Vinsamlegast athugið að þetta efni er eldra en 4 ára.
Sigríður Anna Ásgeirsdóttir rekur matarferðaþjónustu og fer með ferðamenn í heimsókn til bænda.
Sigríður Anna Ásgeirsdóttir rekur matarferðaþjónustu og fer með ferðamenn í heimsókn til bænda.
Mynd / Crisscross
Líf&Starf 5. júní 2019

Bændaheimsóknirnar vinsælastar

Höfundur: smh
Sigríður Anna Ásgeirsdóttir stofnaði matarferðaþjónustuna Crisscross árið 2016. Þar einbeitir hún sér að því að setja saman ferðir fyrir erlent ferðafólk þar sem markmiðið er að kynna íslensk matvæli fyrir því á leiðum þeirra um landið, með til dæmis heimsóknum til bænda.
 
Hún er áður kunn af því að hafa búið til og framleitt drykkinn Íslandus, sem er blanda mysu, berjasafa og íslenskra jurta. Það vörumerki seldi hún Rjómabúinu Erpsstöðum á síðasta ári.
 
Nytjaplöntur Íslands
 
„Í júní ætla ég að bjóða upp á nýjung; auglýsa nýja gönguferð þar sem megináhersla er á að kynna villtar íslenskar nytjaplöntur. Jóhanna B. Magnúsdóttir á Dalsá í Mosfellsdal mun leiða þær göngur og fræða ferðafólkið um hvernig jurtirnar sem fólk sér á göngu sinni hafa verið nýttar. Ég sé það fyrir mér að við getum boðið upp á þessar gönguferðir alveg fram í september þar sem við erum með margar tegundir nytjaplantna sem vaxa á mismunandi tíma. Þetta geta verið hundasúrur, blóðberg, ætihvönn, túnfíflar, vallhumall, mjaðjurt, ber og fleira. Þetta eru þá bæði lækningajurtir og jurtir sem hafa verið nýttar til matar og drykkjar. Þessar stuttu gönguferðir geta verið spennandi jafnt fyrir Íslendinga og erlenda ferðamenn. 
 
Meiningin er að það sé genginn stuttur hringur um Mosfellsdalinn sem býður upp á mikla náttúrufegurð, friðsæld og fjölbreyttan gróður, rétt utan borgarmarkanna,“ segir Sigríður.
 
„Jurtirnar eru tíndar á leiðinni og svo endar gönguferðin á Dalsá hjá Jóhönnu, en hún er sjálf með lífræna grænmetisræktun. Þar verður uppskeran úr göngunni nýtt til tegerðar og ef til vill til að búa til einfalda smárétti með. Það er gert ráð fyrir um þremur tímum í þessar gönguferðir þannig að það sé komið að Dalsá í kringum klukkan tólf á hádegi.“
 
Bændaheimsóknirnar vinsælastar
 
Að sögn Sigríðar eru bænda­heimsóknirnar, Food and farm, vinsælustu ferðirnar sem hún býður upp á. „Meðal áningarstaða í þessum ferðum hafa verið Bjarteyjarsandur í Hvalfirði, Háafell í Borgarfirði og Erpsstaðir í Dölum. Í þessum ferðum reynum við að fara um svæði sem fáir þekkja eða gefa gaum. Í þessum ferðum förum við gjarnan með matarhandverk með okkur í nesti sem við borðum á leiðinni við einhverja áhugaverða staði. Í Hvalfirði til að mynda er tilvalið að stoppa við Fossá eða í Brynjudal, en í þeim ferðum förum við einnig á Bjarteyjarsand þar sem bændurnir bjóða upp á eigin matvælaframleiðslu á eigin veitingastað. Þau hafa frá mörgu að segja um búskapinn og við sjáum að þetta gefur ferðafólki heilmikið, sem býr til dæmis í einhverjum af stórborgum Bandaríkjanna.
 
Það sem hefur verið hvað ánægjulegast að sjá í þessum ferðum er hvað ferðafólkið er almennt ánægt með matinn; hreinleikann og bragðgæðin sem íslensk matvæli búa yfir.“
 
Mataráhugafólk í meirihluta
 
Flestir viðskiptavina Crisscross hafa, að sögn Sigríðar, sérstakan áhuga á mat og matvælaframleiðslu. „Við fáum líka bændur, áhugafólk um landbúnað, náttúruunnendur og fólk sem hefur áhuga á að komast í persónuleg samskipti við Íslendinga. Hóparnir eru alltaf frekar fámennir til að hægt sé að sinna fólkinu betur. 
 
Slow Food-hugsjónin 
 
Það má segja að við störfum í anda Slow Food-hugmyndafræðinnar. Þeir bæir sem við erum í samstarfi við hafa allir tekið þátt í starfi Slow Food á Íslandi. Þetta eru smá fjölskyldubú sem leitast eftir því að nýta eigin afurðir í bland við afurðir náttúrunnar í nærumhverfinu til heimavinnslu matvæla. 
 
Við höfum einnig haft Dóru Svavarsdóttur, matreiðslumeistara og eiganda Culina, með okkur í liði en hún er stjórnarmaður í Slow Food Reykjavík. Hún hefur frætt okkar gesti um íslenskar matarhefðir og komið að matreiðslu fyrir hópana við ákveðin tilefni. 
 
Okkar ferðaþjónustu er kannski best lýst með slow travel, þar sem hugsað er um að njóta ferða­lagsins í rólegheitum – dvelja í augnablikinu,“ segir Sigríður. 
Tollkvótum úthlutað
Fréttir 30. maí 2024

Tollkvótum úthlutað

Verð á tollkvótum á nautakjöti frá ESB-löndum hefur hækkað aftur.

Aðeins þrjú fyrirtæki hefðu fengið undanþágu
Fréttir 30. maí 2024

Aðeins þrjú fyrirtæki hefðu fengið undanþágu

Formaður atvinnuveganefndar Alþingis segir grein forstjóra Samkeppniseftirlitsin...

Margrét Ágústa nýr framkvæmdastjóri Bændasamtaka Íslands
Fréttir 30. maí 2024

Margrét Ágústa nýr framkvæmdastjóri Bændasamtaka Íslands

Margrét Ágústa Sigurðardóttir hefur verið ráðin í starf framkvæmdastjóra Bændasa...

Stórtjón á túnum við Eyjafjörð
Fréttir 30. maí 2024

Stórtjón á túnum við Eyjafjörð

Miklar kalskemmdir eru í túnum nokkuð víða við Eyjafjörð. Í Svarfaðardal er ásta...

Styrkja vöruþróun út frá matarhefð
Fréttir 29. maí 2024

Styrkja vöruþróun út frá matarhefð

Tíu milljónum króna var fyrir skemmstu úthlutað af innviðaráðuneytinu til verkef...

Afhending Kuðungsins
Fréttir 28. maí 2024

Afhending Kuðungsins

Sorpa og Bambahús eru handhafar Kuðungsins árið 2024.

Leyfa gas- og jarðgerð úr matarafgöngum
Fréttir 28. maí 2024

Leyfa gas- og jarðgerð úr matarafgöngum

Matvælastofnun hefur nýlega tilkynnt um að Gas- og jarðgerðarstöð Sorpu (GAJA) h...

Heimaframleiðsla lögleg
Fréttir 28. maí 2024

Heimaframleiðsla lögleg

Heimaframleiðsla nefnist umgjörð sem sköpuð var til að heimila litlum aðilum í F...