemur í nýrri tillögu til þingsályktunar um fjármálaáætlun fyrir árin 2025–2029.

Áslaug Arna Sigurbjörnsdóttir, háskóla-, nýsköpunar- og iðnaðarráðherra, segir mikilvægt að miðstöðin verði nýtt af fleiri háskólum en eingöngu LbhÍ. Skólinn geti gert betur og náð meiri árangri með auknu samstarfi og samvinnu við aðra háskóla.

Styður við uppbyggingu á Hólum

„Ég hef ýtt undir aukið samstarf háskóla og sett á hvata til þess að skólarnir vinni meira saman, þannig nýtum við fjármuni betur og náum meiri árangri í háskólastarfi. Skólarnir hafa sjálfir tekið forskot í því að ræða sameiningar en ég hefði viljað sjá Landbúnaðarháskólann taka virkari þátt í samtalinu. Ég hef stutt rækilega við að Háskólinn á Bifröst og Háskólinn á Akureyri sameinist en einnig við uppbyggingu sjálfstæðrar sterkrar háskólaeiningar á Hólastað sem með samstarfi nýtir sér stærð og styrkleika Háskóla Íslands. Það starf er leitt á forsendum Háskólans á Hólum en í Skagafirði eru gríðarleg uppbyggingartækifæri á námi sem tengjast atvinnulífinu, hvort sem við horfum til fiskeldis, ferðaþjónustu eða hestamennsku. Með samvinnu Hólaskóla og HÍ var auðveldara að styðja við og byggja upp húsnæði og aðstöðu á svæðinu.“ Landbúnaðarháskólinn hafi hins vegar ekki sótt um stuðning til þess að ráðast í uppbyggingu á grundvelli sameininga eða samstæðu. „En ég trúi því að það felist gríðarleg tækifæri til stóraukins samstarfs eða sameiningar til að byggja meira upp á Hvanneyri og bjóða þar upp á fjölbreyttara nám,“ segir Áslaug Arna.

Gildi landbúnaðarmenntunar

Hún hefur fundað með háskólaráði LbhÍ en uppbygging Jarðræktarmiðstöðvarinnar hefur verið þar forgangsmál um allnokkurt skeið. Með fjárveitingu í gegnum nýja fjármálaáætlun er ljóst að af byggingunni verður. Áslaug Arna segist hafa skynjað mikla jákvæðni gagnvart samstarfi LbhÍ og HÍ við notkun á nýrri jarðræktarmiðstöð. „Það þykir mér mjög gott og ég er ánægð með sóknina sem ég heyrði í háskólaráði yfir tækifærunum sem í þessu gæti falist.“

Gildi landbúnaðarmenntunar á háskólastigi hefur, að sögn Áslaugar Örnu, sjaldan verið mikilvægara. „Í því liggja tækifærin á bak við sókn í matvælaframleiðslu, enda krefst hún menntunar í takt við þá framþróun sem er að verða í heiminum öllum. Ég held að framsækni í rannsóknum á þessu sviði sé gríðarlega mikil. Við höfum verið að leitast við að bæta bæði innviði og aðstöðu til landbúnaðarmenntunar og þar hefur Landbúnaðarháskólinn verið leiðandi.“

Hún vitnar í nýlega könnun Alþjóðaefnahagsráðsins sem leiddi í ljós nauðsyn þess að sækja fram í tækni og nýsköpun á sviði landbúnaðar. „Ég vil sjá landbúnað á Íslandi í enn meiri sókn. Við þurfum að styrkja bændur til að breyta störfum sínum í takt við nýjar áskoranir og nýta þau gríðarlegu tækifæri sem fyrir honum liggja. Við höfum allt til þess, þekkinguna, metnaðinn, reynsluna og endalaust af frábæru fólki í faginu. Landbúnaður er víðtækur og fjölbreyttur og samofinn svo mörgum öðrum áskorunum. Við höfum ótrúlega góða sögu að segja þegar kemur að sjálfbærni í matvælaframleiðslu og ég trúi því einlægt að við getum gert enn betur.“

Þjónusta Microsoft liggur niðri
Fréttir 13. nóvember 2026

Þjónusta Microsoft liggur niðri

Vegna vandræða í kerfum Microsoft liggur tölvupóstur Bændablaðsins tímabundið ni...

Matarmót Austurlands á laugardaginn
Fréttir 12. nóvember 2026

Matarmót Austurlands á laugardaginn

Matarmót Austurlands verður haldið í sjötta sinn í Sláturhúsinu á Egilsstöðum la...

Miðdalur fyrirmyndarbú
Fréttir 11. nóvember 2026

Miðdalur fyrirmyndarbú

Ábúendur í Miðdal í Kjósarhreppi fengu viðurkenningu sem fyrirmyndarbú deildar n...

Grænbók um landgræðslu og skógrækt í Samráðsgátt
Fréttir 11. nóvember 2026

Grænbók um landgræðslu og skógrækt í Samráðsgátt

Grænbók um landsáætlun í landgræðslu og skógrækt var nýlega sett í Samráðsgátt s...

Blásið til sóknar í lífrænum landbúnaði
Fréttir 10. nóvember 2026

Blásið til sóknar í lífrænum landbúnaði

Fagráð í lífrænum landbúnaði stendur fyrir málþinginu „Tíföldum lífræna framleið...

Fleiri fluttu til en frá öllum sveitarfélögum Vesturlands
Fréttir 10. nóvember 2026

Fleiri fluttu til en frá öllum sveitarfélögum Vesturlands

Búferlaflutningar hafa verið hagfelldir á Vesturlandi undan-arin fimm ár. Fleiri...

Heildarlög um loftslagsmál
Fréttir 10. nóvember 2026

Heildarlög um loftslagsmál

Jóhann Páll Jóhannsson umhverfis-, orku- og loftslags- ráðherra mælti fyrir frum...

Aðgerðir til verndar líffræðilegri fjölbreytni
Fréttir 10. nóvember 2026

Aðgerðir til verndar líffræðilegri fjölbreytni

Út er komin aðgerðaáætlun um líffræðilega fjölbreytni. Meðal forgangsaðgerða er ...

https://bestun.airserve.net/banner_bundles/de3e87e0d8dde67f98882b3ac12f8b2f