Salmonella í Fellshlíð

Salmonella hefur greinst á kúabúinu Fellshlíð í Eyjafirði. Matvælastofnun hefur gefið út fyrirmæli um ráðstafanir til að hindra smitdreifingu frá búinu að því er fram kemur í tilkynningu.

Samkvæmt tilkynningu greindist einstaklingur sem tengist búinu með salmonellusýkingu og voru á búinu gripir með sjúkdómseinkenni, m.a. blóðuga skitu. Ráðstafanir sem gripið hefur verið til felast meðal annars í að bannað er að flytja lifandi dýr út af búinu án leyfis héraðsdýralæknis, þjónustuaðilar skulu klæðast einnota hlífðarfatnaði eða fatnaði búsins. Gripir mega aðeins vera sendir til slátrunar að undangenginni sýnatöku og neikvæðari niðurstöðu rannsóknar, búfjáráburð má aðeins nota að uppfylltum ákveðnum skilyrðum og hræjum skal fargað með öruggum hætti. Þá eiga fóðurbíll og mjólkurbíll að fara á búið í lok dags.

Í tilkynningu Matvælastofnunar er tekið fram að engin hætta stafi af neyslu mjólkur frá búinu eftir gerilsneyðingu. „Að svo stöddu er ekki vitað hvernig smitið hefur borist inn á búið en Matvælastofnun vinnur að öflun upplýsinga. Jafnframt undirbýr stofnunin nánari sýnatökur og rannsóknir til að kortleggja umfang smitsins og mögulegar smitleiðir,“ segir jafnframt.

Bændur í nágrenni búsins eru beðnir um að hafa strax samband við dýralækni eða Matvælastofnun ef þeir verða varir við sjúkdómseinkenni í gripum sem geta bent til salmonellusýkingar. Algengustu einkenni eru: minni átlyst, fall í nyt, hiti og niðurgangur sem oft er illa lyktandi og blóðugur.

Matvælastofnun mun leiðbeina bændum á búinu, sem sýkingin greindist á, um þrif og sótthreinsun. Búið verður síðan undir eftirliti stofnunarinnar og sýni verða tekin reglubundið næstu mánuði eða þar til öruggt getur talist að smitið hafi verið upprætt.

Salmonella hefur mjög sjaldan greinst í nautgripum hér á landi. „Það er til mikils að vinna að koma í veg fyrir salmonellusýkingar því mjög vandasamt og tímafrekt getur verið að útrýma smitinu,“ segir í tilkynningu Matvælastofnunar.

Salmonella er hópur þarmasýkla og finnst hún víða í náttúrunni. Náttúruleg heimkynni hennar er jarðvegur, vatn, fóður, matvæli og meltingarvegur dýra, bæði búfénaðar, villtra dýra, fugla og skordýra. Bakterían heldur til í meltingarvegi dýranna og getur borist með saur milli dýra. Hætta getur verið á krossmengun við slátrun ef dýr er sýkt af salmonellu að því er fram kemur á vef Matvælastofnunar. Þar segir jafnframt að salmonellusýkingar séu þekktar um allan heim og virðist ekki hafa dregið úr tíðni þeirra eða útbreiðslu á síðustu árum þrátt fyrir almennt aukinn þrifnað.