Nýtt gallerí á Seyðisfirði
Gallerí Lokað er listamannarekið rými sem var opnað nýverið í gömlu netagerðinni á Seyðisfirði. Anthony Nix galleristi og Mark Rohtmaa-Jackson, sýningarstjóri og listamaður, reka rýmið.
Fyrsta sýningin ber titilinn The behaviour of geese, eða hegðun gæsa, og er sýning á verkum listakonunnar Heiðdísar Hólm. Næsta sýning verður á verkum japönsku listakonunnar NaoKo TakaHashi.
Galleríið er lítið með stórum glugga og var vinnustofa listamanns áður en það varð sýningarrými. Í gömlu netagerðinni eru bæði vinnustofur og verkstæði. Mark Rohtmaa-Jackson sagði í viðtali við blaðið að hugmyndin sé að búa þarna til rými sem gæti allt eins verið í Shoreditch í London þótt það sé á Austfjörðum á hættusvæði C vegna ofanflóða. „Rýmið er lítið svo þar er tækifæri til að sýna listamenn sem eiga kannski ekki mikið af verkum eða listamenn sem koma erlendis frá með verk, en að fólk geti samt gert eitthvað verðmætt í litlu rými.“ Mark segir það kallast fallega á við staðinn sjálfan þar sem mikil list og sköpun er til staðar á Seyðisfirði þótt samfélagið sé lítið.
„Það er ákveðin viðkvæmni í því líka, eða brothætta, að koma með listaverk hingað á þetta ofanflóðasvæði og í þetta rými sem er aldrei formlega opið eða lokað, heldur bara er og fólk getur komið við hvenær sem því hentar, það þarf bara að kveikja ljósin og ganga inn.“
