Vinsamlegast athugið að þetta efni er eldra en 2 mánaða.
Nýi Hreppa skyrdrykkurinn sem væntanlega kemur á innanlandsmarkað í vor. Framleiðandinn segir Ísland hinn fullkomna tilraunamarkað og mögulega verði skoðuð þróun og framleiðsla fyrir erlenda markaði.
Nýi Hreppa skyrdrykkurinn sem væntanlega kemur á innanlandsmarkað í vor. Framleiðandinn segir Ísland hinn fullkomna tilraunamarkað og mögulega verði skoðuð þróun og framleiðsla fyrir erlenda markaði.
Mynd / Aðsendar
Fréttir 16. febrúar 2024

Skyrdrykkur komst í gegnum nálarauga smakkhóps

Höfundur: Steinunn Ásmundsdóttir

Hreppa skyrdrykkur kemur á markaðinn í apríl. Í honum eru, að sögn framleiðanda, engin sætuefni heldur aðeins náttúrulegt bragðefni.

Margrét Hrund Arnarsdóttir.

Hreppamjólk er vörumerki Fjölskyldubúsins ehf. og sérhæfir sig í að koma með mjólkurnýjungar á markað. Nú eru átta vörutegundir á boðstólum.

Margrét Hrund Arnarsdóttir er framkvæmdastjóri Hreppamjólkur sem stofnuð var árið 2021. Hún skrifaði árið 2020 í lokaritgerð við viðskiptafræðideild HÍ um hvort arðbært væri að hefja sölu á gerilsneyddri, ófitusprengdri mjólk í sjálfsölum. Faðir hennar, Arnar Bjarni Eiríksson, stofnandi og framkvæmdastjóri Landstólpa og Fjölskyldubúsins í Gunnbjarnarholti, hafði lúrt á slíkri hugmynd um árabil og var því lag að samtvinna hana námi Margrétar.

Úr handverki í heila pökkunarlínu

„Við höfum alltaf haft það markmið að vinna vörurnar sem minnst og þar af leiðandi ekki fitusprengja þær,“ segir Margrét. „Þegar við byrjuðum með Hreppamjólk fundum við strax að fólk var forvitið um þessa starfsemi og margir kölluðu eftir vörum án viðbætts sykurs. Úr því varð Hreppa Skyrdrykkur með fjórum mismunandi bragðtegundum. Þróunin hefur staðið yfir frá því síðasta vor/sumar en með því að færa okkur úr handverki í höndum upp í heila pökkunarlínu þurftum við að þróa vöru sem samnýtist með öllum hinum vörunum okkar í pökkunarvélina. Við horfðum því í heilsusamlegan drykk og upp frá því fórum við að kynna þessa vöru á matarmörkuðum og öðrum kynningum og viðbrögðin farið fram úr öllum væntingum,“ segir hún.

Um það hvert ferlið var frá hugmynd til búðarhillunnar segir Margrét það hafa byrjað á að finna gerla sem henti vel í drykkinn.

„Við erum með mjög færan mjólkurfræðing, Runólf Árna Runólfsson, í vinnu hjá okkur,“ útskýrir hún og heldur áfram: „Hann veit oftar en ekki hvað þarf að laga og betrumbæta svo að varan sé eins og við viljum hafa hana. Það hefur svo tekið langan tíma að finna fyrirtæki með réttu bragðefnin fyrir okkur og við erum búin að prófa ansi mörg. Við sóttum svo um styrk hjá Högum til þess að geta þróað vöruna enn betur fyrir markaðinn en hann gaf okkur einnig færi á að komast í nálægð við dreifðari markhóp og þróa vöruna í takt við það,“ segir hún jafnframt.

Markmiðið er, að sögn Margrétar, að neytandinn neyti mjólkurafurða sem eru sem næst uppruna sínum. „Því höldum við fast í að allar okkar vörur séu ófitusprengdar og rekjanlegar beint í Fjölskyldubúið. Við erum einnig komin með smakkhóp, þar sem við sendum vörurnar á smakkarana og þeir gefa endurgjöf. Það hefur hjálpað okkur að sjá hvað megi bæta. Hreppa skyrdrykkurinn er væntanlegur á markað í apríl en þá ættu allar græjur og umbúðir að vera klárar,“ segir hún enn fremur.

