Ný stjórn vill aukna framleiðni í landbúnaði, draga úr sértækum búgreinastyrkjum og endurskoða ráðstöfun tollkvóta
Ný ríkisstjórn undir forsæti Bjarna Benediktssonar, formanns Sjálfstæðisflokksins, hefur tekið til starfa. Í stjórninni sitja ellefu ráðherrar og þar er Þorgerður Katrín Gunnarsdóttir úr Viðreisn í sæti sjávarútvegs- og landbúnaðarráðherra.
Auk Bjarna og Þorgerðar Katrínar er Benedikt Jóhannesson, formaður Viðreisnar, fjármálaráðherra, Óttarr Proppé, formaður Bjartrar framtíðar, er heilbrigðisráðherra, Kristján Þór Júlíusson, Sjálfstæðisflokki, er menntamálaráðherra, Björt Ólafsdóttir, Bjartri framtíð, er umhverfis- og auðlindaráðherra, Jón Gunnarsson, Sjálfstæðisflokki, er samgöngu-, fjarskipta- og byggðamálaráðherra, Þorsteinn Víglundsson, Viðreisn, er félagsmálaráðherra, Þórdís Kolbrún R. Gylfadóttir, Sjálfstæðisflokki, er ferðamála-, iðnaðar- og nýsköpunarráðherra, Sigríður Á. Andersen, Sjálfstæðisflokki, er dómsmálaráðherra og Guðlaugur Þór Þórðarson, Sjálfstæðisflokki, er utanríkisráðherra.
Þorgerður Katrín Gunnarsdóttir, nýskipaður sjávarútvegs- og landbúnaðarráðherra, sagði í tíufréttum í Sjónvarpinu (RÚV) á þriðjudagskvöld, að hennar fyrsta verk í embætti verði að skipa að nýju í nefndina sem á að endurskoða búvörusamninginn.
Í stuttu samtali við Bændablaðið í gærmorgun sagði Þorgerður að áherslur hennar í landbúnaðarmálum séu í samræmi við það sem kemur fram í stjórnarsáttmálanum.
„Þar á ég við að meira tillit verði tekið til sjónarmiða neytenda og að ýtt verði undir meiri sátt um greinina. Búvörusamningurinn er til staðar og það verður áfram unnið eftir honum. Ég tel bara að það sé hægt að gera það í enn meiri sátt en ríkir í dag.“
Framleiðsla heilnæmra, innlendra afurða
Í landbúnaðarkafla stjórnarsáttmála, eða stefnuyfirlýsingar nýju stjórnarinnar, segir að áfram skuli lögð áhersla á framleiðslu heilnæmra, innlendra afurða í umhverfisvænum og samkeppnishæfum landbúnaði. Velferð dýra verði í hávegum höfð. Skilvirkt eftirlit með dýrum og matvælaframleiðslu verði tryggt, sem og gætt að neytendavernd.
Áhersla á aukna framleiðni
Þá segir að breytingar á búvörusamningi og búvörulögum skuli miðaðar að því að leggja áherslu á aukna framleiðni, hagsmuni og valfrelsi neytenda og bænda og fjölbreytt vöruúrval. Jafnframt verði horft til samkeppnisstöðu landbúnaðar á Íslandi vegna legu landsins, veðurfars og takmarkaðra landgæða.
Síðan segri að hreinn landbúnaður, þegar litið er til afurða og umhverfis, og minni kolefnislosun verði ásamt framangreindum þáttum leiðarljósið í landbúnaðarstefnu stjórnvalda. Leggja beri áherslu á að draga ekki úr hagkvæmni og styðja áfram við jafna stöðu bænda eins og kostur er.
Draga á úr sértækum búgreinastyrkjum
Endurskoðun búvörusamnings verður grunnur að nýju samkomulagi við bændur sem miðað er við að ljúki eigi síðar en árið 2019. Verður af hálfu stjórnvalda hvatt til að vægi almennari stuðnings verði aukið, svo sem til jarðræktar, fjárfestingar, nýsköpunar, umhverfisverndar og nýliðunar, en dregið úr sértækum búgreinastyrkjum.
Þá segir að endurskoða þurfi ráðstöfun innflutningskvóta og greina forsendur fyrir frávikum frá samkeppnislögum fyrir mjólkuriðnaðinn og gera viðeigandi breytingar. Ekki fer á milli mála að þar er átt við Mjólkursamsöluna (MS).
