Heppinn að starfa við það sem mér þykir skemmtilegast

„Ég hef haft alveg nóg að gera og er ánægður með það,“ segir Gunnar Freyr Benediktsson, sem býður upp á afleysingaþjónustu fyrir bændur. 

 

Gunnar er ættaður úr Gnúpverjahreppi en ólst upp á Selfossi. „Ég heillaðist ungur að þeirri hugmynd að verða bóndi þegar ég yrði stór,“ segir hann. Það er hins vegar þrautin þyngri þegar ekki er hægt að ganga inn í búskap foreldra eða önnur bú í eigu ættingja. 

 

„Mínir foreldrar eru ekki í búskap og ég hef ekki beinan aðgang að neinu búi svo ég verð að láta mér nægja enn um sinn að dreyma um að verða bóndi,“ segir Gunnar. Erfiðeikum er bundið að komast í búskap hafi menn ekki beina tengingu inn í landbúnaðinn eða nægt fé.

 

Næg verkefni

 

Gunnar hélt til náms við Landbúnaðarháskólann á Hvanneyri og lauk búfræðiprófi árið 2017. Þá kláraði hann frjótækninám árið 2019. „Áhuginn á að sinna búskap dalaði ekki neitt með árunum,“ segir hann um námsvalið. En hann sá sér leik á borði og stofnaði afleysingaþjónustu, byrjaði fljótlega eftir námið en flutti síðan til Danmerkur og bjó þar í tvö ár. Þar vann hann við landbúnaðarstörf. Heim kom hann í febrúar síðastliðnum og tók þá upp þráðinn með afleysingarnar á ný.

 

Skemmst er frá því að segja að vel gengur, bændur þiggja afleysingaþjónustu með þökkum. „Það hafa verið næg verkefni, ég var mjög heppinn að fá vinnu á sama bænum í fjóra mánuði og þeirri törn er að ljúka. Þá taka nýir bæir við og það sem líka er gott við þetta starf er að maður fer víða og kynnist mörgu nýju fólki.“ 

 

Fer hvert á land sem er

 

Gunnar hefur mikið starfað á Suðurlandi en er tilbúinn að fara hvert á land sem er. Hann tekur m.a. að sér afleysingar við mjaltir, aðstoð við vélavinnu, girðingar og í raun hvað eina sem búskap viðkemur. Kveðst hann vel geta hugsað um sauðfé og hesta þó sjálfur ríði hann ekki mikið út. „Ég sinni þeim verkum sem mér er falið að vinna. Þetta er mjög skemmtilegt starf og hefur marga kosti. Einkum auðvitað og sér í lagi þá að með því fæ ég tækifæri til að starfa við það sem mér þykir skemmtilegast,“ segir Gunnar.