Íslenska fest í sessi í þjónustu og stjórnsýslu

Sveitarstjórn Rangárþings ytra og hreppsnefnd Ásahrepps hafa samþykkt nýja, sameiginlega málstefnu til að festa íslensku í sessi sem meginsamskiptamál.

Sameiginleg málstefna í Rangárþingi ytra og Ásahreppi hefur að markmiði að festa íslensku í sessi sem vandað og skýrt opinbert mál í allri þjónustu og stjórnsýslu. Segir í tilkynningu að lögð sé áhersla á að íslenska sé meginsamskiptamál í starfsemi sveitarfélaganna. Allt starfsfólk skuli leggja sig fram um að nota vandað mál og íslensk heiti stofnana og örnefna skuli ávallt vera í forgrunni.

Samhliða þessari áherslu á íslensku mun verða lögð rík áhersla á að tryggja að allir íbúar geti nýtt sér þjónustu sveitarfélaganna. Það á að gera með því að tryggja ókeypis aðgang að faglegri túlkaþjónustu þegar þörf krefur, jafnt milli tungumála sem og á íslensku táknmáli.

Lykilupplýsingar einnig á ensku

„Til að mæta þörfum fjölbreytts samfélags verða lykilupplýsingar einnig aðgengilegar á ensku og eftir atvikum öðrum tungumálum. Þá mun allt stafrænt efni, svo sem vefsíður, fylgja alþjóðlegum aðgengisstöðlum til að tryggja þjónustu við alla,“ segir enn fremur. Þá muni sveitarfélögin jafnframt styðja og liðka fyrir aðgangi starfsfólks og íbúa af erlendum uppruna að íslenskunámskeiðum.

Málstefnan byggir á lögum um stöðu íslenskrar tungu og íslensks táknmáls nr. 61/2011 og sveitarstjórnarlögum nr. 138/2011. Samkvæmt þeim bera ríki og sveitarfélög ábyrgð á að varðveita og efla íslenska tungu og sjá til þess að hún sé notuð í opinberri starfsemi.

Enskumælandi ráð

Ekki fara allir sömu leið og Rangárþing ytra og Ásahreppur. Þannig er Mýrdalshreppur með sérstakt enskumælandi ráð sem stofnað var árið 2022 til að auka áhrif nýbúa í samfélaginu og fjölga tækifærum þeirra til að taka þátt í nefndarstörfum og stefnumótun sveitarfélagsins. Um 67% íbúa eru af erlendu bergi brotnir og hafa annað móðurmál en íslensku. Þar af er pólska verulegur hluti.

Hefur enskumælandi ráðið m.a. gagnrýnt fyrirhugaðan niðurskurð stjórnvalda á fjárveitingu til íslenskukennslu í fjárlagafrumvarpi fyrir næsta ár. Sagði ráðið í nýlegri umsögn til fjárlaganefndar Alþingis að góð, skilvirk og fjölbreytt íslenskukennsla fyrir öll væri mikilvægur hluti af því að inngilding tækist vel til. Gert er ráð fyrir 361 milljón króna í íslenskukennslu fyrir útlendinga á næsta ári í fjárlagafrumvarpi ríkisstjórnarinnar. Í ár nemur framlagið 564 milljónum króna en tímabundið 250 milljóna króna aukaframlag í ár til eflingar slíkrar kennslu fellur niður.