Vinsamlegast athugið að þetta efni er eldra en 3 ára.
Valur Ásmundsson og Elva Díana Davíðsdóttir, Haukur Skúli, Hafþór Bjarki, Ólöf Milla og Kristján Atli taka þátt í ratleik á Æskulýðsdögum Norðurlands á Melgerðismelum.
Valur Ásmundsson og Elva Díana Davíðsdóttir, Haukur Skúli, Hafþór Bjarki, Ólöf Milla og Kristján Atli taka þátt í ratleik á Æskulýðsdögum Norðurlands á Melgerðismelum.
Mynd / Valur Ásmundsson
Fréttir 3. september 2020

Knýjandi þörf að færa alla ríðandi umferð af og frá akvegum

Höfundur: Margrét Þóra Þórsdóttir

„Það er knýjandi þörf á að færa ríðandi umferð af og frá akvegum. Umferð um Eyjafjörð hefur aukist mikið á liðnum árum, stór hluti vega er nú með bundnu slitlagi og því fylgir aukinn umferðarhraði. Það tíðkaðist hér áður fyrr að menn riðu eftir malarvegum um alla sveit, en slíkt er beinlínis hættuspil eins og staðan er nú,“ segir Valur Ásmundsson, formaður reiðveganefndar Hestamannafélagsins Funa í Eyjafjarðarsveit.

Fulltrúar Funa og Eyjafjarðar-sveitar hafa skrifað undir áframhaldandi samstarfssamning um uppbyggingu reiðvega í sveitarfélaginu. Leggur Eyjafjarðarsveit til allt að tvær milljónir króna á ári til ársloka 2023 gegn mótframlagi úr reiðvegasjóði. Um er að ræða framlengingu á samningi sem áður var í gildi.

Fulltrúar Funa og Eyjafjarðarsveitar hafa skrifað undir áframhaldandi samstarfssamning um uppbyggingu reiðvega í sveitarfélaginu. Hér er unnið að reiðvegagerð í sveitarfélaginu.

Mikil uppbygging og aukið umferðaröryggi

Vel hefur gengið undanfarin ár að byggja upp reiðvegi í sveitarfélaginu og auka með því umferðaröryggi á svæðinu svo sem er tilgangur verk-efnisins. Funamenn eru stórhuga þegar kemur að uppbyggingu reiðvega, næsta verkefni þeirra er að byggja upp reiðvegi í efri byggð sveitarfélagsins og einnig við Eyjafjarðarbraut Eystri.

„Við höfum síðastliðin ár gert átak í gerð reiðvega í okkar sveitarfélagi, Eyjafjarðarsveit hefur jafnað framlag Vegagerðarinnar til framkvæmda,“ segir Valur, en Funi hefur haft yfirumsjón með verkefninu í samstarfi við sveitarfélagið og Vegagerðina. „Hefðin er sú hér á landi að hesta-mannafélögin hafa borið hitann og þungann af reiðvegagerðinni, þannig að við erum lánsöm hér um slóðir. Hinir ýmsu verktakar úr sveitinni hafa um árin tekið þátt í uppbyggingunni með okkur og það samstarf hefur verið aldeilis frábært, það er mikilvægt að gera sem mest úr því sem við höfum úr að moða. Þá hafa landeigendur einnig sýnt verkefninu mikinn skilning og hjálpað til við að finna bestu lausnir við framkvæmdina hverju sinni.“

Valur Ásmundsson, formaður reiðveganefndar Hesta-manna-félagsins Funa, segir ánægjulegt að Eyjafjarðarsveit og Vegagerðin taki höndum saman um uppbyggingu reið-vegakerfis í sveitarfélaginu, öryggismál og framþróun hestamennsku sé háð uppbyggingu reiðveganna. Mynd / Valur Ásmundsson

Yfir fjórar einbreiðar brýr að fara

Valur segir að hestamennska sé talsvert stunduð í Eyjafjarðarsveit en að auki hafi félagar í Hestamanna-félaginu Létti á Akureyri aðstöðu á Kaupvangsbökkum, rétt sunnan við Akureyri, sem og einnig á Melgerðismelum. Þar er félagsheimili Funa, hesthús, reiðhöll, keppnissvæði, beitarhólf og stóðréttarbygging. Melgerðismelar séu þannig miðstöð hestamennsku í héraði og sannkölluð vin ferðalanga sem ferðist um á hestum.

Áhersla hefur á liðnum árum verið lögð á að byggja upp myndar-legan reiðveg til framtíðar milli Miðbrautar við Hrafnagil og inn á Melgerðismela. Valur segir að sú leið sé nú orðin góð, þó alltaf þurfi eitthvað að laga nýframkvæmdir og viðhalda eldri leiðum. „Nú má segja að helstu hætturnar á þessari leið séu hvorki meira né minna en fjórar einbreiðar brýr sem ríðandi umferð þarf að fara yfir á. Hestamenn og sveitarfélagið voru með metnaðarfulla áætlun hér á árum áður að fara meðfram ánni að austanverðu eins og gert er norðan Miðbrautar en því miður náðist ekki samkomulag við landeiganda svo þær áætlanir runnu út í sandinn. Sú framkvæmd hefði verið langsamlega öruggasta leiðin og nánast engin skörun við akandi umferð og mjög hagkvæm leið,“ segir hann.

