66°Norður í félag við kínverskt fatafyrirtæki
Sjóklæðagerðin sem er framleiðandi og sölulaðili 66°Norður hefur stofnað til samstarfsfélags við kínverska fatafyrirtækið HLA Group, eitt stærsta fatamerki landsins. Samstarfsélagið mun sjá um sölu og dreifingu á vörum 66°Norður á hinum geysistóra kínverska markaði.
66°Norður tengist virðiskeðju íslensku ullarinnar sterkum böndum en óvíst er hvort og hvaða áhrif samningurinn hefur á hana. Sterk tengsl eru í eignarhaldi, vörumerkjum og samstarfi um vöruhönnun á milli 66°Norður, Rammagerðarinnar og prjónaverksmiðjunnar Glófa. Samningurinn var undirritaður í september.
Í samningnum kemur fram að samstarfsfélagið kaupi vörubirgðir af Sjóklæðagerðinni og samið hafi verið um sölu hugverkaréttinda sem tengjast sölu og dreifingu á vörum 66°Norður í Kína. Rekstur fyrirtækisins hefur verið erfiður og tap aukist á milli ára, var 444 milljónir árið 2024 og 849 milljónir árið 2025.
Helgi Rúnar Óskarsson, forstjóri 66°Norður, sagði í samtali við Morgunblaðið að til stæði að opna flaggskipsverslun í Kína í september 2027. HLH Group rekur 7.000 verslanir.
Helgi Rúnar Óskarsson og Bjarney Harðardóttir, eiginkona hans, eru aðaleigendur Sjóklæðagerðarinnar, sem rekur 66°Norður. Fyrirtækið er í 49% eigu Mousse Partners, fjárfestingafélags Wertheimer-fjölskyldunnar sem á Chanel. Helgi Rúnar og Bjarney eru einnig aðaleigendur Rammagerðarinnar sem keypti Glófa árið 2022.
Glófi er stærsta og ein afar fárra prjónaverksmiðja sem eftir lifir á Íslandi og framleiðir vélprjónaðar vörur úr íslenskri ull undir vörumerkinu Varma. Glófi prjónar og saumar fullunnar flíkur úr íslensku ullinni og er einn stærsti viðskiptavinur Ístex, sem er í yfir 80% eigu sauðfjárbænda á Íslandi. Rammagerðin er einn helsti söluaðili vara Glófa og Ístex.
