Kolefnisverkefni og -markaðir í þroskaferli

Bæta verður umgjörð kolefnisverkefna, minnka óvissu um þau og skýra hvað felst í kolefnishlutleysi.

Á málstofu um kolefnismarkaði sem fram fór um síðustu mánaðamót kom fram að bæta þurfi umgjörð kolefnisverkefna og minnka óvissu svo þau verði almennt talin álitlegur kostur, bæði sem aðgerð í loftslagsmálum og til fjárfestinga.

Land og skógur stóðu að málstofunni ásamt ráðgjafarfyrirtækinu Deloitte og loftslagsskránni International Carbon Registry (ICR). Hafa þessir aðilar í sameiningu unnið að skýrslu um markaðsstöðu og fjármögnun náttúrutengda lausna og er hennar að vænta undir lok ársins.

Atvinnuskapandi fyrir bændur

Í umræðum var m.a. fjallað um tækifæri bænda og bent á að bændur og aðrir landeigendur væru mjög fjölbreyttur hópur með ólíkar áherslur en mikinn áhuga væri þó þar að finna. Mikilvægt væri að verkefni væru atvinnuskapandi fyrir bændur og að þeir sæju ávinning af þeim, að því er fram kemur í fregn Lands og skógar af málstofunni.

Þá segir að ein af hindrunum fyrirtækja sem vilja fjárfesta í innlendum vottuðum kolefniseiningum sé óvissan um hvort og hvernig fyrirtækin geta talið slíkar einingar fram til að mæta markmiðum sínum um kolefnishlutleysi. Til að eyða þeirri óvissu þurfi stjórnvöld að vinna að því með atvinnulífinu að skilgreina hvað felist í kolefnishlutleysi. Ekki sé síður mikilvægt að viðurkenna mikilvægi innlendra vottaðra kolefniseininga, svo sem úr skógrækt og endurheimt votlendis, til jöfnunar á þeirri kolefnislosun sem ekki er hægt að koma í veg fyrir. Slíkt myndi auka eftirspurn á markaði og um leið möguleika framkvæmdaaðila til að fjármagna loftslagsverkefni.

Læri af því sem miður fer

Kemur fram að í umræðum hafi verið áberandi að fólki þætti mikilvægt að gott samtal væri í gangi milli hagaðila. Aðgerðir væru nauðsynlegar og ekki mætti hræðast mistök eða hnökra á verkefnum því slíkt væri til að læra af. Fram kom og að torsótt væri að afla fjármagns til kolefnisverkefna með hefðbundnum leiðum í gegnum lánsfjármögnun eða fjárfestingar.

Enn fremur var komið inn á mögulega sölu kolefniseininga úr landi sem myndu þá nýtast þar á móti losun en ekki innanlands á Íslandi, s.s. tilsvarandi jöfnun (e. Corresponding Adjustment) á loftslagsbókhaldi landa. Slíkt gæti falið í sér tækifæri til að fá hærra verð fyrir einingar. Einnig var rætt um hvort eðlilegt væri að íslenska ríkið teldi fram í kolefnisbókhaldi landsins bindingu verkefna sem orðið hefðu til að frumkvæði og með fjármögnun valkvæða eða frjálsa kolefnismarkaðarins. Mun þetta vera í mótun hjá stjórnvöldum.