Spornað við útrýmingu

Nýlega var stofnað Fagráð um geitfjárrækt. Er það talið nauðsynlegt til að stuðla að verndun íslenska geitfjárstofnsins sem er í útrýmingarhættu.

Að sögn Hákonar Bjarka Harðarsonar, formanns deildar geitabænda innan Bændasamtaka Íslands, er nýtt fagráð geitfjárræktar hugsað til að ná saman öllum þeim aðilum sem koma að því verkefni að standa vörð um íslensku geitina.

Í fagráðinu sitja þrír geitabændur, einn aðili frá Ráðgjafarmiðstöð landbúnaðarins og einn frá Agrogen, erfðanefnd landbúnaðarins. Hákon segir að fram til þessa hafi þessir aðilar unnið dálítið hver í sínu horni og nauðsynlegt að ná þeim saman.

„Stjórn geitabænda BÍ samþykkti á stjórnarfundi í apríl verklagsreglur og hlutverk fagráðs. Helstu þættir sem unnið verður að er að stuðla að eflingu geitfjárræktar í landinu og þar með koma geitastofninum úr útrýmingarhættu. Sporna á gegn aukinni skyldleikarækt innan stofnsins. Skilgreina þarf ræktunarmarkmið svo að geitastofninn öðlist hlutverk sem framleiðslukyn, sem er megin forsenda þess að verndun skili árangri. Þá þarf að setja reglur um framkvæmd meginþátta ræktunarstarfsins, ná utan um skráningu geitastofnsins í skýrsluhaldskerfinu Heiðrúnu, og síðast en ekki síst, móta stefnu með ríkinu um verndun stofnsins,“ segir Hákon.

Hann segist jafnframt telja eðlilegt að fagráðið komi að einhverju leyti að rekstri hafrastöðvarinnar á Hvanneyri.

Fyrirhugað er að fyrsti fundur fagráðsins verði með haustinu.