Ær- og hrossakjöt ekki á bannlista Rússa

Á síðasta ári bönnuðu yfirvöld í Rúss­landi innflutning á matvælum frá löndum Evrópusambands­ins og Noregi sem mótvægisaðgerð við refsiaðgerðir Bandaríkjanna og Evrópusambandsins vegna Úkra­ínudeilunnar.

 

Bannið, sem upphafalega átti að vara í ár, hefur verið framlengt og íhuga rússnesk yfirvöld að bæta fleiri lönd­um á listann, þar á meðal Íslandi. 

 

Ágúst Andrésson, ræðismaður Rússlands á Sauðárkróki, hefur ekki trú á að Rússar setji Ísland á bannlistann og þar að auki segir hann að ær- og hrossakjöt sé ekki á núverandi lista Rússa yfir matvæli sem ekki má flytja til landsins. 

 

„Það er ekkert nýtt við það að Ísland styðji refsiaðgerðirnar gegn Rúss­um vegna Úkraínudeilunnar. Rússar settu okkur ekki á bannlistann á síðasta ári og ég á mjög erfitt með að trúa að þeir geri það núna þrátt fyrir framlengingu bannsins. Að mínu viti mun viðskiptasaga Ís­lands og Rússlands og djúp vinátta þjóðanna verða þess valdandi að Ísland verði ekki sett meðal þeirra þjóða sem eru á bannlistanum.“

 

Mikil verðmæti í húfi

 

Verði af banninu gæti það aftur á móti haft verulega slæmar afleið­ing­ar í för með sér fyrir sjávarútvegsfyrirtæki sem flytja afurðir til Rússlands. 

 

Árið 2013 voru flutt úr 742 tonn af sauðfjárafurðum til Rússlands og 510 tonn 2014 en milli 500 og 700 tonn af hrossakjöti þessi sömu ár. Verðmæti þessa útflutnings er um 600 milljónir króna á ári.

Heildarútflutningsverðmæti til Rússlands fyrstu sex mánuði árs­ins 2015 nam um sjö milljörðum ís­lenskra króna en var á sama tímabili í fyrra tæpur 11,5 milljarður. Sam­tök fyrirtækja í sjávarútvegi telja útflutningsverðmæti sjávarafurða nema 37 milljörðum í ár.