Klóna forna rauðaviði
Erfðafræðingum hefur tekist að klóna og rækta græðlinga úr stubbum elstu og stærstu rauðaviðartrjánum sem er að finna Oregon-ríki í Bandaríkjunum Norður-Ameríku.
Samkvæmt frétt sem fréttaritari Bændablaðsins í San Francisco sendi fyrir skömmu hefur hópi plöntuerfðafræðinga, garðyrkjumanna og skógfræðinga tekist að klóna og rækta græðlinga af stubbum rauðaviðartrjáa, Sequoia sempervirens, sem voru felld á síðustu og þarsíðustu öld.
Trén fimm sem verið er að klóna og rækta voru sum hver um 3.000 ára gömul og rúmir 90 metrar að hæð og tíu metrar að þvermáli þegar þau voru felld.
Trén sem búið er að klóna voru valin með tilliti til stærðar og aldurs þeirra. Skógarhöggsmenn fyrr á tímum völdu yfirleitt stærstu og fallegustu trén til að fella þar sem þeir fengu mest fyrir þau. Á sama tíma var oft og tíðum verið að fella trén með besta erfðaefnið og eftir stóðu lakari einstaklingar.
Erfðaefnið sem notað var til að klóna trén fannst í lifandi vef í rótum trjánna og einstaka sinnum í lifandi rótarskotum eða greinum sem trén höfðu sent frá sér eftir að þau voru felld.
Auk þess sem erfðaefni til klónunar var tekið úr rauðaviðartré sem kallast General Sherman og er eitt af allra stærstu trjám í heimi í dag.
Búið er að gróðursetja 75 slíka græðlinga í Presidio þjóðgarðinum skammt frá San Francisco-borg þar sem þeir dafna vel. Eitt hundrað græðlingum hefur líka verið plantað í Cornwall á Bretlandseyjum í samvinnu við Eden-plöntugarðinn. Á næstu misserum stendur til að gróðursetja rauðaviðargræðlinga í að minnsta kosti níu öðrum löndum.
Trén sem um ræðir geta vaxið um allt að þrjá metra á ári og binda gríðarlega mikinn koltvísýring úr andrúmsloftinu á líftíma sínum.