Heilsusamlegt markmið

Aðspurð um sérstöðu Hreppamjólkur á markaði segir Margrét hana fyrst og fremst vera ófitusprengdu mjólkina en rannsóknir hafi sýnt fram á að ófitusprengd mjólk geti hentað betur fyrir fólk með laktósaóþol. „Fitusprenging breytir fitunni í örsmáar agnir sem fara beint í gegnum bragðlaukana án þess að þú takir eftir henni og því er ófitusprengd mjólk bragðmeiri,“ segir hún til skýringar. „Mjólkin okkar er einnig fitumeiri en þessi hefðbundna þar sem við styðjumst við meðaltal Fjölskyldubúsins. Skyrdrykkurinn inniheldur engan viðbættan sykur eða sætuefni en það er markmið okkar að hafa vörurnar sem heilsusamlegastar. Með þessu erum við einnig að auka fjölbreytileika á drykkjarvörum úr mjólkurafurðum sem getur verið þægilegt í hröðu samfélagi eins og Ísland er. Þetta er alveg sykur- og sætuefnalaus drykkur og því afar hentugur fyrir allar kynslóðir, þ.e. frá því að börn byrja að borða fasta fæðu og um ókomna tíð,“ segir hún.

Fleiri vörur í prófunum

Um það hvert hún stefni með Hreppa skyrdrykkinn segir hún hann verða til sölu í öllum Hagkaupsverslunum til að byrja með. „Svo verður tíð og tími að leiða okkur áfram með hvað við gerum svo,“ segir hún og bætir við að þau séu vissulega með háleit markmið um þróun og framleiðslu á vöru fyrir erlenda markaði og segja megi að Ísland sé hinn fullkomni tilraunamarkaður.

Margrét er hvergi nærri hætt og segist vera í frekari vöruþróun. „Við erum alltaf að þróa nýjungar og bætingar og nú þegar hafa nokkrar vörur farið í prufur og nauðsynlegt að ákveða hvaða vörur komast í gegnum síuna. Það er ljóst að á neytendamarkaði er sífellt meiri áhugi á minna unnum vörum ásamt nýjungum á heilsusamlegri valkostum,“ segir Margrét að endingu.

Fyrsti umplöntunarróbóti landsins
Fréttir 19. apríl 2024

Fyrsti umplöntunarróbóti landsins

Í maí í fyrra var settur upp umplöntunarróbóti á gróðrarstöðinni Sólskógum í Kja...

Ólöglegur frágangur á dýrahræjum
Fréttir 19. apríl 2024

Ólöglegur frágangur á dýrahræjum

Opinn gámur, yfirfullur af dýrahræjum, stóð á dögunum á steyptu bílastæði við in...

Verslunarrekstur í dreifbýli er samfélagsverkefni
Fréttir 18. apríl 2024

Verslunarrekstur í dreifbýli er samfélagsverkefni

Vegamót á Bíldudal er matvöruverslun og veitingastaður. Gísli Ægir Ágústsson, ve...

„Allt of fáar messur“
Fréttir 18. apríl 2024

„Allt of fáar messur“

Tryggvi Sveinn Eyjólfsson, sem er á sautjánda aldursári, hefur vakið athygli fyr...

Íslenskar sængur um allan heim
Fréttir 18. apríl 2024

Íslenskar sængur um allan heim

Íslenskur dúnn ehf. selur æðardúnsængur beint til viðskiptavina um heim allan. Þ...

Vörðust ásælni ríkisins í jarðareign
Fréttir 17. apríl 2024

Vörðust ásælni ríkisins í jarðareign

Kristín Lárusdóttir og Guðbrandur Magnússon, bændur að Syðri- Fljótum í Meðallan...

Breyttar reglur um flutning líflamba
Fréttir 17. apríl 2024

Breyttar reglur um flutning líflamba

Verklagsreglur hafa verið endurskoðaðar um flutning á lömbum með verndandi eða m...

Gýgjarhólskot ræktunarbú ársins
Fréttir 16. apríl 2024

Gýgjarhólskot ræktunarbú ársins

Á fagfundi sauðfjárræktarinnar sem haldinn var á dögunum var Gýgjarhólskot í Bis...