Fulltrúar Funa og Eyjafjarðarsveitar handsala undirritaðan samning um uppbyggingu reiðvega í sveitarfélaginu. Eyjafjarðarsveit leggur til allt að tvær milljónir króna á ári til ársloka 2023 gegn mótframlagi úr reiðvegasjóði. Um er að ræða framlengingu á samningi sem áður var í gildi. Mynd / Eyjafjarðarsveit

Tengja Efri-byggðina við reiðvegakerfið

Núverandi áætlanir miðast fyrst og fremst við að vera á veghelgunarsvæði sem Valur segir vissulega hafa sína kosti. Þær leiðir þjóni vel þeim sem búa nærri þeim og eins þeim sem stunda útreiðar út af bæjum sínum.

Nú í sumar var hafist handa við að leggja reiðveg í svokallaðri „Efri-byggð“ sem tengist svo reiðvegi sem liggur fram að Melgerðismelum. Þannig tengjast bæirnir á því svæði reiðvegakerfi sem tengist Melgerðismelum, til Akureyrar og þaðan austur í Þingeyjarsýslur og norður eftir Eyjafirði.

Þá segir Valur að meðal verkefna á dagskrá næstu ára sé að byggja upp reiðvegi í veghelgunarsvæðinu meðfram Eyjafjarðarbraut Eystri en þar er víða nánast ófært fyrir ríðandi umferð um sveitina nema þá að fara eftir vegkanti sem sums staðar er malbikaður. Hið sama megi segja um sveitina inna við Melgerðismela og leiðina upp á hálendið. Þar sé langur kafli þar sem ríðandi umferð þurfi að fara eftir akvegi eða um illfært land meðfram honum. „Það væri sannarlega ánægjulegt ef hestamenn gætu farið að ríða niður í Eyjafjörð af hálendinu á góðum og öruggum stíg,“ segir hann.

Skortur á reiðvegasamgöngum stendur ferðaþjónustu fyrir þrifum

Valur nefnir að hestatengd starfsemi hafi þróast mjög á síðustu árum, hvort sem um er að ræða ferðaþjónustu eða faglegt starf við þjálfun hesta eða reiðkennslu. Í Eyjafjarðarsveit hefur Funi haldið úti reiðkennslu fyrir börn og fullorðna en einnig hafa verið starfræktir nokkrir reiðskólar fyrir börn í sveitinni. „Uppbygging reiðvega bætir vissulega aðstæður þessara skóla sem svo aftur stuðlar að aukinni nýliðun í greininni. Sama má segja um hestatengda ferðaþjónustu en skortur á reiðvegasamgöngum fram að þessu hefur hreinlega staðið ferðaþjónustunni fyrir þrifum,“ segir hann.

„Sveitin hefur upp á margt að bjóða til að aðstaða til hestamennsku geti verið mögnuð og ef við náum að byggja upp gott reiðvegakerfi skapast hér forsendur fyrir jákvæðri þróun hestamennsku, auk þess sem öryggi ríðandi og akandi umferðar verður meira. Það er ekki nokkur vafi í mínum huga að hestamennskan er frábær viðbót í æskulýðs- og íþróttastarf hvers samfélags því hestamennskan er í senn holl hreyfing, útivist og frábær vettvangur fyrir samvist með fjölskyldu og vinum,“ segir Valur og bætir við að öryggsmál og framþróun hestamennskunnar sé háð uppbyggingu  reiðvegakerfisins.

„Það er mikið gleðiefni að sveitarfélagið og Vegagerðin sýni því skilning og setji pening í þetta verkefni.“ 

Skylt efni: hestamennska | Hestamenn

Breyttar reglur um flutning líflamba
Fréttir 17. apríl 2024

Breyttar reglur um flutning líflamba

Verklagsreglur hafa verið endurskoðaðar um flutning á lömbum með verndandi eða m...

Gýgjarhólskot ræktunarbú ársins
Fréttir 16. apríl 2024

Gýgjarhólskot ræktunarbú ársins

Á fagfundi sauðfjárræktarinnar sem haldinn var á dögunum var Gýgjarhólskot í Bis...

Verulegur samdráttur í innflutningi á áburði
Fréttir 16. apríl 2024

Verulegur samdráttur í innflutningi á áburði

Matvælastofnun hefur birt leiðrétta skýrslu yfir áburðareftirlit síðasta árs.

Ísteka í yfirburðastöðu
Fréttir 15. apríl 2024

Ísteka í yfirburðastöðu

Í nýrri ályktun Samkeppniseftirlitsins kemur fram að Ísteka beiti sterkri stöðu ...

Hverfandi líkur á riðusmiti árið 2032
Fréttir 15. apríl 2024

Hverfandi líkur á riðusmiti árið 2032

Í nýrri landsáætlun verður stefnt að því að hverfandi líkur verði að upp komi ri...

Hrútaverðlaun fyrir Gullmola og Blossa
Fréttir 15. apríl 2024

Hrútaverðlaun fyrir Gullmola og Blossa

Á fagfundi sauðfjárræktarinnar sem haldinn var í Ásgarði Landbúnaðarháskóla Ísla...

Sláturhús brann til grunna
Fréttir 12. apríl 2024

Sláturhús brann til grunna

Sláturhúsið í Seglbúðum í Landbroti brann til grunna þann 1. apríl.

Ekki farið að lögum um útivist nautgripa
Fréttir 12. apríl 2024

Ekki farið að lögum um útivist nautgripa

Matvælastofnun lagði stjórnvaldssektir á þrjú kúabú á Vesturlandi á dögunum vegn...