Samningur við alþjóðasamtök um íslenska hestinn
Mánudaginn 28. september skrifuðu Gundula Sharman, forseti FEIF, alþjóðasamtaka um íslenska hestinn, og Trausti Hjálmarsson, formaður Bændasamtaka Íslands (BÍ), undir nýjan samning um WorldFeng.
WorldFengur er alþjóðlegur gagnagrunnur um íslenska hestinn sem FEIF og BÍ hafa haft samstarf um frá árinu 2000. „Hér er um að ræða einstakt verkefni á heimsvísu en eitt af markmiðum þess er að skrá öll íslensk hross, hvar sem þau eru í heiminum, í einn miðlægan gagnagrunn. Þetta hefur náðst og nú eru skráð í WorldFeng tæplega 600 þúsund hross í 30 löndum,“ segir Þorvaldur Kristjánsson, ráðunautur í hrossarækt hjá Ráðgjafarmiðstöð landbúnaðarins.
Annað markmið verkefnisins var að koma á fót alþjóðlegu kynbótamati og hefur það verið keyrt árlega síðan 2004. „Samstarfið um WorldFeng hefur verið afar farsælt í gegnum tíðina og er svo náið samstarf um eitt hestakyn á heimsvísu einstakt í heimi hrossaræktarinnar. Ákveðið var í fyrra að taka samninginn um WorldFeng til endurskoðunar til að styrkja samstarfið enn frekar á milli FEIF og BÍ og til þess að vera betur í stakk búin til að mæta áskorunum og verkefnum framtíðarinnar,“ segir Þorvaldur enn fremur.
„Afar ánægjulegt og verðmætt er að nýr samningur sé nú kominn fram. Það er svo Ráðgjafarmiðstöð landbúnaðarins sem sér um þróun og viðhald WorldFengs-forritsins og ber ábyrgð á daglegum rekstri sem og að framfylgja skyldum og verkefnum Bændasamtakanna í þessu samstarfi við FEIF.“
